Sääʹmteʹǧǧ da mättʼtõs- da kulttuurministeria alttee sääʹm-mättʼtõõzz ooudâsviikkâmtuâjj-joouk tåimm-eʹtǩǩõõzzi ooudårra viikkmõõžž

Vueiʹnnlõttmõõžžâst toobdsteš taarb vueiʹnned da raaveed säʹmmlai škooultõspälggaz obbvuõttân. Lââʹssen vueiʹnnlõttmõõžžâst tuõʹtteš ooudâsviikkâmtuâjj-joouk tåimmeʹtǩǩõõzz seʹst ââʹnnem nuʹt šoorab kõõččmõõžžid, kook õõlǥte teäggtõstuʹmmstõõǥǥi da lääʹjjšiõttummuž taʹrǩstõõllmõõžž, ǥu še hiâlpben čõõđviikkâmnalla åårrai sääʹmǩiõllsaž da sääʹmǩiõli mättʼtõõzz oouʹdeemtååimaid informaatio juâǥǥ lââʹzzteeʹl da aktiivlaž säimmõstuâjain. Vueiʹnnlõõttmõõžžâst sueʹppeš še juätkktuejjummuž maallâst.

– Sääʹmteʹǧǧ späʹssbââžž kansliašurr Anita Lehikoinen sääʹm-mättʼtõõzz ooudâsviikkmõõžž vääžnaivuõđ lokku väʹlddmest. Õhttsaž fiʹttjõs sääʹm-mättʼtõõzz sââʹjest lij samai vääžnai aaʹšši ooudårra viikkmõõžžâst. Ååʹn leʹčči pueʹttiääiʹjest äiʹǧǧ kaartʼted õõutveäkka pueʹttiääiʹj läuʹǩǩmiârkid tååimain, särnn Sääʹmteeʹǧǧ saaǥǥjååʹđteeʹj sâjjsaž Tuomas Aslak Juuso.

Sääʹmteeʹǧǧest vueiʹnnlõõttmõʹšše vuässõʹtte saaǥǥjååʹđteeʹj sâjjsaž Tuomas Aslak Juuso, škooultõs- da mättmateriaal-luʹvddkååʹdd saaǥǥjååʹđteeʹjj Anni Koivisto, škooultõspiisar Bigga-Helena Magga da lääʹǩǩpiisar Kalle Varis. Ougglõsõhttvuõđin pääiʹǩ âʹlnn leʹjje ǩiõllstaanpiisar Anne Kirste Aikio, mättmateriaalpiisar Petra Kuuva, ǩiõllpieʹssvuäʹpsteeʹjj Niina Aikio-Siltala da ougglõsõhttvuõđid äuʹǩǩeei piʹlotthaʹŋǩǩõõzz koordinaattor Anne Olli. Mättʼtõs- da kulttuurministeriast tuâj jååʹđat kansliašurr Anita Lehikoinen. Suu tuâjj-jooukâst leʹjje mättʼtõsduumšeǩ Jari Rajanen, mättʼtõsduumšeǩ Marjo Vesalainen, mättʼtõsduumšeǩ Kirsi Alila, spesiaalplaanraajji Mikko CortésTèllez da spesiaaläʹšštobddi Sini Keinonen.

Ooudâsviikkâmtuâjj-joukk tuejjii veeidas čiõlǥtõõzz sääʹmǩiõli da sääʹmǩiõllsaž mättʼtõõzz vueʹjjest. Tuâjj-joukk taʹrǩstõõli sääʹmǩiõllsaž ouddpeâmm, sääʹmkulttuur- da ǩiõllpieʹsståimmjummuž, sääʹm-mättʼtõõzz da –škooultõõzz sââʹj obbvuõttân. Tõt õlmstõõʹtti eeʹjjest 2021 rapoort, koʹst tuejjeeš tåimmeʹtǩǩõõzzid sââʹj pueʹreem diõtt.

Tuâj poodd tuejjeeš še nellj pååđčiõlǥtõõzz nuʹt mättʼtõs- da ouddpeâmmtuâjjlažkååʹdd vuäǯǯamvuõđâst da škooultõspälggsin ǥu sosiaal- da tiõrvâsvuõttsueʹrj tuâjjlažkååʹdd škooultõõzz vueʹjjest sääʹmǩiõllsaž mättmateriaali vueʹjjest da taarbin di sääʹmteâđain mättmateriaalin.

Sääʹmteeʹǧǧ saaǥǥjååʹđteeʹj sâjjsaž, škooultõs- da mättmateriaalsektoor vaʹstteei saaǥǥjååʹđteeʹjj Tuomas Aslak Juuso da mättʼtõs- ja kulttuurministeria kansliašurr Anita Lehikoinen sueʹppe vueiʹnnlõttmõõžžâst jooulmannust 2024 altteemnalla ooudâsviikkâmtuâjj-joouk tåimmeʹtǩǩõõzzi kaartʼtemtuâj, koon täävtõssân lij altteed aktiivlaž tuâj tuejjummuš tåimmeʹtǩǩõõzzi toimmupiijjmõššân.

• Mättʼtõs- da kulttuurministeria õlmstâttmõõžž 2021:25, Sääʹmǩiõli da sääʹmǩiõllsaž mättʼtõõzz ooudâsviikkâmtuâjj-joouk raportt

Lââʹssteâđaid

Tuomas Aslak Juuso
Saaǥǥjååʹđteeʹj sâjjsaž
040 687 3394
tuomas.juuso@samediggi.fi

Bigga-Helena Magga
škooultõspiisar
040 570 2786 / 010 839 3121
bigga-helena.magga@samediggi.fi