Väärrsaaǥǥjååʹđteei Leo Aikio: “Puäʒʒskääđđlääʹǩǩ âlgg oođeed, ij-ǥa vueʹrdded puõccui pråppummšid”
Sääʹmteʹǧǧ kaaunõõđi mädd- da meäʹcctäällministeria eeʹttkõʹsttjivuiʹm 13. peeiʹv pâʹsslâšttam-mannust Heʹlssnest puäʒʒjânnmi jiõŋŋmõõžžâst šõddâm jieʹttpääiʹǩ diõtt. Mädd- da meäʹcctäällministeria ij alttâd puäʒʒskääđđlääʹjj meâldlaž čiõlǥtõõzz puäʒʒjânnmi vueʹjjest.
Õõʹbrin puõllšid vaajtõõlli šõŋŋ lij jiõŋŋääm määdd nuʹtt, što puäʒʒ ij pââʹst kuäivvad jiõccses porrmõõžž. Snimldõk: Asko Länsman, Kaldoaivi paalǥâs.
Mädd- da meäʹcctäällministeria uuʹdi 13.3.2025 tuʹmmstõõǥǥ, što ij alttâd puäʒʒskääđđlääʹjj meâldlaž čiõlǥtemtuâj. Ministeria ǩeäčč, što skääđ seʹlvvtummša jie leäkku nokk jiânnai vuâđđtõllum määin. Ministeria mieʹldd jååʹttmen ij leäkku nåkam pråppeem-mieʹrteeʹlm tiuʹddi vueʹrdǩâʹnes vueʹǩǩ, kååʹtt vaareʹče puäʒʒjieʹllemvueʹjj juätkkjummuž.
Sääʹmteeʹǧǧ I väärrsaaǥǥjååʹđteei Leo Aikio lij peʹttʼtõõvvâm mädd- da meäʹcctäällministeria tuʹmmstõʹǩǩe. – Lääʹdd lääʹjjšiõttummuž âlgg oođeed nuʹtt, što jieʹttvueʹjjest vieʹǩǩ vuäǯǯat õõudpeäʹlnn, ij-ǥa eman puõccui pråppeem mâŋŋa. Ânnʼjõž vueʹǩǩ, koʹst vueʹrdet čõõuč räjja teâđ puäʒʒpråppummši mieʹrest, lij jieʹrmvuâsttsaž da lij še kaallšab, ǥu vuõiggäiggsaž veäʹǩǩ jieʹttpoortummša, särnn Aikio.
Sääʹmpalggâz lie raukkâm 4.3.2025 mädd- da meäʹcctäällministeria altteed puäʒʒskääđđlääʹjj toimmupiijjmõõžž. Säʹmmlai dommvuuʹdest puõccu jie pââʹst ââʹnned takai palggâmpaaiʹǩid tõi jiõŋŋâm da kuõppjem di muõtti sizz riâddõõvvi kõrr jiõŋŋ diõtt. Õõʹbrin puõllšid vaajtõõlli šõŋŋ lij jiõŋŋääm määdd nuʹtt, što puäʒʒ ij pââʹst kuäivvad jiõccses porrmõõžž.
Vueʹǩǩ lij šõõddtam puõccui jååttmõõžž veiddsa da jieʹtt- da lââʹsspoortem taarb. Vaʹstteei šõŋŋtuejjeei lie še Taarrjânnmest da Ruõccjânnmest vääʹldest da riikk lie jåttʼtääm tâʹlles tååimaid puäʒʒhååid tuärjjummša.
Näuʹddkoʹrvvõõzzid jeät mahssu tiuddmeärrsiʹžžen
Sääʹmteeʹǧǧ da mädd- da meäʹcctäällministeria kaaunõõttmõõžžâst saǥstõʹlleš še näuʹddkoʹrvvõõzzin. Riikk kõrr tällõõzz vueʹǩǩ vuäll še näuʹddkoʹrvvõõzzid nuʹtt, što tõid jeät mahssu tiuddmeärrsiʹžžen.
– Näuʹddkoʹrvvõõzzi čuõppmõš čâckk eʹpet puäʒʒhåiddjid, kooi tällõsvueʹǩǩ lij juʹn valmmša čuuʹt kõõrâs panntaaʹlvi diõtt. Puõccu koʹlle vuäʹmstemsuej sizz da tõʹst šõddi mõõntõõzzâst âlgg vuäǯǯad tiudd koʹrvvõs. Riikk šiõttââll näuʹddnaaʹlid da lij riikk tuâjjan lij še koʹrvveed naauʹdi kåʹddem puõccuid, särnn väärrsaaǥǥjååʹđteei Aikio.
Kaaunõõttmõʹšše vuässõʹtte I väärrsaaǥǥjååʹđteei Leo Aikio mieʹldd Sääʹmteeʹǧǧ jieʹllemvueʹǩǩ- da pirrõslääʹǩǩpiisar Sarita Kämäräinen di vs. jieʹllemvueʹǩǩpiisar Maria Valkeapää.
Lââʹssteâđ:
Leo Aikio
I väärrsaaǥǥjååʹđteei
040 621 6505
leo.aikio@samediggi.fi
Sarita Kämäräinen
jieʹllemvueʹǩǩ- da pirrõslääʹǩǩpiisar
040 186 7258
sarita.kamarainen@samediggi.fi
Maria Valkeapää
vs. jieʹllemvueʹǩǩpiisar
040 530 9513
maria.valkeapaa@samediggi.fi
