Sääʹmteʹǧǧ späʹssbââšš Lappi pueʹrrvââjjamvuuʹd vuʹvddvälddõõzz
Lappi pueʹrrvââjjamvuuʹd vuʹvddvälddõs noorõõđi vuõssaarǥ 23.2.2026 tuʹmmjed miârkteei tällõõzz šiõttlâʹttemtååimain. Vuʹvddvälddõs tuʹmmji tueʹrjjeed vuʹvddhalltõõzz eʹtǩǩõõzz, koon mieʹldd nuʹt Muonio puõccisââʹj ǥu Âʹvvel pirrsuutk piʹštti peiʹvvrõõttmõõžž juätkkjemvuõtt tuõrvât. Lââʹssen vuʹvddvälddõs tuʹmmji, što jeät Karesâvvan tiõrvâsvuõttsâjldõõǥǥ piij ǩidd. Sääʹmteʹǧǧ lij samai tååđvaž vuʹvddvälddõõzz tuʹmmstõõǥǥid.
Snimldõk: Johanna Labba
– Späʹssbõõššâp pakksânji vuʹvddvälddõõzz vuäzzlaid, kook tuʹmmje peälšted säʹmmlai dommvuuʹd da tõn jälsteeʹjid jurddum kääzzkõõzzid. Toiʹmmjeei da vuäǯǯamnalla åårrai kääzzkõõzzin lij jõnn miârktõs vuuʹd oummuid da veiddsõbân jieʹllemviõʹǩǩe. Lij vääžnai, što säʹmmlai dommvuuʹd oummuin lij luõʹttjummuš tõõzz, što seeʹst ââʹnet õõutverddsânji huõl, särnn Sääʹmteeʹǧǧ saaǥǥjååʹđteeʹj sâjjsaž Tuomas Aslak Juuso.
Sääʹmteeʹǧǧ mieʹldd lij vääžnai, što tõn ouʹdde puʹhttem vuäinnmõõžžid vaʹlddeš lokku Lappi pueʹrrvââjjamvuuʹd välddõõzz tuʹmmstõõǥǥin. Sääʹmteʹǧǧ lij ǩiččlõõttâm nuʹt saǥstõõllmõõžži, ciâlkâlm da õõlmâs peäʹlestvälddmõõžži kuånstin vaaikted tuʹmmstõktuõjju.
– Leäm tååđvaž, što vuʹvddvälddõs lij tobdstõõttâm meeʹst tååimtum lokku välddmõõžžid da välddam tõid tuõđlânji. Tät vuässas tuärjj ooudâsraajji da pueʹrr õhttsažtuâj še pueʹttiääiʹjest, juätkk Juuso.
Sääʹmteʹǧǧ âânn vääžnʼjen, što õhttsažtuâjj juätkkai tällõõzz šiõttlâʹttemtååimai tiuʹddepiijjmõõžžâst. Lappi pueʹrrvââjjamvuuʹd šiõttlâʹttemtååimain lij liʹnʼjjuum jm. siidi kääzzkõõzzi taarbi plaanummšest da Muoniost puõccisââʹj juätkkmõõžžâst huõlǩâni što veʹrǧǧääiʹj åålǥbeällsaž ǩiirâsvuâsttaväʹlddem päiʹǩǩ leʹčči loopptem vueʹlnn. Täi plaani tääʹrǩtõõveen Sääʹmteʹǧǧ haaʹlad leeʹd mieʹldd raʹvvjeʹmmen, što jiâ muttâz jååʹđet säʹmmlai dommvuuʹd siidi kääzzkõõzzi huânnʼnummša pâi vuäǯǯamvuâla kääzzkõõzz liâ taʹrjjeemnalla pukid ââʹǩǩ- da äʹššneǩjooukid.
Lââʹssteâđ:
Tuomas Aslak Juuso
Saaǥǥjååʹđteeʹj sâjjsaž
040 687 3394
tuomas.juuso@samediggi.fi
