Sajoozzâst juuʹhlʼjet oođuum sääʹmteʹǧǧlääʹjj da eeʹǩǩlooʹjji tuâj – juhʹllpodd lij ååʹn jååʹttmen

Juʹhllpodd lij älggam Lääʹdd, Taarr da Ruõcc Sääʹmteeʹǧǧ saakkvuârain di jeäʹrbi mieʹldd tääʹssvääʹld presideeʹnt, mättʼtõsministeria da europarlameʹnttneǩ Anna-Maja Henriksson tiõrvʼvuõđin. Lââʹssen leäʹp kuullâm äʹrbbvuõđlaž sääʹm-musiikk.

Lääʹdd Sääʹmteeʹǧǧ saaǥǥjååʹđteejj Pirita Näkkäläjärvi späʹssbõõžži saaǥǥvuârstes sääʹm-meer da säʹmmlai taaurõõžžid siʹtǩǩesvuõđâst da väimmšõsvuõđâst.

– Sääʹmteʹǧǧlääʹjj oođummuš lij leämmaž sääʹmõutstõõzz jõnn õhttsaž tuâjj da vääiv-vuäinnmõš, koozz mõõni looppâst 30 eeʹǩǩed. Lääʹǩǩ lij ååʹn oođuum, kuʹǩes sträšnn lij rääj da tõn mieʹtt nueʹđđ lij meädda pueʹtti puõlvvõõǥǥi aʹrddjin, saaǥǥjååʹđteeʹjj Näkkäläjärvi säärnai.

Saaǥǥjååʹđteeʹjj Näkkäläjärvi âânn meeraikõskksaž ooumažvuõiggâdvuõttsuåppmõõžžid räʹtǩǩeeʹjen sääʹmteʹǧǧlääʹjj oođummšest.

– Jeäʹp leʹčči tän rääʹjest krååʹma ÕM Lääʹddjânnma uʹvddem viõrrleei räʹtǩǩummšid Sääʹmteeʹǧǧ vaal-loǥstõõǥǥâst. Lääʹdd riikkâst leäi ååʹn päkk tuejjeed mâid-ne. Meeraikõskksaž vuõiggâdvuõtt da vuâkkõsvuâđđsaž riâžldõk liâ uuʹcces meerai da jânnmi ouddõs, saaǥǥjååʹđteeʹjj Näkkäläjärvi mušttʼti.

Tääʹssvääʹld presideʹntt Alexander Stubb säärnai johlla vuõltteem tiõrvʼvuõđâst, što säʹmmlai vuâđđlääǥǥlaž spesiaalsââʹj käddmõš alggmeeran lij mij puki õhttsaž tuâjjam.

– Kuuʹǩǩ vuõrddum ođđ sääʹmteʹǧǧlääʹǩǩ lij puättam viõʹǩǩe. Täävtõssân lij, što tõn mieʹtt säʹmmlai jiõččmieʹrreemvuõiggâdvuõđ čõõđ viikkmõš di sääʹmkulttuur jiõččmääinlaž ooudâsviikkmõš pââʹstet juätkast ääiʹjab pueʹrben tuõrvvâd, presideʹntt Stubb säärnai.

– Sääʹmteeʹǧǧ tåimmjummuš lij kõskksaž vueʹss säʹmmlai jiõččvaaldâšm da vuõiggâdvuõđi čõõđviikkmõõžž tuõrvvmõõžž. Sääʹmteeʹǧǧ da veʹrǧǧniiʹǩǩi vuârrsaaǥǥ juätkkjemvuõđâst di säʹmmlai kuullmõõžžâst tuʹmmstõktuâjast âlgg huõl ââʹnned pukin õhttsažkååʹdd taaʹzzin, presideʹntt Stubb säärnai.

Lääʹdd riikk tiõrvʼvuõđ johlla puuʹti mättʼtõsminister Anders Adlercreutz. Mättʼtõsminister Adlercreutz säärnai saakkvuârast, što saǥstõõllâm-mõõntõõllmõõžži beäʹlnn räʹtǩǩeei ij leäkku tåʹlǩ, mii paragraaffin lååkk – pâi mäʹhtt toiʹmmjep. Jeäʹrben tät kuâskk veʹrǧǧniiʹǩǩi da Sääʹmteeʹǧǧ kõskksaž õhttsažtåimmʼmõõžž- da saǥstõõllâm-mõõntõõllmõõžž.

– Lääʹjjest šiõtteet ääiʹjab tääʹrǩben mõõntõõllmõõžžâst, koin ǩiččlõõđât tuõrvvâd säʹmmlai vuõiggâdvuõtt vuässõõttâd da vaaikted jiijjâs kuõskki aaʹššid. Tuõttlaž saǥstõõllmõš õõlǥat kuuitâǥ jeänab. Vuõigg saǥstõõllmõš õõlǥat kuvddlummuš, vuõiggmiõllsaž miõl da haal kaunnâd õhttsaž räʹtǩǩummšid še tâʹl, ǥu tõt veekk ääiʹj, mättʼtõsminister Adlercreutz säärnai.

Jiijjâs tiõrvʼvuõđâs johlla puuʹti še europarlameʹnttneǩ Anna-Maja Henriksson. Son tååimai ääiʹjben vuõiggâdvuõttministren da leäi mieʹldd sääʹmteʹǧǧlääʹjj oođummšest vaalpââʹj ääiʹj.

– Čõõđ ääiʹj lij leämmaž kõõččmõš säʹmmlai jiõččmieʹrreemvuõiggâdvuõđ ciʹsttjummšest da nåkam lääʹjj šiõttummšest, kååʹtt ij leäkku risttreeidast Lääʹddjânnam čõõnni meeraikõskksaž õõlǥtõõzzivuiʹm, europarlamentaarneǩ Henriksson säärnai.

– Leäm še samai rämmai ǥu leäm vuäǯǯam juäʹtǩǩed õhttsažtuâj tijvuiʹm Euroopp parlameeʹnt vuäzzliʹžžen. Euroopp oʹdinakai alggmeeran tij vuõiggâdvuõđid âlgg raaveed še Euroopp tääʹzzest. Tij mieʹldd åårrmõš še Euroopp parlameeʹntest da Brysseeʹlest âlgg oouʹdeed, Henriksson jueʹtǩi.

Juʹhllpooddâst liâ kullum lââʹssen Taarr da Ruõcc Sääʹmteeʹǧǧ eeʹttǩeeʹji saakkvuâr. Saaǥǥin leät teädduum säʹmmlai õhttsažtuâj miârktõõzz säʹmmlai vuõiggâdvuõđi ooudâsviikkmõõžžâst rââst riikkraaji di õhttsaž vaʹǯǯtõõzzid.

Jeäʹǩǩespeeiʹv programm juätkkai paneeʹlsaǥstõõllmõõžžin, koon moderâstt Suvi West. Paneeʹlest mušttlet sääʹmteʹǧǧlääʹjj oođeemproseeʹssest da piijât ǩicstõs lääʹjj tiuʹddepiijjmõʹšše.

Podd põõtt čiâss 15.30 õhttsaž kååʹffpoʹdde Sajoozzâst, da juʹhllpeiʹvv pâjjan jeäʹǩǩää Sajoozz auditorio Dollast jäʹrjstem Ulla Pirttijärvi & Ulda -bääʹnd konsertta. Jeäʹǩǩeskonseʹrtt lij ääv pukid di ij kaiʹbbe ouddiʹlmmtõõttmõõžž.. Pääiʹǩ liâ rääʹjteld da tõid tiiudât pueʹttemjäʹrjstõõzzâst, tõʹnt pääiʹǩ ool kaʹnnat pueʹtted ääiʹjeld.

• Peeiʹv prograamm vuäitt seuʹrrjed ougglõsõhttvuõđin tuʹlǩǩummšin addrõõzzâst: https://us06web.zoom.us/j/84081619667
• Konseeʹrt vuäitt seuʹrrjed addrõõzzâst: www.sajos.fi/live
• Saakkvuâraid da tiõrvʼvuõđid vuäitt lookkâd Sääʹmteeʹǧǧ dokumeʹnttbaaŋkâst.

Juʹhllpoodd jiõntõõzz liâ ǩiõččâmnalla kueiʹt neäʹttel ääiʹj juʹhllpoodd mâŋŋa. Liiŋk jiõntõõzzid õlmstââʹttet mâʹŋŋlubust Sääʹmteeʹǧǧ neʹttseeidain da sosiaalʼlaž media kanaalin.

Lââʹssteâđaid

Näkkäläjärvi Pirita
Saaǥǥjååʹđteeʹjj
044 7533 766

Saara-Maria Salonen
saara-maria.salonen@samediggi.fi
044 739 4007

Johanna Alatorvinen
Saaǥǥtempiisar
040 663 4493
johanna.alatorvinen@samediggi.fi