Eettlaž vuäppõõzzi tåimmorgaan
Sääʹmteeʹǧǧ õhttvuõđâst tåimm eettlaž vuäppõõzzi tåimmorgaan, kååʹtt vuäʹppast da vuäpp Sääʹmteeʹǧǧ eettlaž vuäppõõzzi tiuʹddepiijjmõõžž. Tåimmorgaan seʹlvvat, ärvvtââll da seuʹrrai jeäʹrbi mieʹldd pannvueʹǩǩšõs âânnmõʹšše kuõskki aaʹššid pukin Sääʹmteeʹǧǧ toiʹmmjummšin. Tåimmorgaan veekk taarbšeen ääʹšš halltõõzz da teeʹǧǧ såbbar ǩiõttʼtõõllâmnalla. Tåimmorgaan raportâstt tååimaineez halltõʹsse da sääʹmteeʹǧǧ såbbra.
Eettlaž vuäppõõzzi miârktõs
Eettlaž vuäppõõzzi täävtõssân lij tuõrvvâd Sääʹmteeʹǧǧ toiʹmmjummuž eettlažvuõtt. Eettlaž vuäppõõzz räjja vuâđ luõʹttjummša, lââʹzzte äärv ouddmõõžž, seʹst åårrai õhttnažvuõđ da kõskknaž kõskknažvuõđ. Vuäppõõzz räʹjje še tuõrv tâʹl, ǥu toiʹmmjummuž ärvstõõlât. Vuäppõõzzi miârktõssân lij peäʹlstes vuäʹpsted, mäʹhtt vaʹlljeed eettlânji vuõigg toiʹmmjemnaaʹlid da õõudbeäʹlnn cõggâd pannvueʹǩǩšõs jälstõõttmõõžž da heâmmummuž da taarbšeen kässjõõttâd tõid. Miârktõssân lij raaveed tõn, što aaʹššid ǩiõttʼtõõlât Sääʹmteeʹǧǧest vueʹǩǩšanja, ärvvsânji da ääʹšš õõlǥtem tuõđâsvuõđin da čõnnõõttmõõžžin.
Sääʹmteeʹǧǧ eeʹttǩeeʹj, ouddoummu da tuâjjla
- Jääʹǩǩte eettlaž vuäppõõzzi äärvaid da noormid.
- Jääʹǩǩte laaʹjjid, asetõõzzid da meärrõõzzid di ciʹsttje Sääʹmteeʹǧǧ tuʹmmstõõǥǥid.
- Teäʹtte sääʹmkulttuur da jieʹllemnääʹl määŋghämmsažvuõđâst.
- Tåimma nuʹt, što Sääʹmtiiʹǧǧid uuʹdet äärv da što teâtt da fiʹttjõs sääʹmaaʹššid da sääʹmõhttsažkååʹdd årra lâssan.
- Ǩiččlâʹtte vieʹltted vuõʹjjid, kook vueiʹtte šõddeed risttreeidaid Sääʹmteeʹǧǧ ouddõõzzi da persoonlaž õhttvuõđi kõõskâst.
- Jiâ priim jiõccses, piârrja leʹbe jeeʹres âʹlddoummuid õhttneei takai jeäʹrab tällõõzzlaž leʹbe jeeʹres ouddõõzzid, koid vueiʹtet ǩiõččâd vaaiktem leʹbe kook vueiʹtte vaaikted poliittlaž tååimaid da tuʹmmstõõǥǥid.
- Jiâ uuʹd privattnalla låʹppõõzzid, koid Sääʹmteʹǧǧ ij vueiʹt lääʹjjest meärtõllum tuâjeez seʹst viikkâd čõõđ.
- Ciʹsttje luõʹttjemnallšem teâđaid, koid liâ vuäǯǯam tiõttu Sääʹmteeʹǧǧ aaʹšši ǩiõttʼtõõllmõõžž õhttvuõđâst, da što jiâ ni kuäʹss ââʹn luõʹttjemnallšem teâđaid persoonlaž ouddõõzzi õsttmõʹšše leʹbe järrsi häiʹttjummuž diõtt.
- Ainsmâʹtte, što puk teâđ, kook õhttne Sääʹmteeʹǧǧ toiʹmmjummša liâ vuõiǥâs da ååskla.
- Čuäʹjte tääʹrǩesvuõđ da mååžnvuõđ tällõõzzlaž aaʹššin da Sääʹmteeʹǧǧ jällmõõžž årra.
- Jiâ šiõttâd Sääʹmteeʹǧǧ valdšma õõlǥtõõzzid, kook jiâ kuul sij tuâjeez da õõlǥtemvuõđid, čuäʹjte äärv ouddmõõžž tuâjjlai da sij ämmat-tääid årra di ǩiõttʼtâʹlle vueiʹtlva tååđteʹmesvuõđâs luõvsmeʹld vuõiʹǧǧest vaaldšmin.
- Teâđste da väʹldde lokku jeeʹres eeʹttǩeeʹji juurdjeäʹrdõõzzid da spraavdâʹtte raajji kritiikk ääʹššmeâldlaž kanaali pääiʹǩ vasttõõzzlaž naaʹlin.
Sääʹmteeʹǧǧest jeät priim ni måkam vueʹjjest da jäällmõõžžâst heâmmummuž, pannvueʹǩǩšõs jälstõõttmõõžž leʹbe pannvueʹǩǩšõs mainstummuž. Sääʹmteeʹǧǧest lij tuâjjstaanvuõttläkka di õõutverddsažvuõttläkka da tääʹssärvvläkka vuâđđõõvvi õõlǥtemvuõtt kässjõõttâd pannvueʹǩǩšõs jälstõõttmõʹšše da heâmmummša.
