Sämmilij škovlimaašij oovtâstpargo-orgaan
Sämmilij škovlimaašij oovtâstpargo-orgaan lii Sämitige, sämmilij päikkikuávlu kieldâi, sämikielâ tâi sämikielâlii máttááttâs uárnejeijee eres kieldâi já staatâhaldâttuv koskâsâš äššitobdee-, oovtâstpargo- já ráđádâllâmorgaan. Sämmilij škovlimaašij oovtâstpargo-orgaan tuáimá Sämitige ohtâvuođâst.
Oovtâstpargo-orgaan tárguttâssân lii ovdediđ oovtâstpargo sämmilij škovlimaašijn já ovdediđ oovtâstpaargon uásálistee ornijduumij koskâsii tiäđujotteem já ohtâvuođâ toollâm.
Oovtâstpargo-orgaan tuáimá rääđi adeleijee orgaanin sierâ Sämitige linjáornijduumeest.
Pargoh
- Oovded sämikielâlii já sämikielâ máttááttâs sehe sämikielâlii arâšoddâdem ornim já ovdedem,
- čuávu ovdánem já tuáimá äššitobden, já
- taha iävtuttâsâid já addel äššitobdeeciälkkámušâid sämmilij škovlimkoččâmušâin.
Asâttem já jesâneh
Sämitige čuákkim aasât oovtâstpargo-orgaan jieijâs toimâpaje västideijee ááigán.
Oovtâstpargo-orgaanist láá ucemustáá love jesânid. Tige čuákkim noomât orgaanân kulmâ jeessân, oovtâ jyehi sämikielâjuávhust. Sämitigge táttu máttááttâs- já kulttuurministeriö, Máttááttâshaldâttâs, Laapi kuávluhaldâttâsvirgáduv, sämmilij päikkikuávlu kieldâid Iänuduv, Aanaar, Suáđigil já Ucjuv, sämikielâ tâi sämikielâlii máttááttâs uárnejeijee eres kieldâid, Säämi máttááttâskuávdáá já Oulu ollâopâttuv Giellagas -instituut nomâttiđ jieškote-uv oovtâ jeessân já persovnlii värijeessân.
Oovtâstpargo-orgaan saavâjođetteijen já värisaavâjođetteijen tuáimih Sämitige nomâttem jesâneh. Oovtâstpargo-orgaan čällen tuáimá Sämitige škovlimčällee.
