Saǥstõõllâmräidd nuõrttsääʹmǩiõl vueʹjjest: Ǩiõlltoobdâlm saǥstõõllâmpodd Čeʹvetjääuʹrest
Sääʹmteʹǧǧ kåčč saǥstõõllâd nuõrttsääʹmǩiõl vueʹjj da õõuʹdeem diõtt. Saǥstõõllmõõžži täävtõsân lij noorrâd jeeʹres toiʹmmjeeʹjid õʹhtte smiõttâd čåuddmõõžžid, koivuiʹm ǩiõl vueʹjj vuäitči pueʹreed õhttsažtuâj da ânnʼjõž resuursi veäkka. Saǥstõõllmõõžžin täävtõsân lij ǩiõččâd õõudårra čåuddmõš miõlâst. Taarb mieʹldd ääʹšš ǩiõttʼtõõllmõõžž altteet ânnʼjõž vueʹjj kaartʼtummšin.
Snimldõk: Tarmo Lehtosalo / Sääʹmkulttuurfondd.
4. Ǩiõlltoobdâlm
4.9.2025 18–20 Âʹlddkaaunõõttmõš Čeʹvetjääuʹrest.
Saǥstõõllâmpodd jäʹrjstet Čeʹvetjääuʹrest da päiʹǩǩen lij Sääʹmkulttuurfoond Siid kueʹtt leʹbe Kylän kota. Saǥstõõllâmpoodd ââʹnet âʹlddnoorõõttmõššân da tõõzz ij vueiʹt vuässõõttâd ougglõsõhttvuõđin.
Pooddâst saǥstõõlât nuõrttsääʹmǩiõʹlle õhttneei ǩiõlltoobdâlm pirr leʹbe jeäʹrbi mieʹldd måkam tobddi kaggâʹtte, mäʹhtt šiõhttlõõđât ǩiõʹlle da måkam vuäinlmõõžž liâ nuõrttsääʹmǩiõl årra.
Ǩieʹssjen saǥstõõllâmpooddâst lij Uuvj – Uvjâ – Uvja leʹbe sääʹm psykososiaalʼlaž tueʹrj juâkkaz eeʹttkõʹstti da Sääʹmteeʹǧǧ ǩiõllkonttâr eeʹttkõõʹsti. Saǥstõõllmõõžžâst vuäitt ââʹnned Lääʹddjânnmest jieʹlli sääʹmǩiõlid da lääʹddǩiõl.
Saǥstõõllâmpoʹdde ij taarbâž iʹlmmtõõttâd ooudbeäʹlnn da pooddâst taʹrjjeet porrmõš da kååʹff. Porrmõš älgg čiâss 17.30. Vaiddlep, što jeäʹp vueʹjjest ǩiõččeeʹl vueiʹt väʹldded veärr-rääʹjtummšid lokku.
Saǥstõõllâmpoʹdde ǩiččlõõđât vueiʹtlvažvuõđi mieʹldd jäʹrjstet sätt Čeʹvetjääuʹr âʹlddvuuʹdin. Vuäitak iʹlmmted säätt taarbšeen sääʹm ǩiõllaaʹššipiisar Marko Marjomaa neʹttpååʹšta marko.marjomaa@samediggi.fi Iʹlmmtõõzzâst âlgg leeʹd nõõmad lââʹssen teʹlfon-nââmar da addrõs/päiʹǩǩ, koʹst taarbšak säätt. Vuäitak iʹlmmtet sätt-taarbâst še teʹlfon-nââmra 050 438 2484. Iʹlmmet, jõs taarbšak säätt da kuuitâǥ mââimõõzzâst 1.9.2025.
Pooddâst jääʹǩǩtet Sääʹmteeʹǧǧ nuõrisuåvtõõzz raajjmid staanni sââʹj vuäppõõzzid, koʹst ciʹsttjet da jeät neeuʹrtuku nuuʹbbid.
Tiõrv pueʹttem!
Looǥǥ lââʹzz: Sääʹmteʹǧǧ jääʹrjast saǥstõõllâmrääid nuõrttsääʹmǩiõl vueʹjjest
Saǥstõõllmõõžžid tuäivat mieʹldd toiʹmmjeeʹjid, ǩeäin miõll ǩeäss õõuʹdeed nuõrttsääʹmǩiõl vueʹjj leʹbe tuejjee ǩiõʹlle kuulli aaʹššivuiʹm. Nuõrttsääʹmǩiõllsai kääzzkõõzzi õõʹnni, ǩiõllmainsteei da takaioummu lie še tiõrvpuättam.
Saǥstõõllâmräidd lij vueʹssen Sääʹmteeʹǧǧ ǩiõllpoliittlaž toiʹmmjem- da õõuʹdeemprograammâst iiʹjjid 2025–2027. Sääʹmteeʹǧǧ tiuddsååbbar lij piijjâm vaalpââʹj kuʹǩes äiʹǧǧkõõsk tåimman nuõrttsääʹm jeälltummuž, raavummuž da õõudummuž. Sääʹmteeʹǧǧ vuäinnmõõžž mieʹldd nuõrttsääʹm vueʹǩǩ čårran aanar- da tâʹvvsääʹm vueʹjjest da õõlǥat jeeʹrab tååimaid tõn jeälltem õuʹdde. Vaʹǯǯtõsân lij tobdstum tõt, što nuõrttsääʹmǩiõl jälltummuž leʹbe veiddsõbân ǩiõllplaanmõõžž ij koordinââʹst ni kååʹtt vueʹsspieʹll systemaattlânji. Tõndiõtt Sääʹmteʹǧǧ haaʹlad ååʹn kåččad jeeʹres toiʹmmjeeʹjid saǥstõõllâd, mäʹhtt nalla nuõrttsääʹm jälltemtuâjast vuäitčet õuddned. Saǥstõõllmõõžžin noorât mošttsid, kooi vuâđald nuõrttsääʹmǩiõl õõuʹdeemtuâj jueʹtǩet Sääʹmteeʹǧǧest.
Saǥstõõllmõõžžid jäʹrjstet õhttsažtuâjast Saaʹmi siidsåbbrin da Sääʹmkulttuurfoondin.
Lââʹssteâđ:
Anne Kirste Aikio, ǩiõllstaanpiisar
anne-kirste.aikio@samediggi.fi
Marko Marjomaa, ǩiõllaaʹššipiisar
marko.marjomaa@samediggi.fi
Niina Aikio-Siltala, ǩiõllpieʹssohjjeei
niina.aikio-siltala@samediggi.fi
