Sääʹmteʹǧǧ ååcc projeʹktt-tuâjjla Ijahis idja -feʹsttvaalid
Mieʹrräiggsaž projeʹktt-tuâjjlaž vaʹsttad Ijahis idja -alggmeerai musikkfeʹsttvaal veäʹǩǩpuuʹtʼteeʹj tuâjain. Tuâjj älgg 2.6.2025 da peštt 22.8.2025 räjja. Ijahis idja -feʹsttvaal jäʹrjstet 15.‒16.8.2025 Aanrest, Sajoozzâst.
Ââʹntem-mäinnan lij tuâj õõlǥtem suåppi škooultõs da sääʹmǩiõl täidd (asetõs 1727/95). Tuâj oʹnsteeʼes håiddmõõžž ooudâsvieʹǩǩat ǩiõččlâsttmõš šõddmõšjäʹrjstummšest, pueʹr õhttsažtuâjj- da vuârrvaaiktemtääid di pâstlvažvuõtt jiõččnaž da tääʹrǩes tuõjju. Pueʹrren ǩiõččât eŋgglõsǩiõl täidd.
Projeʹktt-tuâjja päʹlǩǩ meäʹrtââvv Lääʹdd Sääʹmteeʹǧǧ päʹlǩǩriâžldõõǥǥ väʹǯǯlõsvuõtt-tääʹzz V/II mieʹldd (vuâđđpäʹlǩǩ 2432,19 euʹrred/mp). Vuâđđpääʹlǩ lââʹssen määuʹset 24 % sääʹmvuuʹd lââʹss da tuõjju harjjnummuž mieʹldd meäʹrtõõvvi ǩiõččlâʹsttemlââʹzz. Projeʹktt-tuâjjla tåimmpäiʹǩǩ lij sääʹmkulttuurkõõskõs Sajoozzâst, Aanrest.
Jiijjâs maall meâldlaž ooccâmǩeʹrjj di vueiʹtlvaž tuâjjpäiʹǩǩloǥstõk da jeeʹres meâlddõõzz âʹlǧǧe maaccted Sääʹmteeʹǧǧ piisarkådda 30.4. mõõneeʹst tän ooccâmlomaakk pääiʹǩ (ävvan ođđ ikkna): Ooccâmlomakk
Lââʹssteâđaid tuâjast oudd sääʹm-musiikk-kõõskõõzz plaaneeʹjj Oula Guttorm teʹl. 040 667 4545, oula.guttorm(at)samediggi.fi
Sääʹmteeʹǧǧ tåimmjummša vuäitt tobdstõõttâd addrõõzzâst www.samediggi.fi da Ijahis idja -alggmeerai musikkšõddmõʹšše addrõõzzâst: www.ijahisidja.fi
Aanrest 11.4.2025
Sääʹmteʹǧǧ
