Äävǩeʹrjj: Sääʹmǩiõllsai da säʹmmlai dommvuuʹd kääzzkõõzzi tuõrvvmõš Lappi pueʹrrvââjjamvuuʹdest
Sääʹmteʹǧǧ lij tååimtam Lappi pueʹrrvââjjamvuuʹd tuʹmmjeeʹjid äävǩeeʹrj, koʹst nuäjjõõđât tuõrvvâd sääʹmǩiõllsa da sääʹm dommvuuʹd sosiaal- da tiõrvâsvuõtthuâl kääzzkõõzz mååžna kõõsk ǩeeʹjjest. Sääʹmteʹǧǧ lij juʹn ääiʹjben ouʹdde põhttam tuõttšõs huõlâs tällõõzz šiõttlâʹttemtååimai vaaiktõõzzin vuuʹd jieʹllma vieʹltʼtem kääzzkõõzzid.
Snimldõk: Ville Fofonoff
Jeäʹrab huõl liâ kaggâm plaan Muonio puõccisââʹj ǩidd piijjmõõžžâst di Âʹvvel pirrsuutk piʹštti peiʹvvrõõttmõõžž loopptummšest. Kuhttu kääzzkõõzz liâ miârkteei grååm ǥu pukid vuuʹd äʹššniiʹǩǩid, še jeäʹrben sääʹmnarooʹde kuʹǩes kõõski da sääʹmǩiõllsaž kääzzkõõzzi diõtt.
Sääʹmteʹǧǧ âânn vääžnʼjen, što vuʹvddhalltõs vuõiʹni 9.2.2026 såbbreʹstes eʹtǩǩeed kuhttui kääzzkõõzzi juätkkmõõžž. Tuʹmmstõk čuäʹjat fiʹttjõõzz vuuʹd jiiʹjjesnallšemvuõđâst di jälsteeʹji taarbin.
– Vuʹvddhalltõs lij tuejjääm kookkas vuällai vääžnai linjjõõzz, koon tuäivvap vuʹvddvälddõõzz puõʹtti neäʹttel såbbreʹstes tueʹrjjeem. Muonio puõccisââʹj da Âʹvvel pirrsuutk piʹštti peiʹvvrõõttmõš liâ jieʹllma vieʹltʼtem kääzzkõõzz, kooi loopptummuš rââžžeʹči nuʹt puõccistaanlažvuõđ ǥu tuõrvlažvuõđ tobddi, särnn Sääʹmteeʹǧǧ saaǥǥjååʹđteeʹj sâjjsaž Tuomas Aslak Juuso.
Huõll še jeeʹres kääzzkõõzzin
Äävǩeeʹrjest puuʹtet ouʹdde, što šiõttlâʹttemplaanâst liâ še jeeʹres säʹmmlai beäʹlnn kriittlaž kääzzkõõzz, kook liâ kuâđđjam uuʹccben õõlmâs saǥstõõllmõʹšše. Õhtt täin lij Karesâvvan tiõrvâsvuõttsâjldõõǥǥ juõʹǩǩpeivvsaž tåimmjummuž loopptummuš, koon Sääʹmteʹǧǧ ij priim. Jeäʹrben mieʹrrkõskksânji kääzzkõõzzid taarbšeei äʹššneǩjooukid âsttjemvuâla tiõrvâsvuõđhuâl kääzzkõõzz liâ viâltʼtem, da kuʹǩes kõõsk vueiʹtte tuejjeed miârkteei cõõggid kääzzkõõzzid ooʒʒõõttmõʹšše.
Sääʹmteʹǧǧ mušttat, što še jeeʹres dommvuuʹd siidi kääzzkõõzz âʹlǧǧe tuõrvvâd, ǥu tõk liâ vääžnai grååm ǥu oummui puârastvââjjmõʹšše nuʹt še sääʹmǩiõli da kulttuur seillmõõžž ǥu vuuʹdi jieʹllemviõǥǥ beäʹlnn. Kääzzkõõzzi plaanummšest âʹlǧǧe väʹldded lokku vuuʹdest jälsteeʹji taarb da Sääʹmteʹǧǧ âlgg väʹldded mieʹldd õhttsažtuõjju, mâʹte lääʹjjšiõttummuž õõlǥat.
Õõutverddsaž kääzzkõõzz õhttsažtuâjast
Soti-oođummuž täävtõssân lij leämmaž pueʹreed kääzzkõõzzi õõutverddsažvuõđ da âsttjemvuõđ. Sääʹmteʹǧǧ lij vaalmâš še juätkast aktiivlaž õhttsažtuõjju, što täk vuâđđjurddi teâuddjõõvči veeʹzz Lappi pueʹrrvââjjamvuuʹd vuuʹdest – še tõin siidin da õutstõõzzin, kook hieʹlǩeld kuâđđje kõõskõõzzi õttja.
Lââʹssteâđ:
Tuomas Aslak Juuso
Saaǥǥjååʹđteeʹj sâjjsaž
040 687 3394
tuomas.juuso@samediggi.fi
