Sääʹmteeʹǧǧ alttee EU-täävtõõzzi ooudâsviikkmõõžž – eeʹttǩeeʹj kaaunâʹtte tän neäʹttlest Brysslest EU tåimmorgaani eeʹttǩeeʹjivuiʹm
Sääʹmteeʹǧǧ eeʹttǩeeʹj reiʹssje Bryssla oouʹdeed Sääʹmteeʹǧǧ EU-politiʹǩǩe õhttneei täävtõõzzid 13.-16. vueʹssmannust. Kuõʹssjem poodd eeʹttǩeeʹj vueiʹnne EU tåimmorgaani eeʹttǩeeʹjid da čõõnâsjooukid.
Bryssel määʹtǩ jurddjen lij altteed tuâjj Sääʹmteeʹǧǧ äimmõsmuttsa, jieʹllemviõʹǩǩe da vuässadvuõʹtte õhttneei EU-täävtõõzzi ouʹdde. Sääʹmteeʹǧǧ eeʹttǩeeʹj vueiʹnnlâʹtte ouddâl Bryssla vuâlggmõõžž riikksuåvtõõzz kanslia EU-juâkksin Heʹlssnest. Brysslest vueiʹnnlõõttmõõžž lie jm. Lääʹdd EU-eeʹttkâsttõõzz, Euroopp komissio da Euroopp parlameeʹnt Lääʹdd eeʹttǩeeʹjivuiʹm leʹbe meeppivuiʹm.
Håʹt-i EU:st tueʹjjeem tuʹmmstõõǥǥ vaaikte säʹmmlai juõʹǩǩpeivvsaž jieʹllma, jie säʹmmlain leäkku veerǥlaž sââʹj EU tuʹmmstõktuâjast jie-ǥa põõšši eeʹttkâsttõõzz Brysslest. EU:st ij še leäkku veerǥlaž siiʹsǩalggmeerpolitiikk.
– Sääʹmteeʹǧǧ tiuddsååbbar lij meäʹrtõõllâm tän vaalpâjja prioriteʹtten vaaiktummuž EU årra. Jurddjen lij tän reeis poodd altteed saǥstõõllmõõžžid tõʹst, mäʹhtt vuäitčip konkreettlânji oouʹdeed säʹmmlaid vääžnai aaʹššid EU-tääʹzzest, särnn saaǥǥjååʹđteeʹj sâjjsaž Tuomas Aslak Juuso.
– Vueʹrddep positiivlaž vuâsttavälddmõõžž da tõn, što vuäitčip õõutnalla toobdstet õhttsaž laauʹǩid pueʹttiäigga, Juuso juätkk.
Sääʹmteeʹǧǧ delegaatiooʹje koʹlle saaǥǥjååʹđteeʹj sâjjsaž Tuomas Aslak Juuso, I väärrsaaǥǥjååʹđteeʹj Leo Aikio, halltõõzz vuäzzla Tauno Ljetoff da Asko Länsman, jieʹllemvueʹǩǩ- da vuõiggâdvuõttluʹvddkåʹdd saaǥǥjååʹđteeʹjj Nilla Tapiola, lääʹǩǩpiisar Kalle Varis, meeraikõskksaž aaʹšši piisar Inka Saara Arttijeff da saaǥǥjååʹđteeʹj vieʹǩǩteeʹjj Niina Siivikko.
EU-ääʹšš Sääʹmteeʹǧǧ meeraikõskksaž tåimmjummuž kõskksââʹjest
Sääʹmteʹǧǧ lij liʹnjjääm jooʹtti vaalpââʹj meeraikõskksaž tåimmjummuž kõskksaž täävtõssân Sääʹmteeʹǧǧ vuässõõttâmvuõiggâdvuõđi raavummuž da põõššmõõžž Euroopp unioon instituutioin di EU-tuʹmmstõktuõjju vuässõõttmõõžž Lääʹddjânnmest. Eeʹjj 2025 tåimmamplaanâst õhttân njoonaštäävtõssân lij: ”Säʹmmlai vuässõõttâmvuõiggâdvuõđ EU:st da EU kuõskki tuʹmmstõktuâjast: põõšši rajjsi ooudâsviikkmõš”.
Sääʹmteeʹǧǧ EU-politiʹǩǩe õhttneei täävtõõzz liâ vuäzzlõttum kooum väʹlddtäävtõõzz vuâlla:
- Vuässõõttmõõžž raavummuš
- Äimmõsmuuttâs
- Sääʹmvuuʹd jieʹllemviõkk
Sääʹmteeʹǧǧ da Sääʹm parlamentaarlaž suåvtõõzz täävtõõzz lie liinjâst Bareeʹnts vuuʹd alggmeerai õlltääʹzz såbbar puäđõõzzivuiʹm, koon jäʹrjsteš Brysslest pâʹsslašttâm-mannust 2023.
- Sääʹmteeʹǧǧ tåimmamprogramm 2024-2027 (pdf)
- Sääʹmteeʹǧǧ tåimmamplaan eeʹjjpoʹdde 2025 (pdf)
- Sääʹmteeʹǧǧ meeraikõskksaž tåimmjummuž kuõskki strategia (pdf)
Lââʹssteâđ:
Tuomas Aslak Juuso
Saaǥǥjååʹđteeʹj sâjjsaž
040 687 3394
tuomas.juuso@samediggi.fi
Inka Saara Arttijeff
meeraikõskksaž aaʹšši piisar
050 574 7629
inka-saara.arttijeff@samediggi.fi
