Sääʹmkulttuurkõõskõs Sajoozz markknâʹsttemjååʹđteeʹjen alttääm Oula Guttorm
Sääʹmteeʹǧǧ halltõs nõõmti såbbreʹstes 10/2025 markknâʹsttemjååʹđteeʹj vergga Oula Guttorm. Guttorm lij ääiʹjben tuejjääm Sääʹm-musiikk-kõõskõõzz plaaneeʹj tuâjaid da vaʹsttääm Ijahis Idja -alggmeerai musikkfeʹsttvaal puuʹtʼtumšest.
Oula Guttorm. Snimmõk: Ville Fofonoff/Saamelaiskäräjät
10-ekksa tuâjjsueʹrj sääʹmkulttuurkõõskõs plaaneeʹjen tuejjääm Oula Guttorm lij serddjam čõhččmannu looppbeäʹlnn ođđ tuâj mieʹldd jeeʹres suârgga, ǥu son juätkk tuâjjsueʹrjstes Sääʹmteeʹǧǧest, Sääʹmkulttuurkõõskõs Sajoozz markknâʹsttemjååʹđteeʹjen. Guttorm lij vuäʹpstam määŋg eeʹjj ääiʹj õõut šuurmõõzz Sääʹmkulttuurkõõskõs Sajoozzâst jäʹrjstum prograammin, Ijahis Idja- alggmeerai musikkfeʹsttvaal. Ođđ tuâj mieʹldd puʹhttem aaʹššid da Sääʹmkulttuurkõõskõs Sajoozz oouʹdeem hååmmaid son vuârdd pueʹrr miõlin.
–Sajos lij jiijjâsnallšem kongreʹss- da noorõõttâmpõrtt, koʹst modeerni da muttstõõli sõõʹji di laaʹčkles tekniikk beäʹlnn oʹnnste määŋgnallšem prograamm da šõddmõõžž. Pooutam mieʹldd kuʹǩes ǩiõččlâsttmõõžž oouʹdab sueʹrjest da veiddsõs säimmõõzzid sueʹrj tåimmjid. Ååskam, što aktiivlaž ja plaanmallsaž tuâjain vuäǯǯap äuʹǩǩuum Sajoozz potentiaal Tâʹvv-Lappi šuurmõs konfereʹnsskõõskõssân. Vuârdam äʹlššaivuõđin, što piâzzam oouʹdeed Sajoozz tåimmjummuž õhttsažtuâjast tuâjjlažkooʹddin da Sääʹmteeʹǧǧ halltõõzzin, särnn Guttorm
Sääʹmteʹǧǧ õlmmii markknâʹsttemjååʹđteeʹj tuâj ooccâmnalla sueiʹnnmannust 2025. Markknâʹsttemjååʹđteeʹj vergga puõʹtte mieʹrräigga mõõneeʹst kääuʹc ooccmõõžž. Sääʹmteeʹǧǧ halltõs mainstõʹtti kutt ooccjin da tuejjii tuʹmmstõõǥǥ vaʹlljummšest såbbreʹstes 12.9.2025.
Mainstâttmõõžži mâŋŋa Sääʹmteeʹǧǧ halltõs vaʹllji õõutmiõllsânji markknâʹsttemjååʹđteeʹj vergga Oula Guttorm. Guttorm lij alttääm ođđ tuâj čõhččmannust 2025. Markknâʹsttemjååʹđteeʹj tuâjaid koʹlle jm. ââʹnned huõl Sääʹmkulttuurkõõskõs Sajoozz sååbbarsõõʹji da kääzzkõõzzi markknâsttmõõžžâst da kauppõõllâmtuâjast, šõddmõõžži puuʹttummša da riâššmõʹšše õhttneei vueʹjj aaʹššin kääzzkâʹsttemjuâkkaz jeeʹres tuâjjlaivuiʹm di vaʹstteed kääzzkâʹsttemjuâkkaz täälast. Markknâʹsttemjååʹđteeʹjj tåimm pieʹǩǩen Sajoozz kääzzkâʹsttemjuâkkaz joouk da puki kääzzkâʹsttemjuâkkaz tuâjjlažjååʹđtemooumžen.
Lââʹssteâđaid ouʹdde:
Oula Guttorm
Markknâʹsttemjååʹđteeʹjj
Teʹl. 040 575 5332
oula.guttorm@samediggi.fi
Pia Ruotsala-Kangasniemi
Vaaldâšmjååʹđteeʹjj
040 726 2688
pia.ruotsala@samediggi.fi
