Turku universiteʹtt, Uccjooǥǥ kåʹdd da Sääʹmteʹǧǧ čââvee õhttsažtuâjaz
Turku universiteeʹtt, Uccjooǥǥ kååʹdd da Sääʹmteeʹǧǧ õhttsaž täävtõssân lij aarktlaž vuuʹd muttsa da määŋghämmsažvuõʹtte kõskksaž teeʹmi täʹrǩstõõllmõš. Konkreettlaž ouddmiârkk õhttsažtuâjast lij mättstrooiʹtelõhttsažtuâjj Turku universiteeʹtt da Uccjooǥǥ lookkjiškooul kõõskâst, mõõn oouʹdeet.
Sääʹmteeʹǧǧ saaǥǥjååʹđteei sâjjsaž Tuomas Aslak Juuso, Turku universiteeʹtt rehtor Marjo Kaartinen da Uccjooǥǥ kåʹddjååʹđteei Päivi Kontio vuâllaǩeeʹrjte õhttsažtuâjjsuåppmõõžž mââibaarǥ 24.6.2025 Porist. Snimldõk: Turku universiteʹtt.
Turku universiteeʹtt rehtor Marjo Kaartinen, Uccjooǥǥ kåʹddjååʹđteei Päivi Kontio da Sääʹmteeʹǧǧ saaǥǥjååʹđteei sâjjsaž Tuomas Aslak Juuso vuâllaǩeeʹrjte õhttsažtuâjjsuåppmõõžž mââibaarǥ 24.6.2025 Porist.
Suåppmõʹšše leät ǩeeʹrjtam puki vueʹsspieʹli õhttsaž täätt kuʹǩesäiggsaž õhttsažtuõjju da kueiʹmmvuõđ oouʹdummša tuʹtǩǩummuž da škooultõõzz di oouʹdeem- da vaaiktemhaʹŋǩǩõõzzi pääiʹǩ.
Škooultõõzz vueʹzzeld täävtõõlât määŋghämmsaž mättstrooiʹtelõhttsažtuâj Uccjooǥǥ lookkjiškooul da Turku universiteeʹtt kõõskâst. Ođđ, raajid râstldeei škooultõsõutstõõzzin põõrǥât jeäʹrbi mieʹldd lââʹzzted õllškooultõõzz ǩieʹssemvuõđ.
Tuʹtǩǩummuž vueʹzzeld kõskksaž teeʹmid lij mieʹrren smiõttâd õhttsažtuâjast da tõi tuʹtǩǩummša ooʒʒât teäggtõõzz õõutâst.
Õhttsažtuâjj da alggmääʹttest jeäʹrben mättstrooiʹtelõhttsažtuâjj raajsmââvv aarktlaž vuuʹd muttâz da määŋghämmsažvuõđ pirrsa. Oummu tåimmʼmõš, nääʹl da äʹrbbvuõđ, jieʹllemvueʹjj, ǩiõll da kulttuur õhttne vueʹsttvuârrsânji pirrõõzz, äimmõõzz da luâđ määŋghämmsažvuõđ muttsa di mottjeei geopolitiikk šõddeem vaʹǯǯtõõzzid.
Täävtõssân lij täʹrǩstõõllâd veiddsânji mottjeei luâttpirrõõzz, kulttuur da õhttsažkååʹdd di jieʹllemvueʹǩǩtoiʹmmjummuž vuârrvaaiktõõzz da aarktlaž vuuʹd rool globaal ouddnummšest.
– Obbvuõđ âlddnet Turku universitetta toobdâs naaʹlin määŋgtiõđlânji ouddmiârkkân luâđtiõđlaž, kulttuurlaž di geopoliittlaž ǩiõččâmkuuʹlmest. Turku universiteeʹttest lij kuʹǩes äʹrbbvuõtt aarktlaž vuuʹd muttâz seuʹrrjemtuʹtǩǩummšest, da mij Kevo tuʹtǩǩeemsâjldõõǥǥâst lij täʹst kõskksaž tuâjj, rehtor Marjo Kaartinen maainast.
– Uccjooǥǥ kååʹddest ââʹnet samai vääžnʼjen, što pâʹsttep taʹrjjeed mij mättʼtõõttjid ođđ vueiʹttemvuõđid čiŋlmâʹtted sij lookkjiškooulmäättaid. Ååskam, što tän-nallšem määŋgsuârggsaž õhttsažtuâjj šõddad še ååsk pueʹttiäigga kååʹdd ǩiõččâmkuuʹlmest da vueiʹtlvâstt pueʹrmõs vueʹjjest tuʹtǩǩummuž da tiõtti pohttmõõžž konkreettlânji kåʹddniiʹǩǩi da jeärrsi vuällamnalla, lââʹzzteeʹl oummui tieʹttemvuõđ mottjeei pirrõõzzâst, Uccjooǥǥ kåʹddjååʹđteei Päivi Kontio ceälkk.
– Leʹčči fiinâs, što meeʹst leʹčči pueʹttiääiʹjest rââst-tiõđlaž, aarktlaž alggmeersiltteemkõõskõs, koʹst vuäitčim õhttsažtuâjast oouʹdeed tuʹtǩǩummuž, kååʹtt kääzzkâstt sääʹmõutstõõzz da tõn taarbid. Äimmõsmuuttâsteeʹmi lââʹssen vuäitčim tuärjjeed sääʹm põõrǥâstoiʹmmjummuž puuʹtʼteeʹl teâđ, kååʹtt väldd lokku sääʹmjieʹllemvuõʹjji määŋgnallšem taarbid da oouʹdeed innovaatioid jieʹllemviõǥǥ ravveem diõtt, Sääʹmteeʹǧǧ saaǥǥjååʹđteei sâjjsaž Tuomas Aslak Juuso tuâtt.
Lââʹssteâđ:
rehtor Marjo Kaartinen, Turku universiteʹtt, teʹl. 040 523 4722
kåʹddjååʹđteei Päivi Kontio, Uccjooǥǥ kåʹdd, teʹl. 040 744 7630
saaǥǥjååʹđteei sâjjsaž Tuomas Aslak Juuso, Sääʹmteʹǧǧ, teʹl. 040 687 3394
