Saaʹmi meersažpeeiʹv vieʹttjet 6.2. - Sääʹmteeʹǧǧ tåimmjummša peäss tobdstõõttâd Aanrest
Saaʹmi meersažpeeiʹv vieʹttjet piirieeʹjji täʹlvvmannu 6. peeiʹv. Juhllvuõđid vieʹttjet tâʹl äʹrbbvuõđlânji jeeʹres beäʹlnn Sääʹmjânnam da še Sääʹmjânnam åålǥbeäʹlnn. Sääʹmteeʹǧǧ määŋgpeällsaž tåimmjummša peäss tobdstõõttâd Sääʹmkulttuurkõõskõs Sajoozzâst Aanrest Sääʹmteeʹǧǧ pukid uhssäävai åårrai peeiʹvest.
Sääʹmteeʹǧǧ saaǥǥjååʹđteeʹjj Tuomas Aslak Juuso tuäivat pukid tiõrv pueʹttjen tobdstõõttâd Sääʹmteeʹǧǧ tåimmjummša. – Håʹt-i saaʹmi vuâđđlääǥǥlaž jiõččvaaldâšm lij leämmaž mõõnni ääiʹj vââʹljest saǥstõõllmõõžžin, ij veʹt ni miʹjjid saaʹmid leäkku vieʹltǩani samai seeʹlves äʹšš, mâid tõt miʹjjid vueʹjjest miârkat, Juuso särnn. Ååʹn meersažpeiʹvven lij samai fiinâs piâssâd čuäjtõõllâd pukid tän samai vääžnai tuâj, mâid Sääʹmteeʹǧǧest šuurin čâđđmin da äʹšštobddmõõžžin tuejjeet, Juuso juätkk.
Sääʹmteeʹǧǧ pukid äävai åårrai peiʹvv älgg Sajoozz auditoriost čiâss 9.45 Sääʹmteeʹǧǧ saaǥǥjååʹđteeʹj meersažpeeiʹv tiõrvvʼvuõđin. Sääʹmteeʹǧǧ musikk-kõõskõs, päärnaikulttuurkõõskõs Mánnu da jieʹllikarttkõõskõs Skábma vaʹsttee peeiʹv programmtaʹrjjummšest. Sääʹmteʹǧǧ taʹrjjad kuõʹssid juhllkååʹff da Sajoozz restrantt Čaijust vuäitt vuäʹstted juhllpeiʹvvporrmõõžž. Pääiʹǩ âʹlnn lij teâđast vueiʹtlvažvuõtt vuässõõttâd vuârbbmõʹšše, koʹst vuäitt vueiʹtted kuõʹhtt liipp Ijahis idja -festivaalid. Podd lij äävai pukid ǩeäid miõl ǩeäss.
Programm:
Čiâss 9.45, Sajos auditorio (45 min)
Meersažpeeiʹv videotiõrvvʼvuõtt | Sääʹmteeʹǧǧ saaǥǥjååʹđteeʹjj Tuomas Aslak Juuso
Konseʹrtt: Vildá | Musikk-kõõskõs
Čiâss 9.45, Sajos, Silba (45 min)
Vuâlla škooulâkksai päärnaiprogramm | Sääʹm päärnaikulttuurkõõskõs Mánnu
Čiâss 10.30–15.00, Sajos jõnnkäʹrdd
Tobdstõõđ Sääʹmteeʹǧǧ tåimmjummša! Sääʹmteeʹǧǧ takai koontâr, škooultõs- da mättmateriaalkoontâr da sääʹmǩiõl koontâr čuäjtâʹtte. Mieʹldd om. pinsspääʹjj da siõrrsuåpp.
Čiâss 10.30 da 13.00, vuâlggmõš Sajoozz jõnnkääʹrdest
Mättmateriaal vuäʹpstemkõõrv | Škooultõs- da mättmateriaalkoontâr
Čiâss 11.30 da 12.30, Sajos jõnnkäʹrdd
Livđe-čuäjtõõzz: Anna Morottaja | Musikk-kõõskõs
Čiâss 14.00, Sajos auditorio (30 min)
Dokumeʹntt Ääʹjj ǩiõll | Jieʹllikarttkõõskõs Skábma
Čiâss 15.00 Sajos auditorio (15 min)
Sajoozz čuäjtõõllâmvideo
Čiâss 18.00 Sajos auditorio
Kuuskõõzzi räʹppneǩ dokumeʹnttjieʹllikartt | Jieʹllikarttkõõskõs Skábma
Saaʹmi meersažpeiʹvv
Saaʹmi meersažpeeiʹv vieʹttjet piirieeʹjji täʹlvvmannu 6. peeiʹv. Peiʹvv lij õhtt saaʹmi liiʹpptempeeiʹvin, leša lââʹssen nuʹt Lääʹdd, Ruõcc ǥu Taarr veʹrǧǧneeʹǩǩ siâzztâʹlle almmjallaž liiʹpptummuž.
Saaʹmi meersažpeiʹvv lij veâl nuõrr juhllpeiʹvv. Lääʹdd kaʹlndaare tõn miõrkkuš eeʹjjest 2004. Meersažpeeiʹvest mieʹrreeš kuuitâǥ juʹn eeʹjjest 1992, da juhllpeeiʹv preddan jååʹđte pâʹjjel čueʹđ eeʹjj tuâkka, ekka 1917. Täʹl Taarr Trondheeiʹmest rieʹššeš vuõssmõs tâʹvvjânnmallaš sääʹmsååbbar, koon jurddmõš leäi smiõttâd saaʹmi jieʹllemvueiʹtlvažvuõđid da väʹldded beäʹl saaʹmid kuõskki kõõččmõõžžid. Ǩiõttʼtõllum aaʹššin vääžnʼjummuz leʹjje jååttmõʹšše, määddai âânnmõʹšše, puäʒʒhoiʹddjummša da škoouljååttmõʹšše õhttneei kõõččmõõžž.
Lââʹssteâđaid:
Tuomas Aslak Juuso
Saaǥǥjååʹđteeʹjj
040 687 3394
tuomas.juuso@samediggi.fi
Pia Ruotsala-Kangasniemi
Vaaldâšmjååʹđteeʹjj
10 839 3 106 / 40 726 2 688
pia.ruotsala@samediggi.fi
Johanna Alatorvinen
Saaǥǥtempiisar
teʹl. 10 839 3 140 / 40 663 4 493
johanna.alatorvinen(at)samediggi.fi
Liiŋk:
https://www.flickr.com/photos/samediggi-saamelaiskarajat/albums
Sääʹmteeʹǧǧ Flickr-tiillâst kaaunak snimldõõǥǥid ouddm. Sääʹmteeʹǧǧ tåimmjummšest, vuäzzlain da šõddmõõžžin. Snimldõõǥǥid vuäitt ââʹnned teâđvääʹltem kääzzkõʹstti miârktõõzzid pueʹrr naaʹlid jääʹǩǩteeʹl. Meärkak tâma snimldõõǥǥ aalǥ da snimmi nõõm.
Lââʹssteâđ Sääʹmteeʹǧǧest:
Sääʹmteʹǧǧ lij saaʹmi eeʹttkâʹsttmallaš jiijjâsvaaldâšmorgaan Lääʹddjânnmest. Jiijjâs laaʹjjin (L974/1995) vuâđđuum Sääʹmteʹǧǧ tuârvv tåimmjummšin sääʹm alggmeerkulttuur seillmõõžž da ooudâsviikkmõõžž. Sääʹmteʹǧǧ plaanad da teâuddjâtt saaʹmi ǩiõllʼlaž da kulttuursaž jiõččvaaldâšm di vuäpp da veekk ooudâs saaʹmi vuõiggâdvuõđid da jieʹllemåårrmõõžžid.
