Sääʹmteʹǧǧ ååcc mieʹrräiggsaž restrantt-tuâjjla Čaiju Restraʹntte
Sääʹmkulttuurkõõskõs Sajoozzâst Aanrest lij Restrantt Čaiju, kååʹtt tåimm kulttuurkõõskõõzz restranttân da Sajoozz noorõõttmõõžži da såbbri resttranttkääzzkõõzzin vaʹstteei puuʹtʼteeʹjen.
Resttrantt Čaiju lij äävai arggpeeiʹvi tååimeeʹl peiʹvvporrmõš- da kååʹffpäiʹǩǩen, leša pieʹǩǩ resttrantt Čaiju juõʹǩǩpeivvsaž tuâjain nårrai såbbri da jeeʹresnallšem kulttuurkõõskõõžžâst ââʹnnem šõddmõõžži kååʹfftaʹrjjummši da porrmõõžži teâuddjummšest. Restraantâst liâ tuâjast tän poodd põõšši juõʹǩǩpeivvsaž tåimmjummšest vaʹstteei kokk da restrantt-tuâjjlaž.
Mieʹrräiggsa restrantt-tuâjjla määŋgpeällsaž tuâj âʹnne seʹst äʹššneǩ-kääzzkõstuâj, kååʹff- restrantthääʹrči raajjmõš, sååbbar- da noorõõttmõõžžin taʹrjjummuž da jeeʹres restraant takai juõʹǩǩpeivvsaž tuâj di strooiʹtelhuâllai tuâjast vieʹǩǩtummuš.
Mieʹrräiggsaž restrantt-tuâjjlaž tåimm pieʹǩǩen Sajoozz kääzzkõsjuâkkâz tiim, aktiivlaž õhttsažtuâjast restraant jeeʹres tuâjjlažkooʹddin.
Kääzzkõskõskkvuõđ teâđ
Mieʹrräiggsaž tuâjj äälǥči suåppmõõžž mieʹldd vueiʹtlva sõrgg da tõt peštt 12 määnpââʹj. Tuâjjäiʹǧǧ lij 80–100 %, leʹbe 29 č–36 č 15 min/neäʹttel.
Tuâj tueʹjjeet Sääʹmkulttuurkõõskõs Sajoozz Restrantt Čaijust, Aanrest. Tuâjjäiʹǧǧ lij tääuʹjmõsân arggpeeiʹvi 8–16. Tuâj teâuddmõõžžâst jääʹǩǩtet neellj määnpââʹj ǩiččlõddâmääiʹj.
Ooʒʒjest vueʹrddep
Tuâj ââʹntemõõlǥtõssân lij suåvlaž škooultõs da sääʹmǩiõl täidd (Sääʹmteeʹǧǧ tuâjjriâššmõš 71 §). Tuõjju vaalšum tuâjjlast âlgg leeʹd hygieniapass, alkohoolpaass ǩiõččât pueʹrren. Tuâj oʹnnsteeʹjes håiddmõš õõlǥat tuâjjǩiõččlâsttmõõžž vaʹstteei tuâjain, eŋgglõsǩiõl silttummuž di njueʹbǯǯlõsvuõđ di pueʹrr äʹššneǩ-kääzzkõstääidaid.
Päʹlǩǩvuõtt
Päʹlǩǩvuõtt meäʹrtââvv Sääʹmteeʹǧǧ paʹlǩǩriâžldõõǥǥ väʹǯǯelvuõtt-tääʹzz VI/III meâldlânji (vuâđđpäʹlǩǩ 2127,68 euʹrred/mp). Vuâđđpääʹlǩ lââʹssen määuʹset sääʹm dommvuuʹdest tuâj tuejjeen 24 % sääʹmvuuʹd lââʹss da tuâjjǩiõččlâsttmõõžž mieʹldd meäʹrtõõvvi ǩiõččlâʹsttemlââʹzz.
Ooccmõš
Ooccâmlomakk, di jiijjâs maall meâldlaž ooccmõšǩeʹrjj di vueiʹtlvaž tuâjjpäiʹǩǩloǥstõk da jeeʹres meâlddõõzz âʹlǧǧe tååimted Sääʹmteeʹǧǧ piisarkådda 7.9.2026 mõõneeʹst tän liâdǥlaž ooccâmlomaakk pääiʹǩ (ävvan ođđ ikkna).
Lââʹssteâđaid tuâjast ouʹdde markknâʹsttemjååʹđteeʹjj Oula Guttorm, oula.guttorm@samediggi.fi, teʹl. 040 575 5332 da vaʹstteei kokk Sari Mikkola, caiju@samediggi.fi da teʹl. 040 588 4062
Sääʹmteeʹǧǧ tåimmjummša vuäitt tobdstõõttâd neʹttaddrõõzzâst www.samediggi.fi da Sääʹmkulttuurkõõskõs Sajoozz tåimmʼmõʹšše addrõõzzâst www.sajos.fi
Aanrest 24.8.2026
Sääʹmteʹǧǧ
