Kela da Sääʹmteʹǧǧ saǥstõʹlle Heʹlssnest – sääʹmǩiõllsaž kääzzkõõzzid viiǥǥât ooudâs õhttsažtuâjast

Kela veekk ooudâs sääʹmǩiõllsaž kääzzkõõzzeez sääʹm ǩiõll-lääʹjj da Sääʹmtiiʹǧǧin eeʹjjest 2020 čuõlmmum õhttsažtuâjjsuåppmõõžž ohjjeemnalla. Oouʹdeemtuâj puäđõõzzid seuʹrrjet piiriekksaž õhttsažtuâjjsaǥstõõllmõõžžin. Saǥstõõllmõõžžid õʹnneš tän eeʹjj Kela väʹlddpääiʹǩest Heʹlssnest, da tõid jååʹđti Kela väʹlddkååddlaž äʹššneǩvuõttkääzzkõõzzi jååʹđteeʹjj Antti Jussila.

Saǥstõõllmõõžži täävtõssân lij oouʹdeed Kela sääʹmǩiõllsaž kääzzkõõzzid da ainsmâʹtted, što säʹmmlai ǩiõlʼlaž da sosiaalʼlaž vuõiggâdvuõđ teâuddje Kela kääzzkõõzzin. Saǥstõõllmõõžžin taʹrǩstõõlât õõutsââʹjest suåppum ooudâsviikkâmtååimai ouddnummuž da suåvât puõʹtti täävtõõzzin.

Kela veekk ooudâs sääʹmǩiõllsaž kääzzkõõzzid õhttsažtuâjast Sääʹmtiiʹǧǧin

Mõõnni iiʹjjin Kela lij viikkâm ooudâs Sääʹmteeʹǧǧ tuõivvjest jeäʹrben sääʹmǩiõllsaž äʹššniiʹǩǩi säursmâttmõõžž. Njuhččmannust 2026 Kela jåttʼti ođđ säursmâʹttemǩiõččlâsttmõõžž, sääʹmǩiõllsa.. miõltiõrvâsvuõttsäursmâttmõõžž. Tõt lij jurddum sääʹmǩiõllsaž äʹššniiʹǩǩid, da tõʹst leät valddum lokku sääʹmkulttuur jiijjâsnallšemvuõđid.

– Tääzz ååʹn kulddlõddâmvuâlaž sääʹmǩiõllsaž säursmâʹttemkääzzkõʹsse lij vueiʹtlvaž ooccâd koon åʹrnn Lääʹddjânnmest täättas, ǥu säursmâttmõš lij vueiʹtlvaž viikkâd čõõđ še obbnes ougglõsõhttvuõttân, projekttjååʹđteeʹjj Laura Jokiranta Kelast särnn.

Kelast taʹrǩstõõlât še ouddõsvuäʹpstõõzz suåppâmvuõđ äʹrbbvuõđlaž sääʹm jieʹllemvuõʹjjid.

– Kelast ärvvtõõlât, mäʹhtt sääʹmkulttuur da äʹrbbvuõđlaž jieʹllemvuõʹjji vueʹǩǩâttmõõžž jiiʹjjesnallšemvuõđ õõlǥči väʹldded lokku ouddõõzzi räʹtǩǩeemvuõʹjjin, särnn juâkkaz jååʹđteeʹjj Mia Helle Kela väʹlddkååddlaž äʹššneǩvuõttkääzzkõõzzi juâkksest. Tän ärvvtõõllâmtuâj tuejjeet taʹrǩstõõleen Sääʹmteeʹǧǧ ouʹdde kaggâm vuõʹjjid.

–Õhttsažtuâjj Kelain lij vääžnai, što säʹmmla vueiʹtte vuäǯǯad kääzzkõõzzid jiijjâs ǩiõlin da kulttuurâs lokku väʹlddemnallšem naaʹlin. Lij miârkteei, što Kela lij vaalmâš ooudâs viikkâd säursmâʹttemkääzzkõõzzid ǥu ouddõsvuõʹjjid eʹtǩǩõõzzeem vuâđald, Sääʹmteeʹǧǧ 2. väärrsaaǥǥjååʹđteeʹjj Tuomas Aslak Juuso tuâtt.

Sääʹmteʹǧǧ lij kaggâm ouʹdde še jeeʹres ooudâsviikkâmtaarbid. Oouʹdab saǥstõõllmõõžži mâŋŋa Kela da Sääʹmteʹǧǧ vuâđđee õhttsaž tuâjj-joouk čiõlǥted raajid râstldeei sosiaalstaan vaʹǯǯtõõzzid. Tuâjj-joukk čõõđti kõõjjõõzz, koon puäđõõzzid čuäjtõʹlleš saǥstõõllmõõžžin. Kõõjjõõzz puäđõõzz vieʹǩǩte Kela oouʹdeed tåimmjummšes nuʹt, što raajid râstldeei sosiaalstaan vaʹǯǯtõõzzid vääʹldet oouʹdab pueʹrben lokku.

Eepos vaaikat še säʹmmlai äʹššummša

Kelast lij jååʹttmen Eepos-nõõmin jooʹtti sosiaalstaan tiuʹddepiijjmõõžž ooudâsviikkâmprogramm. Kõskksaž vueʹssen Eepos-ooudâsviikkâmprograamm Kela oođad ouddõsǩiõttʼtõõllmõõžž kääzzkõõzzid da teâttriâžldõõǥǥid. Saǥstõõllmõõžžin Kela čuäʹjtõõli Eepos-prograamm Sääʹmtegga.

– Eepos vueiʹtlvâstt kääzzkõspälggsid pukin kooumin sääʹmǩiõlin, tuâtt Eepos programmjååʹđteeʹj Miikka Saarteinen. Eepos-prograammâst ǩiččlõõđât tõõzz, što še sääʹmǩiõllsai digitaalʼlaž kääzzkõõzzid teâuddjââʹttet sääʹm ǩiõll-lääʹjj õõlǥtem naaʹlin.

–  Sääʹmteeʹǧǧest feʹrttai tobdstõõttâd äšša pueʹrben. Leäʹp toobdstam sääʹm ǩiõll-lääʹjj lââʹssen määŋgaid vaiggâd kõõččmõõžžid, mâta teâđai ǩiõttʼtõõllmõõžž di kulttuursaž jiijjâsnallšemvuõđi lokku välddmõõžž ouddõstuʹmmstõktuâjast. Ääʹššest jeät leäkku veâl jiõllum sääʹmteʹǧǧlääʹjj meâldlaž saǥstõõllmõõžžid, särnn Sääʹmteeʹǧǧ 2. väärrsaaǥǥjååʹđteeʹjj Tuomas Aslak Juuso.

Saǥstõõllmõõžžin Kela da sääʹmteʹǧǧ suõʹppe, što sääʹmteʹǧǧlääʹjj meâldlaž saǥstõõllmõõžži valmštõõllmõõžž altteet vueiʹtlva sõrgg.

Lââʹssteâđ media

Antti Jussila, kääzzkõsjååʹđteeʹjj, Kela väʹlddkååddlaž äʹššneǩvuõttkääzzkõõzz, antti.jussila@kela.fi, teʹl. 040 834 5703

Tuomas Aslak Juuso, 2. väärrsaaǥǥjååʹđteeʹjj, Sääʹmteʹǧǧ, tuomas.juuso@samediggi.fi, teʹl. 040 687 3394

Looǥǥ lââʹzz

Kela sääʹmǩiõllsaž neʹttseeid (kela.fi)

Sääʹmteeʹǧǧ neʹttseeid (samediggi.fi)