Sääʹmteʹǧǧ raavad saʹtssjummuž päärnaid da nuõrid: ođđ ouddpeâmmluʹvddkåʹdd da põõšši veʹrǧǧ tueʹrjjee oouʹdeemtuâj

Ođđ ouddpeâmmluʹvddkååʹdd tuâjjan lij raaveed sääʹm ouddpeâmm sââʹj da ooudâsviikkmõõžž. Luʹvddkååʹdd šiõtteeš Sääʹmteeʹǧǧ tiuddsåbbrest 17.6.2026. Ouddpeâmmluʹvddkååʹdd saaǥǥjååʹđteeʹjen tåimm Sääʹmteeʹǧǧ vuäzzlaž Leena Niittyvuopio-Jämsä Uccjooǥǥâst da väärrsaaǥǥjååʹđteeʹjen Sääʹmteeʹǧǧ vuäzzlaž Aslak Pekkala Aanrest. Jeeʹres vuäzzlai da väärrvuäzzlai nõõm käunnʼje tän artikkeeʹl looppâst.

Sääʹmteeʹǧǧ sååbbar tuʹmmji ođđ põõšši ouddpeâmmaaʹšši sueʹrǧǧäʹšštoobdi veeʹrj vuâđđummšest tiuddsåbbrest 14.4.2026 tuâjjriâššâmoođummuž õhttvuõđâst. Veʹrǧǧ leäi äävai njuhčč-vueʹssmannu poodd da Sääʹmteeʹǧǧ halltõs vaʹllji vergga Anni Koivisto såbbreʹstes 22.6.2026. Koivisto lij alttääm veeʹrjest påʹrǧǧmannust 2026. Ođđ veeʹrj vuâđđummuš lij vueiʹtlvõsttum sääʹmteʹǧǧlääʹjj nuäjja vuõǯǯum teäggtõõzz veäkka.

Kueʹhtt äʹšštoobdi tueʹrjjeʹmen sääʹm ouddpeâmm ooudâsviikkmõõžž

Ođđ veeʹrj mieʹtt Sääʹmteeʹǧǧest tåimma kueʹhtt sueʹrǧǧäʹšštoobdi ouddpeâmm aaʹšši kõõskâst.

Ouddpeâmmaaʹšši sueʹrǧǧäʹšštobddi Anni Koivisto tuâj čiŋlmâʹvve ouddpeâmmkääzzkõõzzi tuõrvvmõʹšše da riikkveäʹǩǩtieʹǧǧi vaaldšummša. Sääʹm ouddpeâmm pedagogiikk sueʹrǧǧäʹšštoobdi Niina-Aikio Siltala tuâj čiŋlmâʹvve ouddpeâmm pedagogiʹǩǩe.

Riâššmõš raavad Sääʹmteeʹǧǧ vueiʹtlvažvuõđid taʹrjjeed pedagooglaž tueʹrj nuʹt jieʹnnǩiõllsai päärnai ouddpeâmm ǥu ǩiõllpieʹsståimmjummuž taarbid.

Ravvsab sääʹm ouddpeâmm årra

Sääʹmteeʹǧǧ ouddpeâmmluʹvddkåʹdd oouʹdad sääʹmpäärnai vuõiggâdvuõđid jiijjâsǩiõllsiʹžže ouddpiõmmu, valmštââll Sääʹmteeʹǧǧ peäʹlestvälddmõõžžid da eʹtǩǩõõzzid di vaʹsttad sääʹmǩiõllsa ouddpeâmm da ǩiõllpieʹsståimmjummuž riikkveäʹǩǩtieʹǧǧi ǩiõttʼtõõllmõõžžâst, vuåppmõõžžâst da vaaldšemtuâjast.

– Ouddpeâmm âlgg leeʹd raavâs tuäʹrjj päärnažpiârrjid sääʹmǩiõli ja kulttuur serddjummšest. Sääʹm ouddpeâmm âlgg raajjâd kuʹǩesäiggsânji nuʹt, što juâkksaž sääʹmpäärnaž vuäǯǯ ouddpeâmm, kååʹtt tuäʹrjj päärna kulttuur da ǩiõllpälggaz pueʹrmõsân. Ođđ luʹvddkåʹdd oudd miʹjjid veâl pueʹrab vueiʹtlvažvuõđid väʹldded lokku nuʹt jieʹnnǩiõllsai päärnai ouddpeâmm ǥu ǩiõllpieʹsståimmjummuž taarbid, leša veekk tõid ooudâs õhttân obbvuõttân, särnn ouddpeâmmluʹvddkååʹdd saaǥǥjååʹđteeʹjj Leena Niittyvuopio-Jämsä.

Vaalpââʹj tåimmamprograammâst liâ meäʹrtõllum ouddpeâmm teäddpääiʹǩ

Sääʹmteeʹǧǧ vaalpââʹj kõskksaž täävtõõzz ouddpeâmmast liâ jm. sääʹmǩiõllsa ouddpeâmmškooultõõzz lââʹzztummuš, sääʹmǩiõllsai pedagooglaž liʹnjjʼjõõzzi raajjmõš, di sääʹmǩiõllsai ouddpeâmmkääzzkõõzzi tuõrvvmõš veeʹzz jânnam.

Jeäʹrben teäddpäiʹǩǩen tän vaalpââʹjest sääʹm ouddpeâmm ooudâsviikkmõš Jeänõõǥǥâst. Ouddpeâmmast leät saǥstõõllâm kooʹddin jeeʹres saǥstõõllmõõžžin da vueiʹnnlõõttmõõžžin. Sääʹmteeʹǧǧ täävtõssân lij taʹrjjeet tueʹrj nuʹt kooʹddid ǥu piârrjid, što puk sääʹmǩiõllsa päärna piâzzče ouddpeâmm kruuʹǧǧe.

– Päärna da nuõr liâ mij kulttuur da ǩiõli pueʹttiäiʹǧǧ. Ođđ ouddpeâmmluʹvddkååʹdd da põõšši äʹšštobddiveeʹrj mieʹtt vueiʹttep oouʹdab pueʹrben ainsmâʹtted, što veâl määŋgain päärnain lij vueiʹtlvažvuõtt jiijjâsǩiõllsiʹžže da vueʹǩǩšõs ouddpiõmmu, tuâtt Sääʹmteeʹǧǧ saaǥǥjååʹđteeʹjj Pirita Näkkäläjärvi.

Sääʹmteʹǧǧ toobdast, što sääʹm ouddpeâmm ooudâsviikkmõš õõlǥat še juätkast ravvsab resursâsttmõõžž. Sääʹmteʹǧǧ lij čuäʹjtam jm. pååđmieʹrrtieʹǧǧ ouddpeâmm materiaali puuʹttummša.

Ouddpiõmmu õhttneei aaʹššin vuäitt juätkast leeʹd õhttvuõđâst:

Tuomas Aslak Juuso
II väärrsaaǥǥjååʹđteeʹjj
040 687 3394
tuomas.juuso@samediggi.fi

Anni Koivisto
Sueʹrǧǧäʹšštobddi, ouddpeâmmääʹšš
044 775 6560
anni.koivisto@samediggi.fi

Niina Aikio-Siltala
Sueʹrǧǧäʹšštobddi, sääʹm ouddpeâmm pedagogikk
040 487 5414 / 010 839 3115
niina.aikio-siltala@samediggi.fi

Lââʹssteâđaid oudd:

Pirita Näkkäläjärvi
Saaǥǥjååʹđteeʹjj
044 753 3766
pirita.nakkalajarvi@samediggi.fi