Eettlânji ǩeâllʼjeei alggmeerturiism noorõõttmõš Aanrest

Sääʹmteeʹǧǧ halltõõzz vuäzzlaž Tauno Ljetoff ääʹvii konfereeʹns seärad 21.5. tuõđeeʹl, mäʹhtt turismm lij ååʹn še määŋgaid säʹmmlaid vääžnai jieʹllemvueʹjj käivv, da tõt jåått täujja ǩiõtt ǩiõđâst äʹrbbvuõđlaž säʹmmlai jieʹllemvuõʹjjivuiʹm. – Äʹrbbvuõđlaž jieʹllemvuõʹjji da turiism õʹhttesuåvtummuš lij vääžnai, da ååskam, što sertifiâʹsttemtuâjain vueiʹttep raajjâd oouʹdab pueʹrab tåimmamnaaʹlid, särnn Ljetoff.

Ljetoff puuʹti tiõrvvʼvuõttsaakkvuârast ouʹdde, mäʹhtt vaʹstteei sääʹmturiism sertifikatt lij puki pueʹrren, ǥu tõt raavad nuʹt sääʹmkulttuur, Sääʹmjânnam luâđ, ǥu pukveeʹzz sääʹmõutstõõzz. Seämmavuâra tõt täʹǩǩad še pukid tääiʹben kuõʹssjeeʹjid tõn, mâid sij kueʹssjemreeisast täujja jäänmõsân tuäivva: veärla da seämmapoodd sääʹmõutstõʹsse da luõttu ǩeâllʼjeeʹjab toobdâlm.

– Sertifikatt-tuâjain lij jõrddmõssân ouddâl puki čiõlǥted sääʹmturiism ânnʼjõžvueʹjj, što vueiʹttep pueʹrben tuärjjeed vuõiggnalla da ǩeâllʼjeei naaʹlin tåimmai vueʹssbeäʹlid. Samai vääžnai miʹjjid lij teâđast raaveed säʹmmlai jiijjâs tåimmamoudldõõzzid turismmsueʹrjest, särnn Ljetoff.

Alggmeerkonfereeʹns jäʹrjste õhttsažtuâjast World Indigenous Tourism Alliance (WINTA), Sääʹmteʹǧǧ da Lappi universiteʹtt. Mââibaarǥ 20.5. konfereeʹns alttii tuʹtǩǩeeisymposium, koon teeʹmmen leäi turismm da alggmeerai kulttuuräʹrbb. Seärad 21.5. da neljdpeeiʹv 22.5. konfereeʹnsest ǩiõttʼtõõlât eettlânji ǩeâllʼjeei alggmeerturiism vuõʹjjid. Tääʹrǩab teeʹmmen liâ turiismâst äuʹǩǩeemnalla åårrai sertifikaatt, ǩeâllʼjeei turismm da alggmeerturiism kauppõõllmõš da markknâsttmõš. Mättʼtõs- da kulttuurministeria lij miõttâm spesiaalveäʹǩǩtieʹǧǧ konfereeʹns jäʹrjstummuž vääras. Tobdstõõđ tääʹrǩben konfereeʹns prograʹmme tääiʹben.

Sertifikatt-tuâjain tuärj säʹmmlai põõrǥâsniiʹǩǩi ǩeâšttõõttâmoʹdde

Sääʹmteeʹǧǧ čiiččad sääʹmturismmhaʹŋǩǩõs, Vasan matka leʹbe vaʹstteemvuõđlaž sääʹmturiism sertifikatt: tåimmam-maall da digitaalʼlaž ooccâmseiddõõzz ooudâsviikkmõš, čiŋlmââvv vaʹstteemvuõđlaž sääʹmturiism sertifikatt-tuõjju. Sertifikaatt miârktõssân lij kaggâd ouʹdde vaʹstteemvuõđlaž da eettlânji ǩeâllʼjeei sääʹmtåimmjid da -ouddsid, da nääiʹt tuärjjeed sääʹm põõrǥâsniiʹǩǩi ǩeâšttõõttâmoodd pueʹreei tåimmampirrõõzz. Haʹŋǩǩõõzz teâuddjâʹttemäiʹǧǧ lij 11.7.2024-30.6.2025 da haʹŋǩǩõs lij Euroopp unioon teäggtem – NextGenerationEU.

Seärad 21.5. konfereeʹnsest čuäjtõʹlleš hämmaz ođđ sertifikaattâst Lääʹddjânnmest tåimmai vaʹstteemvuõđlaž da eettlânji ǩeâllʼjeei sääʹm turismmpõrggsid. – Ååʹn vaʹstteemvuõđlaž sääʹmturiism sertifikaatt kriteeʹrkååʹdd kommeʹnttpââʹjest da töʹst tõt mâânn Sääʹmteeʹǧǧ jieʹllemvueʹǩǩ- da vuõiggâdvuõttluʹvddkååʹdd ǩiõttʼtõõllmõʹšše. Kriteeʹrkååʹdd ǩiõttʼtââll veâl Sääʹmteeʹǧǧ halltõs ouddâl ǥu tõt mâânn Sääʹmteeʹǧǧ såbbar priimmâmnalla, särnn haʹŋǩǩõõzz plaanraajji Kirsi Suomi.

Sääʹmteʹǧǧ lij ääiʹjab vuäǯǯam mättʼtõs- da kulttuurministeriast riikkveäʹǩǩtieʹǧǧ kuʹtte sääʹmturismmhaʹŋǩǩõʹsse. Täi haʹŋǩǩõõzzi poodd liâ jeäʹrbi mieʹldd rajjum Vaʹstteemvuõđlaž da eettlânji ǩeâllʼjeei sääʹmturiism tåimmamvuâđđjurddi, koon Sääʹmteʹǧǧ priimi såbbreʹstes čõhččmannust 2018 di Vaʹstteemvuõđlaž turiist raʹvvjõs sääʹmkulttuuʹre da säʹmmlai dommvuuʹd maaiʹlm, koon õlmstõʹtteš 16.5.2022.

Lââʹssteâđ:

Kirsi Suomi
Plaanraajji, Vasan matka – vaʹstteemvuõđlaž sääʹmturiism sertifikatt -haʹŋǩǩõs
040 594 5492
kirsi.suomi@samediggi.fi