Sääʹmteeʹǧǧ kulttuurluʹvddkåʹdd lij ääʹvääm ooccâmnalla kulttuurveäʹǩǩtieʹǧǧ 2027
Sääʹmteeʹǧǧ kulttuurluʹvddkåʹdd lij õlmstâttam ooccâmnalla kulttuurveäʹǩǩtieʹǧǧid riikk tällõsarvvlõõzzâst (väʹlddklass 29, mättʼtõsministeria), kooi täävtõssân lij oouʹdeed sääʹmǩiõllsaž kulttuur seillmõõžž da ooudâsviikkmõõžž, di tâʹvvjânnmallaš sääʹmorganisaatioi da Uccjooǥǥ Sääʹmceerkavǩeâmpi âʹlnn âânnmõõžž. Ooccâmäiʹǧǧ lij 1.10.–31.10.2026 kõskksaž poddân.
Sääʹm kulttuurmieʹrrtieʹǧǧest jueʹjjet piiri-iiʹjji ooccmõõžžâst veäʹǩǩtieʹǧǧid sääʹmčeäppõõzz da -kulttuur jeeʹres suõʹrjid di sääʹmorganisaatioid. Sääʹmteeʹǧǧ tuâjjriâššmõõžž mieʹldd veäʹǩǩtieʹǧǧid miõđât väʹlddveärlaž kulttuurveäʹǩǩteäʹǧǧen mâta projeʹkttveäʹǩǩteäʹǧǧ, tuejjummuž- leʹbe jeeʹres veäʹǩǩteäʹǧǧ da õõlmtõstuärjjõs di sääʹmorganisaatioi tåimmam- da projeʹkttveäʹǩǩteäʹǧǧen.
Ooccâmlomaakk liâ Sääʹmteeʹǧǧ neʹttseeidain addrõõzzâst: https://samediggi.fi/vastuualueet/kulttuuri/kulttuurimaararaha/ Veäʹǩǩteäʹǧǧooccmõõžžid vuäitt tååimted digitaalʼlânji, persoonlânji leʹbe äʹššoummu ââʹneeʹl, vuõltteed neʹttpååʹštin leʹbe pååʹštin. Veäʹǩǩteäʹǧǧooccmõõžži vuõlttummuš šâdd vuõltteeʹj vasttõõzzin.
Veäʹǩǩteäʹǧǧooccmõõžž âʹlǧǧe čuäʹjted Sääʹmtegga mââimõssân 31. kålggmannust 2026 čiâss 16.15 mõõneeʹst addrõõzzin: info@samediggi.fi leʹbe Sääʹmteʹǧǧ, Sajos, 99870 Inari.
Lââʹssteâđ:
Riitta Orti-Berg
Sueʹrǧǧäʹšštobddi, sääʹmkulttuur
040 840 0383 / 010 839 3103
riitta.orti-berg@samediggi.fi
