Sääʹmteʹǧǧ vuässõõttâm aktiivlânji vuâđđlääʹǩǩvälljkååʹdd kuullmõõžžid sääʹmteʹǧǧlääʹǩǩeʹtǩǩõõzzâst
Sääʹmteʹǧǧ lij vuässõõttâm alggeeʹjj ääiʹj pukid kuʹtte sääʹmteʹǧǧlääʹǩǩeʹtǩǩõõzz kuõskki vuâđđlääʹǩǩvälljkååʹdd äʹšštobddikuullmõʹšše da vuässââtt veâl pueʹtti kuullmõõžžid pâʹsslâšttam-mannu 21. da 25. peeiʹv.
Snimldõk: Sarita Kämäräinen
Vuâđđlääʹǩǩvälljkåʹdd lij juätkkam sääʹmteʹǧǧlääʹǩǩeʹtǩǩõõzz kuõskki äʹšštobddikuullmõõžžid täʹlvv- da pâʹsslâšttam-mannu äiʹǧǧen. Tän poddsaž teâđ mieʹldd mââimõs äʹšštobddikuullmõš lij mââibaarǥ pâʹsslâšttam-mannu 25. peeiʹv.
– Juʹn toobdâs toiʹmmjemnääʹl meâldlânji leäʹp ouddam vuâđđlääʹǩǩvälljkådda tuâjjrääuh sääʹmteʹǧǧlääʹǩǩeʹtǩǩõõzz ǩiõttʼtõõllmõõžžâst, jeäʹp-ǥa kommentââʹst kõõsk äʹššǩiõttʼtõõllmõõžž õlmmsânji. Tuõivvjen lij, što lääʹǩǩeʹtǩǩõõzz ǩiõttʼtõõllmõš eeʹttiǩ-kååʹddest vuäǯǯat ǩiõrǥtum ǩiđđišttâmpââʹj äiʹǧǧen, särnn saaǥǥjååʹđteei sâjjsaž Tuomas Aslak Juuso.
Sääʹmteeʹǧǧest kuullmõõžžid lie vuässõõttâm saaǥǥjååʹđteei sâjjsaž Tuomas Aslak Juuso, I väärrsaaǥǥjååʹđteei Leo Aikio, lääʹǩǩpiisar Kalle Varis da jieʹllemvueʹǩǩ- da pirrõslääʹǩǩpiisar Sarita Kämäräinen.
Sääʹmteʹǧǧlääʹǩǩeʹtǩǩõs lij väʹlddminister Petteri Orpo halltõsprograammâst. Ääʹšš vuõltteeš vuâđđlääʹǩǩvälljkådda 14.2.2024, koozz mädd- da meäʹcctäällvälljkååʹdd, tällõsvälljkååʹdd da reâuggjieʹllem- da tääʹssärvv-välljkååʹdd âlgg uʹvdded ceälkkmõõžžeez lääʹǩǩeʹtǩǩõõzzâst. Sääʹmteʹǧǧ lij vuässõõttâm alggeeʹjj ääiʹj še tällõsvälljkååʹdd di mädd- da meäʹcctäällvälljkååʹdd äʹšštobddikuullmõõžžid.
Vuâđđlääʹǩǩvälljkåʹdd jäʹrjsti õõlmâs kuullmõõžž sääʹmteʹǧǧlääʹjj oođeem pirr 17.10.2024. Kuullmõõžž vuäitt ǩiõččâd neeʹttest addrõõzzâst https://verkkolahetys.eduskunta.fi/fi/.
Ääʹšš ǩiõttʼtõõllâmteâđ eeʹttiǩ-kååʹddest: https://www.eduskunta.fi/FI/vaski/KasittelytiedotValtiopaivaasia/Sivut/HE_100+2023.aspx
Lââʹssteâđ:
Tuomas Aslak Juuso
Saaǥǥjååʹđteei sâjjsaž
040 687 3394
tuomas.juuso@samediggi.fi
Leo Aikio
I väärrsaaǥǥjååʹđteei
040 621 6505
leo.aikio@samediggi.fi
