Sääʹmteʹǧǧ jääʹrjast saǥstõõllâmrääid nuõrttsääʹmǩiõl vueʹjjest

Saǥstõõllmõõžžid tuäivat mieʹldd toiʹmmjeeʹjid, ǩeäin miõll ǩeäss õõuʹdeed nuõrttsääʹmǩiõl vueʹjj leʹbe tuejjee ǩiõʹlle kuulli aaʹššivuiʹm. Nuõrttsääʹmǩiõllsai kääzzkõõzzi õõʹnni, ǩiõllmainsteei da takaioummu lie še tiõrvpuättam.

Saǥstõõllâmräidd lij vueʹssen Sääʹmteeʹǧǧ ǩiõllpoliittlaž toiʹmmjem- da õõuʹdeemprograammâst iiʹjjid 2025–2027. Sääʹmteeʹǧǧ tiuddsååbbar lij piijjâm vaalpââʹj kuʹǩes äiʹǧǧkõõsk tåimman nuõrttsääʹm jeälltummuž, raavummuž da õõudummuž. Sääʹmteeʹǧǧ vuäinnmõõžž mieʹldd nuõrttsääʹm vueʹǩǩ čårran aanar- da tâʹvvsääʹm vueʹjjest da õõlǥat jeeʹrab tååimaid tõn jeälltem õuʹdde. Vaʹǯǯtõsân lij tobdstum tõt, što nuõrttsääʹmǩiõl jälltummuž leʹbe veiddsõbân ǩiõllplaanmõõžž ij koordinââʹst ni kååʹtt vueʹsspieʹll systemaattlânji. Tõndiõtt Sääʹmteʹǧǧ haaʹlad ååʹn kåččad jeeʹres toiʹmmjeeʹjid saǥstõõllâd, mäʹhtt nalla nuõrttsääʹm jälltemtuâjast vuäitčet õuddned. Saǥstõõllmõõžžin noorât mošttsid, kooi vuâđald nuõrttsääʹmǩiõl õõuʹdeemtuâj jueʹtǩet Sääʹmteeʹǧǧest.

Vuõssmõsân da tääʹrǩmõs äʹššen valmštõõllâmtuâjast vuõiʹnneš nuõrttsääʹm õuddpeâmm da mättʼtõõzz vueʹjj õõudâsviikkmõõžž. Ääʹšš lie vaʹlljʼjõõvvâm Sääʹmteeʹǧǧ, Saaʹmi siidsåbbar da Sääʹmkulttuurfoond kõskksaž valmštõõlli saǥstõõllmõõžžin. Vueʹlnn käunnʼje teâđ saǥstõõllmõõžži aaʹššin da õhttnemliiŋk. Saǥstõõllmõõžžid vuässõõttmõʹšše jeät taarbšuku jeeʹrab iʹlmmtõõttmõõžž, tåʹlǩ Čeʹvetjääuʹrest jäʹrjstum âʹlddkaaunõõttmõʹšše âlgg iʹlmmtõõttâd. Teâđtõõzz peeiʹvtet tõn mieʹldd, ǥu lij teâtt pukin mainsteeʹjin.

Saǥstõõllmõõžži teeʹm:

1. Nuõrttsääʹmǩiõllsaž õuddpeâmm

29.4.2025 čiâss 14.30–16.00 Teams pääiʹǩ: Õhtteemliŋkk

Saǥstõõllmen Aanar kååʹdd õuddpeâmmjååʹđteei Pirkko Saarela, õuddpeâmmjuâkkaz jååʹđteei Krista Leivo da Sääʹmteeʹǧǧ ǩiõllpieʹssohjjeei Niina Aikio-Siltala. Saǥstõõllmõõžž fasilitâstt Sääʹmteeʹǧǧ ǩiõllstaanpiisar Anne Kirste Aikio.

2. Nuõrttsääʹmǩiõll vuâđđ- da lookkjiškooulmättʼtõs

19.5.2025 12–14 Teams pääiʹǩ: Õhtteemliŋkk

Saǥstõõllmõõžžâst mieʹldd: Aanar kååʹdd eeʹttkõsʹtti, Sääʹmteeʹǧǧest Bigga-Helena Magga škooultõspiisar, Petra Kuuva mättmateriaalpiisar, Anne Olli, haʹŋǩǩõskoordinaattor, sääʹmǩiõli ougglõsmättʼtõõzz pilotthaʹŋǩǩõs, Satu Pieski AVI, Anna-Katariina Feodoroff, Sääʹmkulttuurfondd. Saǥstõõllmõõžž fasilitâstt ǩiõllstaanpiisar Anne Kirste Aikio.

Saǥstõõllâm ǩiõll lij lääʹddǩiõll, leša saǥstõõllmen vuäitt nuʹtt haaʹleen ââʹnned  tâʹvv-, aanar- leʹbe nuõrttsääʹmǩiõl.

3. Ǩiõllteknologia

11.6.2025 14–16 Teams pääiʹǩ: Õhtteemliŋkk

Saǥstõõllmõõžžâst mieʹldd: Jack Rueter: universiteʹtt-tuʹtǩǩeei, Heʹlssen universiteʹtt; Kristiina Ojala: näggtõsǩeʹrjjtuʹtǩǩeei, Heʹlssen universiteʹtt; Miika Lehtinen: nuõrttsääʹm universiteʹttuʹčteʹl, Giellagas-institutt/Oulu universiteʹtt; Mikko Kurimo: professor, Aalto-universiteʹtt; Pigga Keskitalo: professor, Lappi universiteʹtt; Sjur Nørstebø Moshagen: Divvun-joouk jååʹđteei, Trooms universiteʹtt; Tauno Ljetoff: nuõrttsääʹmǩiõl raʹvvjeei, Sääʹm Ǩiõllkaʹlddi; Trond Trosterud: Giellatekno-tuʹtǩǩeemjoouk jååʹđteei, Trooms universiteʹtt.

Saǥstõõllmõõžž fasilitâʹstte ǩiõllstaanpiisar Anne Kirste Aikio da ǩiõllaaʹššipiisar Marko Marjomaa

4. Ǩiõlltoobdâlm saǥstõõllâmpodd Čeʹvetjääuʹrest 4.9.2025 čiâss 18–20

Saǥstõõllâmpodd jäʹrjstet Čeʹvetjääuʹrest da päiʹǩǩen lij Sääʹmkultturfoond Siid kueʹtt leʹbe Kylän kota. Saǥstõõllâmpoodd ââʹnet âʹlddnoorõõttmõššân da tõõzz ij vueiʹt vuässõõttâd ougglõsõhttvuõđin.

Pooddâst saǥstõõlât nuõrttsääʹmǩiõʹlle õhttneei ǩiõlltoobdâlm pirr leʹbe jeäʹrbi mieʹldd måkam tobddi kaggâʹtte, mäʹhtt šiõhttlõõđât ǩiõʹlle da måkam vuäinlmõõžž liâ nuõrttsääʹmǩiõl årra.

Ǩieʹssjen saǥstõõllâmpooddâst lij Uuvj – Uvjâ – Uvja leʹbe sääʹm psykososiaalʼlaž tueʹrj juâkkaz eeʹttkõʹstti da Sääʹmteeʹǧǧ ǩiõllkonttâr eeʹttkõõʹsti. Saǥstõõllmõõžžâst vuäitt ââʹnned Lääʹddjânnmest jieʹlli sääʹmǩiõlid da lääʹddǩiõl.

Saǥstõõllâmpoʹdde ij taarbâž iʹlmmtõõttâd ooudbeäʹlnn da pooddâst taʹrjjeet porrmõš da kååʹff. Porrmõš älgg čiâss 17.30. Vaiddlep, što jeäʹp vueʹjjest ǩiõččeeʹl vueiʹt väʹldded veärr-rääʹjtummšid lokku.

Saǥstõõllâmpoʹdde ǩiččlõõđât vueiʹtlvažvuõđi mieʹldd jäʹrjstet sätt Čeʹvetjääuʹr âʹlddvuuʹdin. Vuäitak iʹlmmted säätt taarbšeen sääʹm ǩiõllaaʹššipiisar Marko Marjomaa neʹttpååʹšta marko.marjomaa@samediggi.fi Iʹlmmtõõzzâst âlgg leeʹd nõõmad lââʹssen teʹlfon-nââmar da addrõs/päiʹǩǩ, koʹst taarbšak säätt. Vuäitak iʹlmmtet sätt-taarbâst še teʹlfon-nââmra 050 438 2484. Iʹlmmet, jõs taarbšak säätt da kuuitâǥ mââimõõzzâst 1.9.2025.

Pooddâst jääʹǩǩtet Sääʹmteeʹǧǧ nuõrisuåvtõõzz raajjmid staanni sââʹj vuäppõõzzid, koʹst ciʹsttjet da jeät neeuʹrtuku nuuʹbbid.

Tiõrv pueʹttem!

5. Ǩiõlltoobdâlm saǥstõõllâmpodd Âʹvvlest 24.9. čiâss 18-20

Saǥstõõllâmpodd jäʹrjstet Törmäsest da päiʹǩǩen lij Törmänen keidas kueʹtt. Saǥstõõllâmpoodd ââʹnet âʹlddnoorõõttmõššân da tõõzz ij vueiʹt vuässõõttâd ougglõsõhttvuõđin.

Pooddâst saǥstõõlât nuõrttsääʹmǩiõʹlle õhttneei ǩiõlltoobdâlm pirr leʹbe jeäʹrbi mieʹldd måkam tobddi kaggâʹtte, mäʹhtt šiõhttlõõđât ǩiõʹlle da måkam vuäinlmõõžž liâ nuõrttsääʹmǩiõl årra.

Ǩieʹssjen saǥstõõllâmpooddâst lij Uuvj – Uvjâ – Uvja leʹbe sääʹm psykososiaalʼlaž tueʹrj juâkkaz eeʹttkõʹstti da Sääʹmteeʹǧǧ ǩiõllkonttâr eeʹttkõõʹsti. Saǥstõõllmõõžžâst vuäitt ââʹnned Lääʹddjânnmest jieʹlli sääʹmǩiõlid da lääʹddǩiõl.

Saǥstõõllâmpoʹdde ij taarbâž iʹlmmtõõttâd ooudbeäʹln.

Pooddâst jääʹǩǩtet Sääʹmteeʹǧǧ nuõrisuåvtõõzz raajjmid staanni sââʹj vuäppõõzzid, koʹst ciʹsttjet da jeät neeuʹrtuku nuuʹbbid.

Tiõrv pueʹttem!

6. Konkreettlaž ǩiõllpirrõõzzi õõuʹdummuš

7.10.2025 12–14 Teams pääiʹǩ: Õhtteemliŋkk

Saǥstõõllmõõžžid jäʹrjstet õhttsažtuâjast Saaʹmi siidsåbbrin da Sääʹmkulttuurfoondin.

Lââʹssteâđ:

Anne Kirste Aikio, ǩiõllstaanpiisar
anne-kirste.aikio@samediggi.fi

Marko Marjomaa, ǩiõllaaʹššipiisar
marko.marjomaa@samediggi.fi

Niina Aikio-Siltala, ǩiõllpieʹssohjjeei
niina.aikio-siltala@samediggi.fi