Sääʹmteʹǧǧ ij priim hueʹnummšid sääʹmǩiõllsaid leʹbe sääʹm dommvuuʹd soti-kääzzkõõzzid

Šeäštt-tååimain eʹtǩǩeet jm. Muonio puõccisââʹj loopptummuž, jueʹlǧǧõõvvi spesiaalpuõccihååid kõskkummuž, Karesâvvan tiõrvâsvuõttsâjldõõǥǥ juõʹǩǩpeivvsa tåimmʼmõõžž ǩidd piijjmõõžž di Âʹvvel pirrsuutk piʹštti peiʹvvrõõttmõõžž mottmõõžž ǩiirâsvuâsttavälddmõššân, täʹl mäʹtǩǩ leʹčči âlddsin 500 ǩm sääʹm dommvuuʹd tâʹvvbeäʹlin pirrsuutk piʹštti peiʹvvrõõttmõʹšše.

– Sääʹm dommvuuʹd leʹbe tok vaaiktõõzzi mieʹldd vuällai kääzzkõõzzid tillʼlõõvi šeäštt-tååim vaaikte toolkteʹmmen lokku vääʹldeeʹl sääʹm-meer juʹn valmmša hueʹnab sââʹjj sosiaal- da tiõrvâsvuõtthuâlast. Kääzzkõõzzi karssmõš vaaikat pâi oummui tuõrvv-vuõđ tobdlmid da nuäjjõõttâp Laphaaʹje, što tõt vääldči meädda näkam eʹtǩǩõõzzid, särnn Sääʹmteeʹǧǧ saaǥǥjååʹđteeʹj sâjjsaž Tuomas Aslak Juuso.

Sääʹmteʹǧǧ mušttat, što soti-oođõõzz õhttân väʹlddtäävtõssân leäi õõutverddsažvuõđ pueʹrummuš. Vooudlaž âsttjemvuõđ hueʹnummuš tuejjad nuʹbivuâstlaž vaaiktõõzzid da lij veâl tââđstes hueʹneed oummui luõʹttjummuž õhttsažkååʹdd kääzzkõõzzid. Kääzzkõõzzi serddmõš meädda sääʹm dommvuuʹdest hueʹnad vueiʹtlvažvuõđ ââʹnned kääzzkõõzzid sääʹmǩiõlin jm. tuâjjlažkååʹdd vuäǯǯamvuõđ vaʹǯǯtõõzzin.

Sääʹmteʹǧǧ vuâmmšâtt še, što Lappi pueʹrrvââjjamvuuʹd kuõskki sääʹmteʹǧǧlääʹjj (414/2025) 9 § da 9a § meâldlaž õõlǥtõõzz. Ååʹn šeäštt-tååim liâ valmštõllum krååʹma ni måkam õhttsažtåimmʼmõõžž leʹbe saǥstõõllmõõžž Sääʹmtiiʹǧǧin.

– Leäi leeʹd pueʹrab äʹšš, ǥu Sääʹmteeʹǧǧ leʹjje juʹn aalǥâst välddam mieʹldd valmštõõllâmpõõʹjid. Eiʹdde oođuum Sääʹmteʹǧǧlääʹǩǩ tuârvv saǥstõõllmõõžži čõõđ mõõnnmõõžž pueʹrben, ij hueʹnben. Âânam tän samai hueʹnes leʹbe loʹsses äššan da jouddâp smiõttâd juätkktååimaid ääʹššest, juätkk Juuso.

Sääʹmteʹǧǧ še nuäjjââtt Lääʹdd valdiaaʹje, što tõt kuâdd vasttõsvuõđ säʹmmlai kääzzkõõzzin di ij kueʹđ sääʹm-meer massiivlaž šeäštt-tååimai juõʹljid.

Lââʹssteâđ

Tuomas Aslak Juuso
Saaǥǥjååʹđteeʹj sâjjsaž
040 687 3394
tuomas.juuso@samediggi.fi