Minister Juuso da Sääʹmteeʹǧǧ jorbb pååʹrd teeʹmmen sääʹmǩiõllsa kääzzkõõzz pueʹrrvââjjamvuuʹdin
Sosiaal- da tiõrvâsvuõttminister Kaisa Juuso õõutsââʹjest Sääʹmteeʹǧǧin koččum jorbb pååʹrd saǥstõõllmõõžžin skamm-mannu 20. peeiʹv vuäjjnet sääʹmǩiõllsaid da kulttuurmeâldlaid sosiaal- da tiõrvâsvuõttkääzzkõõzzid.
Tääʹvtõsân lij minister Juuso jååʹđteʹmen raajjâd obbkoov sääʹmǩiõllsai da kulttuurmeâldlai kääzzkõõzzi vueʹjjest mâŋŋa pueʹrrvââjjamvuuʹdi toiʹmmjummšes alttummuž. Jurddjen lij še lââʹzzted vuârrsaǥstõõllmõõžž jeeʹres toiʹmmjeeʹji kõõsk da lââʹzzted õhttsažtuâj sääʹmǩiõllsai da kulttuurmeâldlai kääzzkõõzzi staanâm diõtt. Lââʹssen vuässõõttjin lij vueiʹttemvuõtt kaggâd ouʹdde še jeeʹres kõskksõmâs kõõččmõõžžid jeeʹrab mieʹldd kääzzkõõzzi teäggtõõzzâst da kääzzkõõzzi vuäǯǯamvuõđâst di jeeʹres ääiʹjpoddsaž teeʹmin.
Jorbb pååʹrd saǥstõõllma vuässâʹtte eeʹttkõõʹsti Sääʹmteeʹǧǧest, Lappi pueʹrrvââjjamvuuʹdest, Lappi vuʹvddvaaldâšmkonttrest, Tiõrvâsvuõđ da pueʹrrvââjjamstroiʹttlest, Kelast, Säʹmmlai tuõttvuõtt- da suåvâdvuõttkomissiost di sääʹm psykososiaalʼlaž tuärj juâkksest (Uvjj – Uvjâ – Uvja), riikksuåvtõõzz kansliast, sosiaal- da tiõrvâsvuõttministeriast di vuõiggâdvuõttministeriast.
Lââʹssteâđ:
sosiaalduumšeǩ Juha Luomala, sosiaal- da tiõrvâsvuõttministeria, t. 0295 163 492
II väärrsaaǥǥjååʹđteei Tuomas Aslak Juuso, Sääʹmteʹǧǧ, t. 040 687 3394
