Sääʹmteʹǧǧ ååcc sääʹm-musikk-kõõskõõzz plaaneeʹj
Sääʹmteʹǧǧ iʹlmmat ooccâmnalla sääʹm-musikk-kõõskõõzz plaaneeʹj põõšši veeʹrj.
Sääʹmteeʹǧǧ vuâllsest tåimmai sääʹm-musikk-kõõskõõzz jurddjen lij tuärjjeed äʹrbbvuõđlaž sääʹm vokaalmusikkgenrei (luohti, leuʹdd da livđe) seillmõõžž da õinn ouddnummuž di tuärjjeed da viikkâd ooudâs modeeʹrn sääʹm-musiikk.
Sääʹm-musikk-kõõskõõzz tåimmjummuž jååʹđat plaaneeʹjj. Musikk-kõõskõõzz plaaneeʹjj tåimm še čiõʹlǧǧeeʹjen Sääʹmteeʹǧǧ halltõʹsse tuâjeez da tåimmsuârggses kuulli aaʹššin di tiuʹdde peejj tõn tuʹmmstõõǥǥid. Plaaneeʹj tuâjjan lij håiddad kõõskõõzz toiʹmmjempââʹjjen raʹvvjem tåimmamplaan meâldla, di še vaaldâšmjååʹđteeʹj suʹnne jeeʹrab mieʹrreem tuâjaid. Šuurmõs tuâjjobbvuõttân musikk-kõõskõõzz plaaneeʹjest lij Ijahis Idja -alggmeerai musikkfeʹsttvaal puuʹtʼteeʹjen tåimmjummuž.
Kääzzkõskõskkvuõđ teâđ
Tuâjj äälǥči suåppmõõžž mieʹldd eeʹjj 2025 poodd da tõt lij meäʹrteʹmes ääiʹj viõǥǥâst åårrai. Plaaneeʹj tuâjjäiʹǧǧ da vueiʹtlvaž vueʹssäiggsažvuõtt meäʹrtââvv Mättʼtõs- da kulttuurministeria miõttâm riikkveäʹǩǩtieʹǧǧ mieʹldd.
Tuâj teâuddmõõžžâst jääʹǩǩtet kuuđ määnpââʹj ǩiččlõddâmääiʹj.
Musikk-kõõskõõzz tåimmpäiʹǩǩ lij sääʹmkulttuurkõõskõs Sajoozzâst, Aanrest, leša tuâj lij vueiʹtlvaž tuejjeed vuäzzas ougglõstuâjjan.
Ooʒʒjest vueʹrddep
Šiõttõsvuâđlaž ââʹntem-mäinnan lij ââʹnteeʹj škooultõs di sääʹmǩiõl täidd (asetõs 1727/95). Tuâj oʹnnsteeʹjes håiddmõš õõlǥat veiddsõs sääʹmkulttuur di sääʹm musikkäʹrbbvuõđ tobddmõõžž, pueʹrr vaaldšemvuõđlaž tuâjai tobddmõõžž, oodd vaaldšed obbvuõđid plaanummšest operatiivlaž čõõđ viikkmõʹšše, pueʹrr õhttsažtuâjj- da organisâʹsttemtääidaid di čiõlgg ǩeerjlaž saaǥǥtemtääidaid.
Päʹlǩǩ
Päʹlǩǩvuõtt meäʹrtââvv Sääʹmteeʹǧǧ paʹlǩǩ-klassriâžldõõǥǥ väʹǯǯelvuõtt-tääʹzz IV/II mieʹldd (vuâđđpäʹlǩǩ obbtuâjjaaiʹjin 2998,97 euʹrred/mp). Vuâđđpääʹlǩ lââʹssen määuʹset säʹmmlai dommvuuʹdest tuâj tuejjeen 24 % sääʹmvuuʹd lââʹss da tuâjjǩiõččlâsttmõõžž mieʹldd meäʹrtõõvvi ǩiõččlâʹsttemlââʹzz.
Ooccmõš
Ooccmõšlomakk, jiõččtäättlaž di jiijjâs maall meâldlaž ooccmõšǩeʹrjj di vueiʹtlvaž tuâjjpäiʹǩǩloǥstõk da jeeʹres meâlddõõzz âʹlǧǧe tååimted Sääʹmteeʹǧǧ piisarkådda 25.10.2025 mõõneeʹst tän liâdǥlaž ooccâmlomaakk pääiʹǩ (ävvan ođđ ikkna). Ooccâmlomakk
Lââʹssteâđaid tuâjast oudd vaaldâšmjååʹđteeʹjj Pia Ruotsala-Kangasniemi teʹl. pia.ruotsala(at)samediggi.fi, teʹl. 040 726 2688
Sääʹmteeʹǧǧ tåimmjummša vuäitt tobdstõõttâd neʹttaddrõõzzâst www.samediggi.fi
Aanrest 25.9.2025
Sääʹmteʹǧǧ
