Sääʹmnuõri konfereʹnss jäʹrjstet Aanrest 14.-15.8.2025
Konfereeʹns teeʹmmen lij äʹrbbvuõđlaž teâtt da tõn âlddnet õutstõõzz viõkkväär ǩiõččâmvueʹjjest. Konfereeʹnsest kuulât saakkvuâraid Sääʹmteeʹǧǧ saaǥǥjååʹđteeʹj sâjjsaž Tuomas Aslak Juusost, Niila-Juhán Valkeapää Nuõrisuåvtõõzz väärrsaaǥǥjååʹđteeʹjest, musikkpedagog da juõiggi Laura Tapiolast di videotiõrvvʼvuõtt liikkeem-, sportt- da nuõriminister Mika Poutalast. Prograammâst liâ lââʹssen vuässõõʹtti tuâjjpääʹj.
Snimldõk: Ville Fofonoff / Sääʹmteeʹǧǧ nuõrisuåvtõs
– Leäʹp noorrâm prograʹmme saakkvuârai lââʹssen miõllǩiddsaž tuâjjpaaʹjid da leäʹp tuâjjpaaʹji beäʹlnn tuejjääm õhttsažtuâj jeeʹresnallšem haʹŋǩǩõõzzi mâta CAP-SHARE, SápmiDem, Syke: IKForest da Rievdan -haʹŋǩǩõõzzivuiʹm di Sámi Duodjin da Sääʹm-museo Siidain, särnn konfereeʹns riâššmõõžžin vaʹstteei Lifu Torikka.
– Sääʹmnuõri konfereeʹns jeät leäkku jäʹrjstum kuuʹǩǩ ääiʹj seʹst da håʹt-i jeäʹp leäkku piâssâm täävtõʹsse konfereeʹns vuässõõttimeäʹrest, ååskam, što konfereʹnsspeeiʹvin šâʹdde miõllǩiddsa da vueiʹttep seämma poodd saǥstõõllâd sääʹmnuõri tuõivvjin da taarbin nuõrid jäʹrjstem tåimmjummuž juuʹrdeeʹl, tuâtt konfereeʹns valmštõõllâm tuâjj-joouk saaǥǥjååʹđteeʹjj Niila-Juhán Valkeapää.
– Tuäivvap, što sääʹmnuõri noorõõttmõõžžin šõõddče mieʹrrkõskksaž šõddmõõžž, koid nuõr vuäitče hieʹlǩeld iʹlmmted jiijjâs huõltaa håʹt mâka šõddmõõžži teäggtõõzzâst. Ânnʼjõžpeeiʹv šuurmõs pieʹǩǩ sääʹmnuõrin jälste toʹb tääiʹb da nuõr liâ hääʹrvben nuuʹbbeezvuiʹm tuejjummšest luäʹnes noorõõttmõõžžin. Noorõõttmõõžži mieʹldd nuõr vuäitče säimmõõttâd, vuõǯǯeen ođđ taaurõõžžid da ǥu še tobdstâʹtte jeeʹres oummuivuiʹm, koin vueiʹtte pueʹtted ääuʹǩ pueʹttiääiʹjest, jeäʹrbi mieʹldd tuâjj-jieʹllmest, särnna Valkeapää da Torikka.
Konfereeʹnsest raajât õõlmâsceälkkmõš äʹrbbvuõđlaž teâđ miârktõõzzâst sääʹmnuõrid, koon luõvted šõddmõõžž looppâst Sääʹmteeʹǧǧ eeʹttǩeeja. Äʹrbbvuõđlaž teâtt lij alggmeerai ǩiõččâmvueʹjjest miârkteei õutstõõzz viõkkväärr, kååʹtt raavad nuʹt kulttuursa juätkkjemvuõđ ǥu õutstõõzz piʹrǧǧeemoodd mottjeei maaiʹlmest. Tõt iʹlla tåʹlǩ mõõnnâmääiʹj moštt, leša jieʹlli, âânnlaž da õhttsallaš pieʹǩǩ aarǥ da identiteeʹtt. Jeäʹrben sääʹmnuõri rool jiijjâs kulttuurâs äʹrbbvuõđlaž teâđ serddmõõžžâst da mättjummšest lij kõskksaž, ǥu samai sij juäʹtǩǩe kulttuursaž naaʹlid da suåvte tõid ânnʼjõžpeeiʹv vaʹǯǯtõõzzid.
Konfereeʹns väʹlddjäʹrjsteeʹjen tåimm Sääʹmteeʹǧǧ nuõrisuåvtõs. Nuõrisuåvtõs vaʹsttad nuõrisuåvtõõzz õhttvuõđâst jiõččânji tåimmai pååđ sääʹmnuõri konfereeʹns jäʹrjstummšest kueiʹt eeʹjj kõõskin leʹbe takai jeäʹrab määinast tän tääuʹjben. Sääʹmnuõri konfereʹnss vuäitt uʹvdded jiijjâs nõõmâst õõlmâsceälkkmõõžžid, eʹtǩǩõõzzid da alttõõzzid, kook õhttne sääʹmnuõri jieʹllemåårrmõõžžid da pueʹrrvââjjmõʹšše. Konfereʹnss lij määustem da ääv pukid sääʹmnuõrid.
Lââʹssteâđaid:
Nuõrisuåvtõõzz projeʹktt-tuâjjlaž
Lifu Torikka
Teʹl. 044 902 4833
lifu.torikka@samediggi.fi
Nuõrisuåvtõõzz konfereeʹns tuâjj-joouk saaǥǥjååʹđteeʹjj,
nuõrisuåvtõõzz väärrsaaǥǥjååʹđteeʹjj
Niila-Juhán Valkeapää
niila-juhan.valkeapaa@samediggi.fi
Nuõripiisar
Elli-Marja Hetta
teʹl. 050 382 5179
elli-marja.hetta@samediggi.fi
Nuõrisuåvtõõzz väʹlddtuâjjan lij viikkâd ooudårra sääʹmnuõri ǩiõlʼlaž da kulttuursaž vuõiggâdvuõđid da raaveed sääʹmnuõri kuullâmvuõđ sääʹmkulttuuʹre. Nuõrisuåvtõs valmštââll še tõid Sääʹmteeʹǧǧ ciâlklmid, aalǥtõõzzi da jeeʹres peäʹlestvälddmõõžžid, kook kueʹsǩǩe sääʹmnuõrid leʹbe sääʹmnuõri jieʹllemåårrmõõžžid.
