Sääʹmteʹǧǧ da Jeänõõǥǥ kåʹdd oouʹdee vuârrsaǥstõõllmõõžž õhttsažtuâjjvueiʹnnlõõttmõõžžâst
Sääʹmteʹǧǧ da Jeänõõǥǥ kåʹdd noorõʹtte õhttsaž õhttsažtuâjjpeivva Hettast. Vueiʹnnlõttmõõžžâst mõʹnneš ooudâsraajji vuârrsaǥstõõllmõõžž da ǩiõttʼtõʹlleš määŋgaid kuhttuid vueʹsspeäʹlid tääʹrǩes teeʹmaid õhttsažtuâj ooudâsviikkmõššân.
Jeänõõǥǥ kåʹddjååʹđteeʹjj Eero Ylitalo da Sääʹmteeʹǧǧ saaǥǥjååʹđteeʹj sâjjsaž Tuomas Aslak Juuso.
Jeänõõǥǥ kååʹdd da Sääʹmteeʹǧǧ eeʹttǩeeʹj vueiʹnnlõʹtte Hettast Jeänõõǥǥ kåʹddveʹrǧǧpõõrtâst seärad 1.4.2026. Vueiʹnnlõttmõõžž jõrddmõššân leäi õhttsažtuâj ooudâsviikkmõš da tobdsted õhttsaž ouddõsvuåppmõõžž äʹššpaaiʹǩid. Õhttsaž ouddõsvuåppmõõžž teeʹmmen kaʹǧǧeš jm. Lappi pueʹrrvââjjamvuuʹd kääzzkõõzzi tuõrvvmõš, Sääʹm ǩiõll-lääʹjj 31 § meâldla veäʹǩǩtieʹǧǧ raavummuš di poostvuʹvddǩeârddmõõžži tuõrvvmõõžž ooudummuš. Lââʹssen sääʹmǩiõllsaž nuõritåimmjummuž ooudâsviikkmõš Jeänõõǥǥâst vuõiʹnneš samai vääžnʼjen.
Peeiʹv poodd ǩiõttʼtõʹlleš še jeeʹres ääiʹjpoddsaž aaʹššin, mâta säʹmmlai vuõiggâdvuõđin da pueʹrr meerkõskkvuõđin, nuõriaaʹššin, mäddââʹnnem- da jieʹllemvueʹǩǩaaʹššin, turismmaaʹššin, sosiaal- da tiõrvâsvuõttaaʹššin, sääʹmǩiõllsaž õuddpeâmmast di jeeʹres ǩiõll- da škooultõsaaʹššin. Pooddâst saǥstõʹlleš lââʹssen õhttsaž ouddõsvuåppmõõžžâst da puõʹtti kommunikaatio pueʹrummuž.
– Peiʹvv leäi määŋgnalla samai aaʹšši mieʹldd oouʹdeei. Tõt taʹrjjii pueʹr vueiʹtlvažvuõđ ääv saǥstõõllmõʹšše da kõskknaž fiʹttjõõzz raavummša, kåʹddjååʹđteeʹjj Eero Ylitalo särnn.
– Takainalla miârktõõzzlaž peiʹvv tät leäi še muʹnne persoonlânji. Leäm puättam tän tuõjju jeeʹresåʹrnn, da sääʹmvuuʹd kååʹdd jååʹđtummuš lij muʹnne ođđ obbvuõtt, Ylitalo juätkk.
– Leäi vääžnai kuullâd vuäinlmid tõʹst, måkam aaʹššid tuʹmmstõõǥǥi valmštõõllmõõžžâst âlgg väʹldded lokku. Täi aaʹšši fiʹttjummuš lij õõudldõs vasttõõzzlaž da ǩeâllʼjeei tuʹmmstõktuõjju.
Ylitalo mieʹldd õhttsažtuâj miârktõs teäddââvv še ouddõsvuåppmõõžžâst. – Âânam vääžnʼjen, što ouddõsvuåppmõõžžâst ouddnep seämma pälggaz mieʹldd. Õhttsaž puʹtt da õhttsažtuâjj liâ puki ouddõs, son tuâtt.
– Ääv da ooudâsraajji saǥstõõllmõš lij vääžnai, što vueiʹttep kaunnâd õhttsaž räʹtǩǩummšid da raaveed õhttsažtuâj. Vueiʹnnlõõttmõš Jeänõõǥǥ kooʹddin taʹrjjii vueiʹtlvažvuõđ jieʹlled čõõđ miʹjjid kuhttuid vääžnai teeʹmaid da tääʹrǩted õhttsaž täävtõõzzid. Õhttsažtuâj juätkkmõš lij kõskksaž säʹmmlai vuõiggâdvuõđid di pueʹrr meerkõskkvuõđi ooudâsviikkmõššân vuuʹdest, särnn Sääʹmteeʹǧǧ saaǥǥjååʹđteeʹj sâjjsaž Tuomas Aslak Juuso.
Vueiʹnnlõõttmõʹšše vuässõʹtte Jeänõõǥǥ kååʹddest nuʹt ouddooumaž – ǥu veeʹrjtuõʹllʼjeeiorganisaatio õllʼjummõs njoonaš.
Saǥstõõllmõõžž vueiʹnnlõttmõõžžâst jååʹđti välddõõzz saaǥǥjååʹđteeʹjj Jarmo Näkkäläjärvi.
– Vueiʹnnlõttmõõžž toobdâlm leäi samai puârast ooudâsraajji, da saǥstõõllmõõžži mieʹldd kaaunim määŋgaid õõutsââʹjest oouʹdeei aaʹššid, särnn Näkkäläjärvi.
Sääʹmteeʹǧǧest pääiʹǩ âʹlnn vueiʹnnlõõttmõõžžâst leäi saaǥǥjååʹđteeʹj sâjjsaž Tuomas Aslak Juuso. Ougglõsõhttvuõđin vuässõʹtte Sääʹmteeʹǧǧ jeeʹres tåimmvuuʹdi veʹrǧǧtuâjjlažkååʹdd.
Lââʹssteâđaid
Jeänõõǥǥ kåʹdd:
Eero Ylitalo
HTM kåʹddjååʹđteeʹjj / kåʹdd-duumšeǩ
040-5704073
eero.ylitalo@enontekio.fi
Sääʹmteʹǧǧ:
Tuomas Aslak Juuso
Saaǥǥjååʹđteeʹj sâjjsaž
040 687 3394
tuomas.juuso@samediggi.fi
