Kela da Sääʹmteʹǧǧ saǥstõʹlle Aanrest – piʹrǧǧeemtuärjjõõzz ouddõsvuäppõs taʹrǩstõõllma da raaʹjid râstldeei kõõččmõõžžid jiiʹjjes tuâjj-joukk
Kela da Sääʹmteeʹǧǧ eeǥǥlaž saǥstõõllmõõžžid jäʹrjsteš 27.5. Sääʹmkulttuurkõõskõs Sajoozzâst Aanrest. Saǥstõõllmõõžžin vuäjjneš tän vuâra jeäʹrben sääʹmkulttuur da sääʹmǩiõli lokkuväʹlddma ouddõõzzin.
Saaǥǥjååʹđteeʹjen toiʹmmje Sääʹmteeʹǧǧ sosiaal- da tiõrvâsvuõtt luʹvddkåʹdd saaǥǥjååʹđteeʹjj Leena Niittyvuopio-Jämsä da Kela kääzzkõsjååʹđteei Antti Jussila. Snimldõõǥǥâst kuâsttje saaǥǥjååʹđteeji lââʹssen saǥstõõllmõõžžid vuässõõttâm Kela da sääʹmteeʹǧǧ äʹšštobddi. Snimldõk: Sääʹmteʹǧǧ / Johanna Alatorvinen.
Meerjeältõkstroiʹttel da Sääʹmteeʹǧǧ õhttsažtuâjj säʹmmlai sosiaalstaan pueʹreem ouʹdde da sääʹm ǩiõll-lääʹjj õõlǥtõõzzi čõõđ viikkma vuâđđââvv eeʹjj 2021 oođuum õhttsažtuâjjsuåppmõʹšše. Kela da sääʹmteeʹǧǧ eeǥǥlaž õhttsažtuâjjsaǥstõõllmõõžžin seuʹrrjet suåppmõõžž täävtõõzzi teâuddjummuž vuäjjneeʹl eeǥǥlânji jeeʹres teeʹmid. Eeʹjj 2025 saǥstõõllmõõžžin taʹrǩstõʹlleš jeäʹrben Kela ouddõsvuäppõõzzid da raaʹjid râstldeei kõõččmõõžžid.
– Meeʹst Kelast lij juätkast täävtõsân smiõttâd, mäʹhtt vuäitčim väʹldded lokku säʹmmlai ǩiõlʼlaž da kulttuurlaž vuõiggâdvuõđid Kela ouddõõzzi ǩiõttʼtõõllma jurddum ouddõsvuäppõõzzin da veâl ooudâs čåuʹddemtääʹzzest. Vuõssmõs läuʹǩǩen meeʹst lij taʹrǩstõõllâd vuâđđpiʹrǧǧeemtuärjjõõzz ouddõsvuäppõõzz jälstem ǩiõččâmkuuʹlmest, tuâtt ouddõõzzi da kääzzkõõzzi plaanâmjuâkkaz vueiʹvvooumaž Mia Helle Kelast
Tuâjj-joukk smiõttâd čåuddmõõžžid rââst raaʹji vuällai vuõʹjjid
Säʹmmlai sosiaalstaaʹne kuulli raaʹjid râstldeei kõõččmõõžžid smiõʹtteš saǥstõõllmõõžžin ouddmiârki vuäivva. Saǥstõõllmõõžžin tuʹmmeeš vuâđđeed tuâjj-joouk, koozz mieʹrreeš tuâjaid da täävtõõzzid. Tuâjj-jouʹǩǩe koʹlle nuʹtt Kela ǥu Sääʹmteeʹǧǧ eeʹttkõʹstti.
– Määŋg säʹmmla reâugga, jälste da âʹnne kääzzkõõzzid jeeʹres riikki vuuʹdin, mii tuejjat vaʹǯǯtõõzzid säʹmmlai ǩiõl da kulttuur lokkuväʹlddma jeeʹres jânnmi sosiaalstaanâst. Tuäivam, što tuâjj-jooukâst kaaunât konkreettlaž neävvaid vaʹǯǯtõõzzi čåuʹddma, särnn Sääʹmteeʹǧǧ saaǥǥjååʹđteei sâjjsaž Tuomas Aslak Juuso.
Teeimja tååimai ärvvtõõllmõš da ǩicstõs pueʹttja
Saǥstõõllmõõžžin mõʹnneš čõõđ še teeimja da pueʹtti eeʹjj säʹmmlai sosiaalstaaʹne kuulli tååimaid. Lââʹssen saǥstõʹlleš jeeʹrab mieʹldd säʹmmlai sosiaalstaaʹne kuulli tuʹtǩǩummšest di Kela da Sääʹmteeʹǧǧ tååimaid valmštõõttmõõžžâst, koid tuõttvuõtt- da suåvâdvuõttkomissio loppeeʹjjest õlmstâʹttma pueʹtti raportt kaiʹbbai. Kaaunõõttmõõžžâst čuäʹjtõʹlleš še Suomi.fi säämas -kääzzkõõzz, kååʹtt lij veʹrǧǧniiʹǩǩi õhttsaž sääʹmǩiõllsai kääzzkõõzzi Mii ovttas -säimmõõzzâst čõõđ vikkum.
Kela kääzzkõsjååʹđteei Antti Jussila rämmaž pueʹrrmiõllsaž, kõskknaž naʹddjõʹsse da õhttsaž tuejjummša vuâđđõõvvi õhttsažtuâjast, kååʹtt ij pääʹʒʒ tåʹlǩ eeǥǥlaž saǥstõõllmõõžžid.
– Tän poodd Kela taʹrjjad äʹššneǩ-kääzzkõõzz teʹlfoonin da ougglõskääzzkõsân nuõrttsääʹmǩiõlle di tuʹlǩǩuum kääzzkõsân aanarsääʹmǩiõʹlle da tâʹvvsääʹmǩiõʹlle. OmaKela sääʹmǩiõllsaž versiost MuuKelast vuäitt håiddad måtmid aaʹššid pukin koolmin sääʹmǩiõlin. Tuäivvap, što Kela sääʹmǩiõllsai kääzzkõõzzi âânnmõš õinn lâssan, da što vueiʹttep nääiʹt peäʹlsteen tuärjjeed sääʹmǩiõl da kulttuur jieʹllemviõǥǥ mij veʹrǧǧneǩtuâjain, tuâtt Jussila.
Lââʹssteâđ
Juâkkaz vueiʹvvooumaž Mia Helle, ouddõõzzi da kääzzkõõzzi plaanâmjuâǥǥas, Kela
teʹlf. 040 350 6301
ouddnõmm.sokknõmm@kela.fi
Saaǥǥjååʹđteei sâjjsaž Tuomas Aslak Juuso, Sääʹmteʹǧǧ
teʹlf. 040 687 3394
ouddnõmm.sokknõmm@samediggi.fi
Kääzzkõsjååʹđteei Antti Jussila, äʹššneeʹǩǩ âʹlddkääzzkõõzzi tuejjeemjuâǥǥtõs, Kela
teʹlf. 040 834 5703
ouddnõmm.sokknõmm@kela.fi
Looǥǥ lââʹzz
