Sääʹmteʹǧǧ vuässõõđi riikkpeeiʹvi 2026 ääʹveempeeiʹvest - Tääʹssvääʹld presideʹntt kaaggi säʹmmlaid saaǥǥstes
Sääʹmteeʹǧǧ halltõõzz vuäzzlaž Inka Musta vuässõõđi täʹbbe 4. täʹlvvmannust riikkpeeiʹvi ääʹveempeivva, koon jäʹrjsteš Heʹlssen duõmmceerkvest da Eeʹttiǩ-kåʹddpõõrtâst.
Snimldõk: Sääʹmteeʹǧǧ vuäzzlaž Inka Musta riikkpeeiʹvi ääʹveempooddâst. Markku Ulander/ Lõsttsnimldõk
Tääʹssvääʹld presideʹntt Alexander Stubb viiʹttji ääʹveemsaaǥǥstes säʹmmlaid da puuʹti ouʹdde säʹmmlaid kuõskki teeʹmid. Saaǥǥâst son puuʹti ouʹdde:
”Õhtt vääžnai tuʹmmstõõǥǥin leäi sääʹmteʹǧǧlääʹjj oođummuš. Säʹmmla lie oʹdinakai alggmeer Lääʹddjânnmest. Sijvuiʹm jälstõõttmõš mainstââll miʹjjin õhttsažkåʹdden da demokratian.
Säʹmmlai tuõttvuõtt- da suåvâdvuõttkomissio õlmstõõʹtti rapoortâs rosttovmannust. Auʹǯǯjam väʹldded tuõđâst komissio tuâj vuâstta – da juäʹtǩǩed suåvâdvuõđ, kõskknaž ciʹsttjummuž da õhttsažtuâj čuõkku mieʹldd.”
– Uʹvddep äärv tõõzz, što tääʹssvääʹld presideʹntt kaaggi säʹmmlaid ouʹdde eeʹttiǩ-kådda ââʹnnmest riikkpeeiʹvi ääʹveemsaaǥǥâst. Säʹmmlai lokku välddmõš vueʹssen lääʹdd õhttsažkååʹdd da tõn tuʹmmstõktuâj lij tääʹrǩes saakk nuʹt sääʹmõhttsažkådda ǥu tuʹmmeeʹjid. Späʹssbõõššâp presideeʹnt täʹst likstõõzzâst da vueʹssen haaʹleep oouʹdeed raajji vuârrsaaǥǥ eeʹttiǩ-kååʹdd, riikk da säʹmmlai kõõskâst, särnn Sääʹmteeʹǧǧ halltõõzz vuäzzlaž Inka Musta.
Tääʹssvääʹld presideʹntt tiõrvti ääʹveempeeiʹvest eeʹttiǩ-kååʹdd da kuulti riikkpeeiʹvid ääʹvuum. Tääʹssvääʹld presideeʹnt saakk lij lookkâmnalla obbvuõđstes tääiʹben.
Sääʹmteeʹǧǧ halltõs da veʹrǧǧkåʹdd kaaunõõđi tääʹssvääʹld presideeʹntin mõõnni neäʹttel 29.1. Presideeʹnt lââʹnnest Heʹlssnest. Kõõččmõõžžâst leäi kuälmad kaaunõõttmõš presideʹntt Stubb pââʹj äiʹǧǧen.
Lââʹssteâđ:
Inka Musta
Sääʹmteeʹǧǧ halltõõzz vuäzzlaž
040 634 9900
Johanna Alatorvinen
Saaǥǥtempiisar
040 663 4493
johanna.alatorvinen@samediggi.fi
