Sääʹmǩiõl kuâsttje da kollʼje Ǩiõllneäʹttel poodd – puäʹđ mieʹldd!
Ǩiõllneäʹttel vieʹttjet juõʹǩǩeeʹjj kålggmannust neäʹttlest 43, taʹnni 20.-26.10. Sääʹmteʹǧǧ kåčč juõʹǩǩʼka mieʹldd tueʹjjeed kuâsttjemnalla Euroopp Unioon oʹdinak alggmeer, säʹmmlai, Lääʹddjânnmest jieʹlli ǩiõlid – aanarsääʹm, nuõrttsääʹm da tâʹvvsääʹm. Mättʼtõsminister Anders Adlercreutz toiʹmmai tän eeʹjj Ǩiõllneäʹttel suõjjleeʹjen.
– Ââʹneeʹl sääʹmǩiõlid vueiʹtlva määŋgain vuõʹjjin lââʹzztep tõi kuâsttjemvuõđ da ärvstummuž. Håʹt-i jiõk siltteʹči sääʹmǩiõl, vuäitak kuuitâǥ leeʹd mieʹldd tueʹrjjeʹmmen ǩiõl da kulttuur – ääv šiõhttlõõttmõš da še uuʹcces tuejjummuž miârkte jiânnai, särnn Sääʹmteeʹǧǧ saaǥǥjååʹđteeʹj sâjjsaž Tuomas Aslak Juuso.
Mõʹnt vuässõõttâd?
- Sääʹmǩiõl liâ jieʹlli, leša vaarvuâlaž kulttuurpreddan. Ǩiõlʼlaž kuâsttjemvuõtt nâânad tõi jieʹllemviõkksažvuõđ.
- Vuässõõttmõš lij tuâjj alggmeerai vuõiggâdvuõđi tueʹrjjeem diõtt da čõnnõõttmõš õõutverddsažvuõʹtte.
- Sääʹmǩiõli tueʹrjjummuš čuäʹjat õhttsallašvuõđâst, pääiklažvuõđâst da ärvvjååʹđtemvuõđâst.
- Juõʹǩǩʼkast tåimmjest lij vueiʹtlvažvuõtt leeʹd mieʹldd raajjmen ǩiõlʼlânji da kulttuursânji õõutverddsab Lääʹddjânnam.
Mäʹhtt vuäitak vuässõõttâd?
Tåimmjummuš vuäitt leeʹd siõm da symboolaž leʹbe vaiddsab da kreevsab – tääʹrǩmõs lij, što tõn tueʹjjeet ciʹsttjeeʹl da õõutveäkka sääʹmõutstõõzz jiõn kuvddleeʹl. Täʹst muäʹdd nääʹl:
- Kaagg sääʹmǩiõlid ouʹdde neʹttseeidain, äʹššneǩsaakkummšest, kõõlbin leʹbe iʹlmmtõstaaulin
- Jueʹjj peeiʹv sääʹmǩiõllsaž sääʹn leʹbe tiõrvʼvuõđ some pääiʹǩ.
- Jääʹrjest uuʹcces šõddmõõžž, teâttkââsk, ouʹddepohttmõõžž leʹbe kampanjj sääʹmǩiõli cisttân
- Ââʹn teeʹmmstaanõõǥǥ #giellavahkku, #kielâokko leʹbe #ǩiõllneäʹttel ǥu vuässõõđak.
- Kaaunak materiaalid da lââʹssteâđaid seiddõõzzâst: Ǩiõllneäʹttel, Giellavahkku, Giellavahkku FB da Giellavahku Instagram.
Mii lij Ǩiõllneäʹttel?
Ǩiõllneäʹttel täävtõssân lij puʹhtted sääʹmǩiõlid kollʼjemnalla da kuâsttjemnalla pukin õhttsažkååʹdd vueʹssvuuʹdin Lääʹddjânnmest, Ruõccjânnmest da Taarrjânnmest. Ǩiõl liâ vääžnai oʹdinak ǩiõllõõʹnnʼja, sääʹm-meeru da veeʹzz õhttsažkådda – tõk liâ saakkeem neävv, identiteeʹtt da kulttuurääʹrb kuõʹddi di õʹhttekuullâmvuõđ raajji.
Sääʹmǩiõli kuâsttjummuš aarǥâst nâânad tõi sââʹj da priimmʼmõõžž õhttsažkååʹddest. Ǩiõllneäʹttel lij jäʹrjstum eeʹjjest 2019 ääʹljeeʹl, täʹl viõʹttješ ÕM meeraikõskksa alggmeerai ǩiõli eeʹjj. Sääʹmteʹǧǧ veekk čõõđ neäʹttel õhttsažtuâjast Ruõcc da Taarr Sääʹmtiiʹǧǧin.
Lââʹssteâđ:
Tuomas Aslak Juuso
Saaǥǥjååʹđteeʹj sâjjsaž
Sääʹmteʹǧǧ
tuomas.juuso@samediggi.fi
040 687 3394
Tueʹrj vuäǯǯak vuässõõttmõõžž plaaneem tuõjju:
Marko Marjomaa
Sääʹm ǩiõllaaʹššipiisar
Sääʹmteʹǧǧ
marko.marjomaa@samediggi.fi
+358 50 438 2484
