Sääʹmteʹǧǧ õõlǥat sääʹmǩiõllsai da säʹmmlai dommvuuʹd soti-kääzzkõõzzi staanmõõžž
Lappi pueʹrrvââjjamvuuʹd kääzzkõs-sääiʹm kuõskki plaan vaaikte miârkteeinalla saaʹmi pueʹrrvââjjma da tiõrvâsvuõʹtte di vueiʹttemvuõʹtte tuõʹllʼjed da õõuʹdeed jiiʹjjes ǩiõl da kulttuur. Sääʹmteʹǧǧlääʹjj 9 § meâldlaž saǥstõõllmõõžž pueʹrrvââjjamvuuʹdin juätkkje alggeeʹjj 2026 õuʹddel tuʹmmstõktuâj.
Snimldõk: Ville Fofonoff / Sääʹmteʹǧǧ
Lappi pueʹrrvââjjamvuʹvdd õlmstõõʹtti 22.10.2025 hämmaz kääzzkõs-sääiʹm muttsin vueʹssen tällõõzz šiõttlâʹttemtååimain. Hämmsest lij eʹtǩǩuum jm. Âʹvvel suutk pirr peeiʹvstem koʹrvvummuž ǩiirâsvuâsttavälddmõõžžin, Muonio puõccisââʹj loopptummuž di siidi kääzzkõõzzi oʹđđestjäʹrjstõõllmõõžž.
– Haaʹleep ainsmâʹtted, što sääʹmǩiõllsa da säʹmmlai dommvuuʹd soti-kääzzkõõzz seilla. Leäʹp Sääʹmteeʹǧǧest põrggâm vaaikted äšša määŋgnalla, što täid jieʹllma tääʹrǩes kääzzkõõzzid staančeš, särnn Sääʹmteeʹǧǧ saaǥǥjååʹđteei sâjjsaž Tuomas Aslak Juuso.
Sääʹmteʹǧǧ lij vuässõõttâm ääʹšš kuõskki õõlmâs saǥstõõllma vääʹldeeʹl peäʹl 22.10.2025, pieʹllväʹlddemǩeeʹrjtõõzzin 5.11.2025 di õhttsaž pieʹllväʹlddmin Jeänõõǥǥ, Aanar, Muonio da Uccjooǥǥ kooʹddivuiʹm. Lââʹssen äʹššvuuʹd pirr lij õõutsââʹjest kooʹddivuiʹm kaaunõttum väʹlddminister Orpoin di kåʹdd- da vuʹvddminister Ikonen vieʹǩǩteeʹjivuiʹm 27.11.2025.
Sääʹmteeʹǧǧ halltõs ǩiõttʼtõõli ääʹšš såbbreʹstes 19.11.2025 da priimi Sääʹmteeʹǧǧ ciâlkâlm kääzzkõs-sääiʹm muttsin. Ciâlklmest jm. ännõʹtteš sääʹmǩiõllsai da säʹmmlai dommvuuʹd soti-kääzzkõõzzi staanâm peäʹlest di puʹhtteš õuʹdde, što Sääʹmteʹǧǧ ij priim Muonio puõccisââʹj ij-ǥa Âʹvvel pirr suutki peeiʹvstem loopptummuž. Sääʹmteʹǧǧ raauki Lappi pueʹrrvââjjamvuuʹd luõppâd nåkam plaanin, kookk rââžžeʹče sääʹmǩiõllsai kääzzkõõzzi teâuddjummuž ääiʹjbuʹžže veʹrddeeʹl.
Lââʹssen rauʹǩǩeš pueʹrrvââjjamvuuʹdest käʹttjeejab vaaiktõõzzi ärvvtõõllmõõžž õuʹddel tuʹmmstõktuâj da mušttʼteš sääʹmteʹǧǧlääʹjj õõlǥtõõzzin.
Sääʹmteʹǧǧ lij juʹn ääiʹjben kritisâsttam Lappi pueʹrrvââjjamvuuʹd tõn diõtt, što Sääʹmteʹǧǧ ij leäkku vuässõttum kääzzkõs-sääiʹm muttsi valmštõõllâmprosessa. Lappi pueʹrrvââjjamvuʹvdd kååččai Sääʹmteeʹǧǧ sääʹmteʹǧǧlääʹjj 9 § meâldlaž saǥstõõllmõʹšše, koonn õʹnneš 25.11.2025. Saǥstõõllmõõžžâst mõʹnneš čõõđ jm. saǥstõõllâmõudldõõzzid. Saǥstõõllmõõžž ääiʹj Lappi pueʹrrvââjjamvuʹvdd iʹlmmti, što kääzzkõs-sääiʹm kuõskki tuʹmmstõõǥǥid puäʹđet tuejjeed eman alggeeʹjj 2026. Õhttsažtoiʹmmjem- da saǥstõõllâmproseʹss Sääʹmteeʹǧǧ da Lappi pueʹrrvââjjamvuuʹd kõõskâst juätkkai alggeeʹjj 2026 õuʹddel tuʹmmstõktuâj.
Lââʹssteâđ
Tuomas Aslak Juuso
II väärrsaaǥǥjååʹđteei, saaǥǥjååʹđteei sâjjsaž
040 687 3394
tuomas.juuso@samediggi.fi
