Eettisij ravvui toimâorgaan
Sämitige ohtâvuođâst tuáimá eettisij ravvui toimâorgaan, mii rävvee já kocá Sämitige eettisij ravvui olášuttem. Toimâorgaan seelvât, árvuštâl já čuávu iärásij juávhust epiášálii kohtâlmân lohtâseijee aasijd Sämitige puoh tooimâst. Toimâorgaan tuálvu táárbu mield ääši stiivrâ já tige čuákkim kieđâvuššâmnáál. Toimâorgaan raportist toimâinis stiivrân já Sämitige čuákkimân.
Eettisij ravvui tárguttâs
Eettisij ravvui ulmen lii turviđ Sämitige tooimâ eettisâšvuođâ. Eettisiih ravvuuh adeleh vuáđu luáttámušân, lasetteh áárvust anneem, siskáldâs ohtâlâsvuođâ já ohtâvuođâ toollâm. Ravvuuh meid adeleh torvo talle, ko toimâ árvuštâlloo. Ravvui ulmen lii jieijâs uásild uápistiđ, maht valjiđ eettisávt olmâ toimâvuovijd já maht estiđ muuneeld epiášálii lattim já hemâdâs já táárbu mield toimâđ toi háárán. Tárguttâssân lii nonniđ tom, ete ääših kieđâvuššojeh Sämitiggeest ášálávt, kunnijâtteht já ääši vaattâm tuotâvuođáin já čonâdâtmáin.
Sämitige ovdâsteijeeh, luáttámušulmuuh já pargeeh
- Nuávditteh eettisij ravvui áárvuid já noormâid.
- Nuávditteh laavâid, asâttâsâid já miärádâsâid sehe kunnijâtteh Sämitige miärádâsâid.
- Láá tiäđuliih sämikulttuur já eellimvyevi maaŋgâhámásâšvuođâst.
- Tuáimih tienuuvt, ete Sämitigge annoo áárvust já ete tiätu já ibárdâs sämmilij aššijd já sämisiärváduv kuáttá lassaan.
- Viggeh velttiđ tiilijd, moh sättih tovâttiđ ruossâlâsvuođâid Sämitige hiäđui já persovnlij ohtâvuođâi kooskâst.
- Iä tuhhii olssis, perrui tâi eres aldaulmuid lohtâseijee eromâš ekonomâlijd tâi eres hiäđuid, main puáhtá anneeđ, ete toh vaigutteh tâi moh pyehtih vaiguttiđ poolitláid toimáid tâi miärádâssáid.
- Iä adde priivaatlávt lopádâsâid, maid Sämitigge ij pyevti laavâst miäruštâllum pargoidis siste olášuttiđ.
- Kunnijâtteh luáttámušlijd tiäđuid, maid láá uážžum tiätusis Sämitige aašij kieđâvuššâm ohtâvuođâst, já ete iä kuássin keevti luáttámušlijd tiäđuid persovnlij hiäđui juksâmân tâi iärásij vahâgitmân.
- Visásmiteh, ete puoh tiäđuh, moh lohtâseh Sämitige tooimân láá olmâ já lyetittettee.
- Čäittih huolâlâšvuođâ já kuáhtulâšvuođâ ekonomâlijn aašijn já Sämitige omâduv kuáttá.
- Iä aasât Sämitige haldâttâhân vátámâšâid, moh iä kulluu sii pargoid já kenigâsvuođáid, čäittih áárvust anneem pargei já sii áámmáttááiđu kuáttá sehe kieđâvušeh máhđulii tutâmettumvuođâs njuolgist haldâttuvváin.
- Tiäđušteh já väldih huámmášumán eres ovdâsteijei iäruid uáivilijn já hárjutteh konstruktiivlii kriitiik ääšimiäldásii kanavij peht ovdâsvástádâslávt.
Sämitiggeest ij tuhhiittuu mongin tilálâšvuođâst já tiilijn hemâdem, epiášálii lattim tâi epiášálii sárnum. Sämitiggeest lii pargotorvolâšvuotâlaahân sehe oovtviärdásâšvuotâlaahân já täsiárvulaahân vuáđuduvvee kenigâsvuotâ toimâđ epiášálii lattim já hemâdem tiilijn.
