Ulla-Maarit Magga lij vaʹlljuum Sääʹmteeʹǧǧ halltõõzz väʹlddveärlaž vuäzzliʹžžen
Sääʹmteeʹǧǧ sååbbar vaʹllji õõutmiõllsânji Sääʹmteeʹǧǧ halltõõzz viiđad väʹlddveärlaž vuäzzliʹžžen Ulla-Maarit Magga Jeänõõǥǥâst di vuõssmõs väärrneʹǩǩen Nilla Tapiola Uccjooǥǥâst da nuʹbben väärrneʹǩǩen Armi Palonoja Suäʹđjlest Lappi paalǥâskååʹdd vuuʹdest. Såbbrest jiõʹlleš še vuõlttõs-saǥstõõllmõõžž meeraikõskksaž tåimmjummuž kuõskki strategia peeiʹvtummšest.
Sääʹmteʹǧǧ 1.9.2024 - 31.12.2027. Snimldõk: Ville Fofonoff
Sääʹmteʹǧǧlääʹjj oođummuš mieʹldd Sääʹmteeʹǧǧ halltõõzz noorõʹsse lââʹzztet õhtt väʹlddveärlaž vuäzzlaž da kueʹhtt väärrneeʹǩǩ. Oođuum Sääʹmteʹǧǧlääʹjj (414/2025) 13 § mieʹldd Sääʹmteʹǧǧ vaʹllai kõõskstes halltõõzz, koʹst lij saaǥǥjååʹđteeʹjj, kueʹhtt väärrsaaǥǥjååʹđteeʹj di jäänmõsân vitt jeeʹres vuäzzla. Lââʹssen Sääʹmteʹǧǧ vaʹllai kõõskstes halltõʹsse kueʹhtt väärrneeʹǩǩ.
Meeraikõskksaž kuõskki strategia peeiʹvtummuš ouddan
Såbbrest jiõʹlleš vuõlttõs-saǥstõõllmõõžž meeraikõskksaž tåimmjummuž kuõskki strategia peeiʹvtummšest. Sääʹmteeʹǧǧ tåimmamplaan da tällõsarvvlõõzz 2025 mieʹldd strategia peeiʹvtet vaʹstteed vaalpââʹj 1.9.2024 – 31.12.2027 tåimmamprograamm täävtõõzzid di meeraikõskksaž areenain šõddâm ouddnummuž.
Strategia peeiʹvtummšin lij miârktõs raaveet Sääʹmteeʹǧǧ vueiʹtlvažvuõđid vuässõõttâd da vaaikted meeraikõskksaž õhttsažtuâjjfooruumin, oouʹdeed säʹmmlai vuõiggâdvuõđid di puʹhtted ouʹdde alggmeer ǩiõččâmvuõʹjjid globaal kõõččmõõžžin. Vuõlttõs-saǥstõõllmõõžž vuâđald valmštõõlât eʹtǩǩõs peeiʹvtum strategiast, koʹst Sääʹmteeʹǧǧ sååbbar tuejjad mâʹŋŋlubust tuʹmmstõõǥǥ.
Vuäzzlažnõõmtõõzz såbbrest
Sääʹmteeʹǧǧ sååbbar tuejjii puõʹtti nõõmtõõzzid:
- Nuõrisuåvtõs: Ellen Saijets vaʹlljeeš Saana Aikio sâjja lopp-pââʹjjen.
- Vaal-luʹvddkåʹdd: Aimo Aikio vaʹlljeeš väärrneʹǩǩen Pirjo Lotvonen sâjja.
- Sääʹm Ǩiõllkaʹlddi: Neeta Jääskö vaʹlljeeš Sääʹm Ǩiõllkaʹlddi halltõʹsse Terhi Harju sâjja jooʹtti neelljekksa toiʹmmjempââʹj loopp räjja. Lââʹssen vaʹlljeeš Nilla Tapiola väärrneʹǩǩen Vesa Orassalo, koon sâjja Neeta Jääskö leäi ääiʹjben nõõmtum.
Sääʹmteeʹǧǧ sååbbar 4/2025 õʹnneš 29.9.2025 Sajoozzâst Aanrest da ougglõsõhttvuõđin. Såbbar påʹrddǩeʹrjj õlmstââʹttet Sääʹmteeʹǧǧ neʹttseeidain kueiʹt neäʹttel määʹttest såbbar âânnmõõžžâst.
Lââʹssteâđaid ouʹdde:
Tuomas Aslak Juuso
Saaǥǥjååʹđteeʹj sâjjsaž
040 687 3394
tuomas.juuso@samediggi.fi
Pia Ruotsala-Kangasniemi
Vaaldâšmjååʹđteeʹjj
040 726 2688 / 010 839 3106
pia.ruotsala@samediggi.fi
Johanna Alatorvinen
Saaǥǥtempiisar
040 663 4493 / 010 839 3140
johanna.alatorvinen@samediggi.fi
