Sääʹmteʹǧǧ õlmstâtt vuäppõõzz puärrsid sääʹm ouddpiõmmu ooʒʒõõttmõõžžâst

Vuäʹpstõõzz leät kaiʹbbjum kooʹddin jeäʹrben tõʹnt, što kõskksa jeäʹrdõõzz sääʹmǩiõl jieʹnnǩiõllân mainsteei päärnai ouddpeâmm da ǩiõllpieʹzzi kõõskâst leʹčči čiõlggsânji kaunnâmnalla seämma pääiʹǩest.

– Vuäʹpstõs lij vuäʹniǩ da kõõsktââv vuâđđaaʹššid. Lij teâđast vaiggâd noorrâd seämma-ääiʹj vuäʹnkânji da vueiʹtlva kääʹtteeʹl puk taarbšeei sääʹm ouddpiõmmu õhttneei aaʹššid, leša tuäiv mieʹldd puärraz käuʹnne vuäʹpstõõzz da tõʹst lij veäʹǩǩ sääʹm ouddpiõmmu ooʒʒõõđeen, tuâtt ǩiõllpieʹssohjjeei Niina Aikio-Siltala.

Vuäʹpstõs lij pieʹǩǩ šoorab obbvuõđ, koon täävtõssân lij õhttnâʹtted sääʹm ouddpeâmm vuõʹjjid da hiâlpted nuʹt ouddpeâmm jäʹrjsteeʹji ǥu ouddpeâmm tuâjjlažkååʹdd tuâj. Obbvuõʹtte koʹlle še kooʹddi âânnmõʹšše jurddum vuäʹpstõs saǥstõõllmõõžžâst, kååʹtt âlgg jieʹlled ooudbeäʹlnn pääiʹǩ miõttmõõžž sääʹm ouddpiõmmu. Kuhttu vuäʹpstõõzz liâ rajjum kooʹddi tuäivast.

Ǥu piâr ååcc pääiʹǩ sääʹm ouddpeâmmast, ooudbeäʹlnn piârrjin saǥstõõlât, koon täävtõssân lij kaunnâd jiijjad piârrja suåppi ouddpeâmm.

– Tät vueʹǩǩ lij leämmaž âânnmõõžžâst juõʹǩǩ kååʹddest juʹn ääiʹjben, leša ååʹn šâdd pukin âânnmõʹšše seämma vuâđđ saǥstõõllmõõžžid da nääiʹt siiskõs lij pukin kooʹddin seämmanallšem. Saǥstõõllmõš mõõnât ouddâl ouddpeâmmpääiʹǩ miõttmõõžž, što piârri kääzzkõstaarbâst vuäǯǯat pueʹrr kartt juʹn ouddâl ouddpeâmm alttummuž, särnn Aikio-Siltala

Kuälmten obbvuõttân Sääʹmteʹǧǧ puätt raajjâd sääʹm ouddpeâmm pedagoogla liʹnjjʼjummuž. Liʹnjjʼjummuž puäʹtte tåimmad jeäʹrben sääʹm ouddpeâmm tuâjjlažkååʹdd tuärjjmateriaalân da tõi täävtõssân lij vuässas õhttnâʹtted sääʹm ouddpeâmm pedagogikk pukin juâkksin.

Lââʹssteâđ

Niina Aikio-Siltala

Ǩiõllpieʹssohjjeei
040 487 5414 / 010 839 3115
niina.aikio-siltala@samediggi.fi