Sääʹmteʹǧǧ vuässââtt Säʹmmla ceerkvest -haʹŋǩǩõõzz loppsluužva Turkust
Lääʹdd evankeel-luteerlaž ceerkav jääʹrjast Sämmiliih kirhoost – Säʹmmla ceerkvest – Sápmelaččat girkus – Saamelaiset kirkossa -haʹŋǩǩõõzz loppsluuʹžv Turku duõmmceerkvest nelljdpeeiʹv 8. peeiʹv vueʹssmannust čiâss 19. Sääʹmteeʹǧǧ saaǥǥjååʹđteeikåʹdd vuässââtt sluužva.
Sääʹm ceerkavpeeiʹvid jäʹrjsteš Aanrest 5.-7.8.2022 teeʹmin Pââʹss Toll - Pââʹss Aalmi.
Kuõiʹtekksa Sämmiliih kirhoost – Säʹmmla ceerkvest – Sápmelaččat girkus – Saamelaiset kirkossa -haʹŋǩǩõõzz lij organisâsttam Lääʹdd evankeel-luteerlaž ceerkav pisppsååbbar da tõn täävtõsân lij leämmaž puʹrǧǧeed vueiʹtlvaž jâʹddmid säʹmmlai da ceerkav kõõsk. Ååʹn haʹŋǩǩõs poott Turku duõmmceerkvest jäʹrjstum sluuʹžva, kååʹtt âânn seʹst pokkjõõttâm da suåvâdvuõđ likkmõõžž säʹmmlai årra.
– Säʹmmlain da evankeel-luteerlaž ceerkvest lij kuʹǩes da määŋg määʹtt historia. Âânam täʹrǩǩen, što leäʹp âʹldd ciʹsttjeʹmen tän šõddmõõžž. Juõʹǩǩ säʹmmlast lij vueiʹttemvuõtt väʹldded vuâstta ceerkav pokkjõõttâm da suåvâdvuõđ likkmõõžž jiiʹjjes vueʹlǧǧemsõõʹjin, särnn saaǥǥjååʹđteei sâjjsaž Tuomas Aslak Juuso.
Sääʹmteeʹǧǧ saaǥǥjååʹđteei sâjjsa lââʹssen sluužva vuässâʹtte I väärrsaaǥǥjååʹđteei Leo Aikio da saaǥǥjååʹđteei vieʹǩǩteei Niina Siivikko. Sääʹmteeʹǧǧ vuäzzla Tauno Ljetoff da Ulla-Maarit Magga lie toiʹmmjam haʹŋǩǩõõzz ohjjeemjooukâst, koonn pisppsååbbar lij nõõmääm.
– Leäi jõnn cistt vuäǯǯad leeʹd mieʹldd haʹŋǩǩõõzz ohjjeemjooukâst da antologiatuâjast. Määʹtǩ äiʹǧǧen leäi rämm vuâmmšed, mäʹhtt tät haʹŋǩǩõs lij vuäǯǯam peällses späʹsseb da ciʹsttjummuž ceerkvest. Tuäiv mieʹldd säʹmmla vuäitči puäʹđlvest leeʹd õõutverddsaž ceerkav vuäzzla jiiʹjjes vueʹlǧǧemsõõʹjin. Tuäivam še tõn, što tät haʹŋǩǩõs da täʹbbjaž sluuʹžv vueiʹtlvâʹstte peäʹlstes proʹsttjummuž, särnn Tauno Ljetoff.
Sääʹmteeʹǧǧ sååbbar vuäǯǯai teâttan Säʹmmla ceerkvest -haʹŋǩǩõõzz ääiʹjpoddsaž aaʹššid njuhččmannu 14. peeiʹv 2025. Sååbbar kuuli äʹšštobddjen projeʹkttkoordinaattor Mari Valjakka da sääʹmtuâj piisar Erva Niittyvuopio.
Haʹŋǩǩõõzz loppsluuʹžvid jäʹrjsteš Hettast 23.3.2025 da Aanrest 24.3.2025. Säʹmmlai dommvuuʹd seäʹbrrkååʹdd lie jäʹrjstam jååʹđtummuž Turku duõmmceerkvest jäʹrjstum loppsluužva.
Sluuʹžv lij äävai pukid da tõn vuäit seuʹrrjed virtuaalceerkav pääiʹǩ: https://www.virtuaalikirkko.fi/kirkko/turun-tuomiokirkko/2025-05-08-6h4o12ttom
Looǥǥ lââʹzz Säʹmmla ceerkvest -haʹŋǩǩõõzz pirr: https://evl.fi/plus/paatoksenteko/piispainkokous/saamelaiset-kirkossa/
Lââʹssteâđ:
Tuomas Aslak Juuso
Saaǥǥjååʹđteei sâjjsaž
040 687 3394
tuomas.juuso@samediggi.fi
Leo Aikio
I väärrsaaǥǥjååʹđteei
040 621 6505
leo.aikio@samediggi.fi
