Sääʹmteʹǧǧ ååcc markknâʹsttemjååʹđteei

Sääʹmkulttuurkõõskõs Sajos lij Aanrest, Juvduujooǥǥ reeddast. Sajos lij Lääʹddjânnam säʹmmlai parlameʹnttpõrtt, maatkčeeʹji kõʹllʼjempäiʹǩǩ di šõddmõšpäiʹǩǩ, koʹst lij vueiʹttemvuõtt riâššâd oʹdinakai pirrõõzzâst määŋgnallšem såbbrid, konfereeʹnsid da šõddmõõžžid. Sajoozz õhttvuõđâst toiʹmmai kääzzkâʹsttemjuâǥǥas, kååʹtt vaʹsttad Sääʹmteeʹǧǧ halltõõzz vuâllsažvuõđâst jeäʹrbi mieʹldd kulttuurkõõskõõzz markknâʹsttmest, Sajoozz poorrâmpäiʹǩǩtåimmʼmõõžžâst di teeknlaž da logistiikklaž kääzzkõspuuʹtʼtummšest da ǩiiddâlm tuõʹllʼjummša õhttneei tuâjain di jeeʹresnallšem šõddmõõžži riâššmõõžžâst.

Markknâʹsttemjååʹđteei tuâjaid koʹlle jm. ââʹnned huõl Sääʹmkulttuurkõõskõs Sajoozz sååbbarlõõnji da kääzzkõõzzi markknâʹsttmest da kaaupšummšest, šõddmõõžži puuʹtʼtummša da riâššmõʹšše õhttneei tuejjeem tääʹzz aaʹššin kääzzkâʹsttemjuâkkaz jeeʹres tuâjjlaivuiʹm di vaʹstteed kääzzkâʹsttemjuâkkaz tällõõzzâst. Markknâʹsttemjååʹđteei tåimm Sajoozz kääzzkâʹsttemjuâkkaz tuâjjlažjoouk vueʹssen da kääzzkâʹsttemjuâkkaz âʹlddouddooumžen. Markknâʹsttemjååʹđteei tuâjaid kooll tåimmsuârggses kuulli ouʹdde puʹhtti tuâjai spraavdõõttmõš Sääʹmteeʹǧǧ tåimmorgaanin.

Kääzzkõskõõsk teâđ

Veʹrǧǧkõskk äälǥči suåppmõõžž mieʹldd čâhčča 2025 da tõt lij viõǥǥâst tõʹst ooudårra. Tuâj tieuʹddmest jääʹǩǩtet kuuđ määnpââʹj ǩiččlõddâmääiʹj.

Tuâj tuejjeet Sääʹmkulttuurkõõskõs Sajoozzâst, Aanrest.

Ooccjest vueʹrddep

Ââʹntem-mäinnan lij tuâj oudldem ânnʼjõõvvi škooultõs di sääʹmǩiõl silttõs (asetõs 1727/95). Vergga kuulli tuâjai oʹnnsteeʹes håiddmõš ooudald ânnʼjõõvvi õllškooultuʹtǩǩõõzz, markknâʹsttemsueʹrj da sääʹmkulttuur šiõǥǥ tobddmõõžž di šiõǥǥ eŋgglõsǩiõl silttõõzz. Tuâj oʹnnsteeʹes håiddmõʹšše taarbšet šiõǥǥ õhttsažtuâjj- da säimmõõttâmtääidaid di aktiivlaž markknâʹsttemjiõgg da pâstlvažvuõđ strateeglaž juurdčummša da toiʹmmjummuž oouʹdummša.

Vueʹrddep harjjnummuž jååʹđtummša da ouddooumažtuõjju. Šiõǥǥ oummui jååʹđtemtääid, čåuddmõõžž da õhttsažtuâj oocci toiʹmmjemnääʹll âʹlddouddooumažtuâjast, teäddǩiõrddâmpâstlvažvuõtt di šiõǥǥ vuârrvaaiktem- da joukkjååʹđtummuž tääid lie tääʹrǩes vaalmâšvuõđ markknâʹsttemjååʹđteei tuâj håiddmõõžžâst.

Päʹlǩǩõs

Päʹlǩǩõs meäʹrtââvv Sääʹmteeʹǧǧ päʹlǩǩriâžldõõǥǥ väʹǯǯelvuõtt-tääʹzz III/II mieʹldd (vuâđđpäʹlǩǩ 3404,76 euʹrred/mp). Vuâđđpääʹlǩ ool määuʹset sääʹmvuuʹdest reâuǥeen 24 % sääʹmvuuʹd lââʹzz da lõõʹzzid tuõjju harjjnummuž mieʹldd.

Ooccâm

Ooccâmlomaakk di luõvâld ǩeeʹrjtum ooccâmǩeeʹrj di vueiʹtlvaž merittloǥstõõǥǥ da jeeʹres meâlddõõzzid âlgg tååimted Sääʹmteeʹǧǧ piisarkådda 21.8.2025 mõõneeʹst tän liâđǥlaž ooccâmlomaakk pääiʹǩ (ävvan ođđ ikkna): Ooccâmlomakk

Lââʹssteâđaid tuâjast oudd ääiʹjest 21.–25.7.2025 da 3.–6.8.2025 tuâjjlažkåʹddjååʹđteei Ida Pirttijärvi, ida.pirttijarvi@samediggi.fi, teʹl. 040 660 7722 da ääiʹjest 7.–21.8.2025 vaaldâšmjååʹđteei Pia Ruotsala-Kangasniemi, pia.ruotsala@samediggi.fi, teʹl. 010 839 3106.

Sajoozz da Sääʹmteeʹǧǧ toiʹmmjummša vuäitt tobdstõõttâd neʹttaddrõõzzin www.sajos.fi da www.samediggi.fi

Aanrest 21.7.2025
Sääʹmteʹǧǧ