Sääʹmteʹǧǧ da Tiõrvâsvuõđ da pueʹrrvââjjam strooiʹtel raavee veâl täʹst ooudâs õhttsažtuâj - teäddpääiʹǩ eeʹjj poʹdde 2026 liâ vaʹlljum

Õhttsažtuâjjsaǥstõõllmõõžž liâ vueʹss THL da Sääʹmteeʹǧǧ eeʹjjest 2023 vuâllaǩeeʹrjtum õhttsažtuâjjsuåppmõõžž da tõn čõõđ viikkmõõžž. Õhttsažtuâj täävtõssân lij oouʹdeed Lääʹddjânnam sääʹm-meer tiõrvâsvuõđ da puârastvââjjmõõžž, jeäʹrbi mieʹldd puuʹtʼteeʹl teâđaid Lääʹddjânnam sääʹm-meer tiõrvâsvuõđ, pueʹrrvââjjmõõžž da aarǥ tuõrv sââʹjest.

”Leäm tååđvaž, što THL:st liâ mõõnni iiʹjjin čõnnõõttâm oouʹdab raavben oouʹdeed säʹmmlai tiõrvâsvuõʹtte da puârastvââjjmõʹšše õhttneei kõõččmõõžžid. Vuäinam õhttsažtuâj ooudâsviikkmõõžž miõttlõssân, da haaʹleep juäʹtǩǩed näkam aktiivlaž da raajji kueiʹmmvuõđ”, särnn Sääʹmteeʹǧǧ saaǥǥjååʹđteeʹj sâjjsaž Tuomas Aslak Juuso.

”Haaʹleep ǩiččlõõttâd mij beäʹlest oouʹdeed Lääʹddjânnam sääʹm-meer puârastvââjjmõõžž, tiõrvâsvuõđ da tuõrvlažvuõđ, vuâmmšõõđeeʹl da tobdsteeʹl säʹmmlai jeäʹrab sââʹj alggmeeran. Leäʹp raajjâm õõutsââʹjest luõʹttjummuž, raajjâm õhttsažtuâjjrajjsid da oouʹdääm sääʹmaaʹšši kuâsttjemvuõđ. Mij täävtõssân lij raaveed THL silttummuž puuʹtʼted pueʹttiääiʹjest tuʹtǩǩummuž da teâđ, kååʹtt väldd lokku Lääʹddjânnam sääʹm-meer da ciʹsttai alggmeerai vuõiggâdvuõđid”, särnn THL väʹlddjååʹđteeʹjj Mika Salminen.

Såbbrest jiõʹlleš čõõđ eeʹjj 2025 oʹnnstummšid da vaʹǯǯtõõzzid da saǥstõʹlleš ääiʹjpoddsaž kõõččmõõžžin, diǥu Tuõttvuõtt- da suåvâdvuõttkomissio tuâjast, Sääʹmteʹǧǧlääʹjj oođummšest da alggmeertuʹtǩǩummuž tuʹtǩǩeemeettlaž vuäppõõzzi ooudâsviikkmõõžžâst.

Tän eeʹjj õhttsažtuâj teäddpäiʹǩǩen vaʹlljeeš näkam teeʹmid:

• THL da Sääʹmteʹǧǧ raavee õhttsažtuâj rajjsid vuâđđeeʹl Sääʹmaaʹšši kueiʹmmnorrõõzz. Tõt lij õhttsažtuâjjsäimmõs, koon kõskksââʹjest lij säʹmmlai da tiõrvâsvuõđ da puârastvââjjmõõžž räätktõkpäiʹǩǩ. Kueiʹmmnorrõs tåimm mosttân da dialoog raajjʼjen jeeʹres tåimmji kõõskâst. Mieʹldd nõõmtet veʹrǧǧneǩvueʹssbeäʹlid, tuʹtǩǩeemstroiʹttlid da organisaatioid.
• THL oouʹdad sääʹmǩiõllsaž materiaalid, što materiaal leʹčče âsttjemnalla da kulttuur meâldla di tõi puuʹtʼtõs pueʹrben koordinõsttum.

• THL lââʹzzat sääʹm ǩiõll- da kulttuursilttummuž tuâjjlažkååʹddes seʹst da ravsmâtt silttummuž alggmeer vuõiggâdvuõđi jeeʹrab kõõččmõõžžin.
• Tuʹtǩǩeem- da ooudeemtåimmjummšest vääʹldet konkreettlaž laauʹǩid säʹmmlai tuʹtǩǩeemeettlaž vuâđđjurddji õhttummšest pieʹǩǩen THL tåimmjummuž.

Såbbra vuässõʹtte Sääʹmteeʹǧǧ saaǥǥjååʹđteeʹj sâjjsaž Tuomas Aslak Juuso, sosiaal- da tiõrvâsvuõttluʹvddkååʹdd saaǥǥjååʹđteeʹjj Leena Niittyvuopio-Jämsä, vs. sosiaal- da tiõrvâsvuõttpiisar Anni Koivisto da sosiaal- da tiõrvâsvuõttpiisar Riitta Lehtola-Kosonen da ǩiõllstaanpiisar Anne Kirste Aikio.

THL:st vuässõʹtte väʹlddjååʹđteeʹjj Mika Salminen, soti-juâkkaz jååʹđteeʹjj Piia Aarnisalo, kääzzkõsriâžldõk-juâkkaz šurr Anu Niemi, kulttuursaž määŋgnallšemvuõtt -tiim tiimšurr da tuʹtǩǩeemšurr Hannamaria Kuusio, tuʹtǩǩeemprofessor Anu Castaneda, oouʹdeemšurr Saida Mäki-Penttilä da plaaneeʹj Niila Rahko ja Maria Nousiainen.

Lââʹssteâđ:

Tuomas Aslak Juuso
Sääʹmteʹǧǧ
saaǥǥjååʹđteeʹj sâjjsaž
teʹl. 040 687 3394
Sääʹmteʹǧǧ tuomas.juuso@samediggi.fi

Hannamaria Kuusio
THL
tiimjååʹđteeʹjj, tuʹtǩǩeemšurr
teʹl. 029 524 7657
etunimi.sukunimi@thl.fi