Sääʹmteeʹǧǧ tuâjjlažkåʹdd lij lâssnam sueʹrǧǧäʹšštobddjin – veʹrǧǧoummu liâ alttääm tuâjain påʹrǧǧmannust

Ouddpeâmmaaʹšši sueʹrǧǧäʹšštobddi raavad sääʹmteeʹǧǧ tuâj sääʹm-mättʼtõõzz da -škooultõõzz äʹšštobddjen

Sääʹmteeʹǧǧ halltõs vaʹlljii ouddpeâmmaaʹšši sueʹrǧǧäʹšštobddjen Anni Koivisto. Koivisto lij ääiʹjab tåimmam sosiaal- da tiõrvâsvuõttaaʹšši sueʹrǧǧäʹšštoobdi veeʹrjsâjjsiʹžžen di Sääʹmteeʹǧǧ väärrsaaǥǥjååʹđteeʹjen da vuäzzliʹžžen.

– Tåbddai fiinâld piâssâd oouʹdeed sääʹm ouddpeâmm da äuʹǩǩeed tuâjast nuʹt Sääʹmteeʹǧǧ tåimmʼmõõžžâst ǥu väʹlddkååddlaž organisaatioin haʹŋǩǩuum silttummuž da ǩiõččlâsttmõõžž. Ouddpeâmm lij kõskksââʹjest sääʹmpäärnai vuõiggâdvuõđi teâuddjummša. Tõʹnt âânam nuʹt tän tuâj ǥu jeeʹres ođsmam rajjsid sääʹm ouddpeâmm tueʹrjjummšen samai vääžnʼjen, Koivisto särnn.

Ođsmam sääʹmteʹǧǧlääʹjj 5 § mieʹldd sääʹmǩiõl da kulttuur âʹlnn âânnmõʹšše da ooudâsviikkmõõžž tuõrvvmõššân Sääʹmteʹǧǧ tåimm sääʹm-mättʼtõõzz da -škooultõõzz äʹšštobddjen da oouʹdad tõi ooudâsviikkmõõžž obbvuõttân. Tän tuâj raaveem diõtt Sääʹmteeʹǧǧ tiuddsååbbar vuâđđii tuâjjriâššâmoođummuž õhttvuõđâst põõšši ouddpeâmmaaʹšši sueʹrǧǧäʹšštoobdi veeʹrj.

Jieʹllemvueʹǩǩ- da pirrõs-sektoor äʹšštobddiresuurs ođsme

Jieʹllemvueʹǩǩ- da pirrõs-sektooʹre vaʹlljeeš pirrõsaaʹšši sueʹrǧǧäʹšštobddjen luâđtiõtti kandidaatt Robin Katekeetta.

– Õhtt muu jäänmõsân motivõõʹsti aaʹššin lij vueiʹtlvažvuõtt tuejjeed tuâj äʹrbbvuõđlaž teâđ lokkuvälddmõõžž seʹst. Lij fiinâs, što pirrõstuʹtǩǩummšest toobdstet veâl pueʹrben še alggmeerai luâđast noorrâm teâđ ärvv. Muu miõlâst pueʹrmõõzz räʹtǩǩummuž šâʹdde tâʹl, ǥu tiõđlaž tuʹtǩǩummuš da puõlvvõõǥǥi poodd nårrjam ǩiõččlâsttmõš luâđast peäʹsse vuârrsaǥstõõllmõʹšše kõskkneez. Tõk čiõʹlǧǧee täujja seämma mainnâz, leša siõmmna jeeʹres ǩiõlin, Katekeetta särnn.

Sääʹmjieʹllemvuõʹjji da mäddâânnmõõžž sueʹrǧǧäʹšštoobdi tuõjju Sääʹmteeʹǧǧ halltõs vaʹllji såbbreʹstes 6.5.2026 pirrõstekniikk pâʹjjmättʼtõõđi Maria Valkeapää. Valkeapää tåimm ååʹn mieʹrräiggsiʹžžen Sääʹmteeʹǧǧ vaal-luʹvddkååʹdd piisren da alttad ođđ tuâjast mâʹŋŋlubust eeʹjjest 2027. Tõn räjja sääʹmjieʹllemvuõʹjji da mäddâânnmõõžž sueʹrǧǧäʹšštoobdi veeʹrjsâjjsiʹžžen tåimm Aslak Uula Länsman, kååʹtt alttii tuâjstes påʹrǧǧmannu pieʹllrääʹjest.

EU-aaʹšši da õhttsallaž ouddmiâsttmõõžž sueʹrǧǧäʹšštobddi tuäʹrjj vaalpââʹj prograamm tiuʹddepiijjmõõžž

Sääʹmteeʹǧǧ vaalpââʹj 1.9.2024–31.12.2027 tåimmamprograamm meâldlânji Sääʹmteʹǧǧ ǩiččlââtt raaveed vuässõõttâmvuõiggâdvuõđeez Euroopp Unioon instituutioin di vuässõõttâd EU-tuʹmmstõktuõjju Lääʹddjânnmest da Lääʹddjânnam põõšši eeʹttkâsttõõzzâst Brysslest.

Tuâjjriâššmõõžž peeiʹvtummuž õhttvuõđâst Sääʹmteeʹǧǧ halltõs tuʹmmji raaveed Sääʹmteeʹǧǧ tuâjjlažkåʹddresuurs jooʹtti vaalpââʹj ääiǥas mieʹrräiggsaž EU-aaʹšši da õhttsallaž ouddmiâsttmõõžž sueʹrǧǧäʹšštoobdi tuâjain. Sueʹrǧǧäʹšštoobdi tuâjaid kooll vaʹstteed meäʹr mieʹldd lâssnam õhttsallaž ouddmiâsttmõõžži ǩiõttʼtõõllmõõžžâst da tõi čiõʹlǧǧõõzzâst Sääʹmteeʹǧǧ tuʹtǩǩeemeettlaž suåvtõʹsse. Lââʹssen sueʹrǧǧäʹšštobddi vaʹsttad Sääʹmteeʹǧǧ EU-aaʹšši valmštõõllmõõžž koordinâʹsttem tueʹrjest di vuässââtt EU-peäʹlest välddmõõžži valmštõõllmõʹšše Sääʹmteeʹǧǧ EU-täävtõõzzi oouʹdeem diõtt.

Sääʹmteeʹǧǧ halltõs vaʹllji mieʹrräiggsaž veʹrǧǧkõskkvuõʹtte ooumažvuõiggâdvuõttlääʹjj filosofia maister Edda Sundström.

– Lij rämm piâssâd tuejjeed tuâj Sääʹmteeʹǧǧest säʹmmlai vuõiggâdvuõđi oouʹdeem diõtt. Tuâjast õhttne kueʹhtt miõlǩieʹssi vueʹssvuuʹd: säʹmmlai vuässõõttâmvuõiggâdvuõđi ooudâsviikkmõš EU-tuʹmmstõktuâjast di õhttsallaž ouddmiâsttmõõžž (FPIC) teâuddjummuž tueʹrjjummuš jeäʹrben tuʹtǩǩummša da äʹrbbvuõđlaž tiõttu õhttneei kõõččmõõžžin. Kuhttu liâ kõskksa säʹmmlai jiõččmieʹrreemvuõiggâdvuõđ teâuddjummuž beäʹlnn, da tõʹnt tät tuejjad tuâjast miârkteeinallšem da motivõõʹsti, särnn ooumažvuõiggâdvuõttlääʹjj filosofia maister Edda Sundström.

Sääʹmteeʹǧǧ saaǥǥjååʹđteeʹjj Pirita Näkkäläjärvi âânn vääžnʼjen, što Sääʹmteʹǧǧ lij vuäittam raaveed tuâjjlažkååʹddes ođđ sueʹrǧǧäʹšštobddjin.

– Leäm rämmai tõʹst, što Sääʹmteʹǧǧ lij miõlǩieʹssi tuâjjpäiʹǩǩ da nääiʹt vuäǯǯap miʹjjid tuõjju čieʹppes ämmatoummuid. Pukveeʹzz sääʹmǩiõl da kulttuur liâ jõnn tuâjjtõõʹtti sääʹmvuuʹdest. Tät lij jõnn kuärǥ äʹšš veeʹzz vuuʹd, saaǥǥjååʹđteeʹjj Näkkäläjärvi särnn.

Puk tiudduum tuâj liâ leämmaž õlmmsest ooccâmnalla ǩiiđ da ǩieʹzz poodd. Sääʹmteeʹǧǧ äävtuâjjpääiʹǩ iʹlmmtet Sääʹmteeʹǧǧ da tuâjjviõkkvaaldâšm neʹttseeidain. Jõs leäk älšsmam tuejjeed tuâj Sääʹmteeʹǧǧest, vuäitak kueʹđđed še äävooccmõõžž.

Sääʹmteeʹǧǧest liâ tuâjast õhttsiʹžže 75 ooumžed. Sääʹmteeʹǧǧ veʹrǧǧnõmmõõǥǥid peeiʹvteš tuâjjriâššâmoođummuž õhttvuõđâst vaʹstteed ânnʼjõžpeeiʹv õõlǥtummšid. Čiõlǥteeʹjjpiisar veʹrǧǧnõmmõõǥǥ muʹtteš sueʹrǧǧäʹšštobddjen, saaǥǥjååʹđteeʹj vieʹǩǩteeʹji veʹrǧǧnõmmõõǥǥ muʹtteš sueʹrǧǧvieʹǩǩteeʹjen, lääʹǩǩpiisar veʹrǧǧnõmmõõǥǥ muʹtteš juriidlaž sueʹrǧǧäʹšštobddjen da vaaldšemjååʹđteei veʹrǧǧnõmmõõǥǥ vaaldâšmjååʹđteeʹjen.

Lââʹssteâđaid vuäǯǯak:

Pirita Näkkäläjärvi
Saaǥǥjååʹđteeʹjj
044 753 3766
pirita.nakkalajarvi@samediggi.fi

Pia Ruotsala-Kangasniemi
Vaaldâšmjååʹđteeʹjj
040 726 2688
pia.ruotsala@samediggi.fi

Anni Koivisto
ouddpeâmmaaʹšši sueʹrǧǧäʹšštobddi
044 775 6560
anni.koivisto@samediggi.fi

Robin Katekeetta
Pirrõsaaʹšši sueʹrǧǧäʹšštobddi
044 737 9300
robin.katekeetta@samediggi.fi

Aslak Uula Länsman
vs. Sääʹmjieʹllemvuõʹjji da mäddâânnmõõžž sueʹrǧǧäʹšštobddi
044 909 9666
aslak-uula.lansman@samediggi.fi

Edda Sundström
EU-aaʹšši da õhttsallaž ouddmiâsttmõõžž (FPIC) sueʹrǧǧäʹšštobddi
044 527 7078
edda.sundstrom@samediggi.fi