Sääʹmteʹǧǧ eʹtǩǩad vuäzzlaid ođđ muuttâsooccâmluʹvddkådda - luʹvddkååʹdd saaǥǥjååʹđteeʹjen eʹtǩǩeet Oula-Antti Labba
Sääʹmteʹǧǧ eʹtǩǩad riikksuåvtõʹsse, što muuttâsooccâmluʹvddkååʹdd saaǥǥjååʹđteeʹjen nõõmtet Oula-Antti Labba. Čårrtåimmliʹžžen juristtvuäzzliʹžžen eʹtǩǩeet Piia Nuorgam di äʹšštobddivuäzzliʹžžen Juha Guttorm da Marko Tervaniemi. Juristtväärrvuäzzližžen eʹtǩǩeet Anni-Kristiina Juuso di äʹšštobddiväärrvuäzzliʹžžen Rauna Rahko-Ravantti da Joni Gaurilooff. Sääʹmteʹǧǧ tuʹmmji ääʹššest såbbreʹstes 26.2.2026
Muuttâsooccâmluʹvddkåʹdd lij jiõččnaž da čõnnõõttʼteʹmes tåimmorgaan, kååʹtt ǩiõttʼtââll vuõssmõssân muuttâsooccâmtääʹssen sääʹmteeʹǧǧest uvddum lääʹjj 26 § meâldlaž vaal-loǥstõʹǩǩe välddmõõžž da tõʹst meädda välddmõõžž kuõskki aaʹššin. Riikksuåvtõs šiõttad luʹvddkååʹdd kuuđ eeǥǥas vuârstes Sääʹmteeʹǧǧ eʹtǩǩõõzzâst.
Muuttâsooccâmluʹvddkååʹdd saaǥǥjååʹđteeʹj da juristtvuäzzla âʹlǧǧe tieuʹdded suudišttamlääʹjj (673/2016) 10 lååǥǥ 1 § šiõttuum suʹvddi takai ââʹntemõõlǥtõõzzid. Jeeʹres vuäzzlain õõlǥtet vuõiggmiõllsažvuõđ, harjjnummuž luʹvddkååʹdd tåimmsuârgga di tuâj håiddmõʹšše taarbšeei persoonlaž jiijjâsnallšemvuõđid.
Vuäzzlain ij taarbâž leeʹd miõrkkumnalla sääʹmteeʹǧǧ vaal-loǥstõʹǩǩe, leša sij jiâ vueiʹt leeʹd Sääʹmteeʹǧǧ leʹbe vaal-luʹvddkååʹdd vuäzzla leʹbe väärrvuäzzla jiâ-ǥa Sääʹmteeʹǧǧest tuâjjkõskkvuõđâst. Luʹvddkååʹdd vuäzzla da väärrvuäzzla jiâ vueiʹt še leeʹd eeʹttǩeeʹjen sääʹmteeʹǧǧ vaalin, da seeʹst âlgg iʹlmmted čõõnâsvuõđâs lääʹjj õõlǥtem naaʹlin vuõiggâdvuõttministeriaaʹje da muuttâsooccâmluʹvddkådda.
Sääʹmteeʹǧǧ sååbbar eʹtǩǩad lââʹssen riikksuåvtõʹsse, što kõõččmõš muuttâsooccâmluʹvddkååʹdd saaǥǥjååʹđteeʹj väʹlddtåimmamvuõđâst leʹbe vueʹssäiʹǧǧvuõđâst seeʹrdet luʹvddkååʹdd jiijjâz räʹtǩǩeemnalla tõn riâššõõttmõõžž õhttvuõđâst luʹvddkååʹdd jiõččnažvuõđ da čõnnõõttʼteʹmesvuõđ ainsmâttmõššân.
Lââʹssteâđ:
Tuomas Aslak Juuso
Saaǥǥjååʹđteeʹj sâjjsaž
040 687 3394 tuomas.juuso@samediggi.fi
