Tuomas Aslak Juuso EMRIP-išttmõõžžâst Genevest: sääʹmteʹǧǧlääʹjj oođummuš da alggmeerai vuässõõttâmvuõiggâdvuõđ ravvummuš oouʹdee ooumažvuõiggâdvuõđi teâuddjummuž
Sääʹmteeʹǧǧ II väärrsaaǥǥjååʹđteei Tuomas Aslak Juuso vuässõõđi sueiʹnnmannu 13.–17. peeiʹv Genevest riâššum ÕM:i alggmeerai vuõiggâdvuõđid ǩiõttʼtõõlli äʹšštobddimekaniism (EMRIP) juõʹǩǩekksaž išttmõʹšše. Sääʹmteʹǧǧ späʹssbõõžži saakkvuâraines EMRIP tuärj sääʹmteʹǧǧlääʹjj oođummšest.
- EMRIP tuärjj Sääʹmtegga lij leämmaž vääžnai lääʹǩǩoođummuž jeeʹres maaʹttin. Tõn äʹšštobddmõš lij ravvääm fiʹttjõõzz ÕM:i alggmeerai vuõiggâdvuõđi čõõđtõõzzâst da tõn suåvldummšest. Sääʹmteʹǧǧlääʹjj oođummuš lij miârkteei läuʹǩǩ säʹmmlai jiõččmieʹrreemvuõiggâdvuõđ ravvummšest Lääʹddjânnmest, tuâtt Juuso.
Juuso kaaggi ouʹdde kõskksaž sakknes išttmõʹšše alggmeerai vuässõõttâmvuõiggâdvuõđ ravvummuž ÕM:i tuâjast. Vuässõõttâmvuõiggâdvuõđâst leät vuällam puäđõõzzid, leâša tuâjj juätkkai õinn.
- ÕM:in leät juʹn vuällam tääʹrǩes ouddnemlaauʹǩid alggmeerai vuässõõttâmvuõiggâdvuõđ ravvummšest. Ååʹn lij vääžnai juäʹtǩǩed tuâj da altteed saǥstõõllmõõžžid tõʹst, mäʹhtt alggmeerai jiijjâz oudstemorgaanid vueiʹtet staaneed põõšši da čiõlgg vueiʹttemvuõđid vuässõõttâd ÕM:i ooumažvuõiggâdvuõttsuåvtõõzz tuõjju. Vuässõõttmõš âlgg vuâđđõõvvâd tõõzz, što alggmeer vuäiʹtte leeʹd mieʹldd jiijjâz, jiijj vaʹlljeem oudsteeʹji pääiʹǩ, teäddad Juuso saakkvuârstes.
EMRIP lij ÕM:i ooumažvuõiggâdvuõttsuåvtõõzz vuâllsaž äʹšštobddiorgaan, kååʹtt tuärjjad riikkid da alggmeeraid ÕM:i alggmeerčõõđtõõzz toimmupiijjmõõžžâst. Sääʹmteʹǧǧ âânn vääžnʼjen vuârrmainstummuž da õhttsažtuâj juätkkmõõžž EMRIP:in.
Tuomas Aslak Juuso
II väärrsaaǥǥjååʹđteei
Sääʹmteʹǧǧ
