Lävdikodeh
Sämitige čuákkim aasât nelji lävdikode; iäláttâs- já vuoigâdvuotâlävdikode, škovlim- já oppâmateriaallävdikode, kulttuurlävdikode, sosiaal- já tiervâsvuođâlävdikode sehe nubástusuuccâmlävdikode. Lasseen Sämitige čuákkim aasât nuorâirääđi, säämi kielârääđi já valjâlävdikode.
- Lävdikodeh tuáimih stiivrâ vuálásâžžân, valmâšteleh toimâsuárgásis kullee aašijd já taheh miärádâsâid suárgásis kullee vaarij jyehimist já kevttimist.
- Lävdikudij saavâjođetteijeeh já värisaavâjođetteijeeh kalgeh leđe sämitige eidusâš jesâneh. Sii lasseen jyehi lävdikoodán kuleh vittâ eres jeessân sehe juáhážân persovnkuáhtásâš värijeessân.
- Lävdikodeh kalgeh ovdâstiđ nuuvt pyereest ko máhđulâš Suomâ sämmilij kielâlâš já kuávlulâš juávhuid sehe šiev äššitubdâmuš toimâsyergistis. Lävdikudij pargoin lii meridum sämitige pargo-oornigist.
