Teâđtõs eeʹjj 2027 sääʹmteʹǧǧvaali vaal-loǥstõʹǩǩe ooʒʒõõttmõõžžâst

Eeʹjj 2024 sääʹmteʹǧǧvaaʹlin vaal-loǥstõʹǩǩe miõrkkum oummuin jeät õõlǥât ođđ ooccâmlomaakk tiuddmõõžž. Eeʹjj 2024 vaalin vaal-loǥstõʹǩǩe miõrkkum ooumaž vääʹldet vaal-loǥstõʹǩǩe ooccmõõžžtaa, jõs son teâudd viõǥǥâst åårrai lääʹjjest šiõttuum vaal-loǥstõʹǩǩe meärkkmõõžž õõlǥtõõzzid. Vaal-luʹvddkåʹdd räukk taarbšeen lââʹssčiõlǥtõõzzid.

Ooʒʒõõttâmlomaakk eeʹjj 2027 vaal-loǥstõʹǩǩe õlmstââʹttet, ǥu vuõiggâdvuõttministeria asetõs sääʹmteʹǧǧvaalin jääʹǩǩtemvuâla mõõntõõllmõõžžâst lij oođuum, kuuitâǥ mââimõõzzâst 15.8.2026. Raukkmõš eeʹjj 2027 vaal-loǥstõʹǩǩe välddmõššân leʹbe tõʹst jaukkeem diõtt âlgg tååimted vaal-luʹvddkådda liâdǥlânji leʹbe pååʹšt mieʹldd nuʹt, što tõt lij mââimõõzzâst čõhččmannu 30. peiʹvven 2026.

Lääʹjj sääʹmteeʹǧǧest 974/1995 3 § (27.6.2025/414) mieʹldd:

“Vuõiggâdvuõtt šõddâd miõrkkumnalla vaal-loǥstõʹǩǩe lij oummust, ǩii âânn jiijjâs säʹmmliʹžžen, õõlǥteeʹl što:

1) ooumaž jiõčč leʹbe kuuitâǥ õhtt suu puärrsin leʹbe maaddârpuärrsin leʹbe maaddârääʹjjest leʹbe maaddârääkkast lij mättjam sääʹmǩiõl vuõssmõs ǩiõllân; leʹbe

2) kuuitâǥ õhtt suu puärrsin lij miõrkkum leʹbe lij leämmaž miõrkkum jiõnnvuõiggâdvuõttneʹǩǩen 1. ođđeeʹjjmannu 2027 leʹbe tõn mâŋŋa jäʹrjstum sääʹmteeʹǧǧ vaalin.

Vaal-loǥstõʹǩǩe meärkkmõõžž õõlǥtõssân lij še, što tän lääʹjjest šiõttuum ââʹjj, meerlažvuõđ da meerǩeeʹrjtueʹllʼjõõzz kuõskki jiõnnvuõiggâdvuõđ jeeʹres õõlǥtõõzz teâuddje.”

Lââʹssen:

“Sääʹmteeʹǧǧ vaal-loǥstõʹǩǩe meärkkmõõžž õõlǥtõssân lij oummu jälstempäikka ǩiõččkani tõn lââʹssen, mâid 3 §:st šiõtteet, što ooumaž teâudd mââimõõzzâst vaaltååimtõõzz mââimõs peiʹvven 18 eeʹǩǩed da što son lij Lääʹddjânnam meerlaž leʹbe suʹst lij ålggjânnam meerliʹžžen leämmaž dommkåʹddlääʹjjest (201/1994) jurddum dommkåʹdd Lääʹddjânnmest tâʹl, ǥu ooccmõš vaal-loǥstõʹǩǩe välddmõõžžâst âlgg mââimõõzzâst tueʹjjeed.” Lääʹǩǩ sääʹmteeʹǧǧest 974/1995 21 § (27.6.2025/414).

Lââʹssteâđ:

Sääʹmteeʹǧǧ vaal-luʹvddkåʹdd
Sääʹmkulttuurkõõskõs Sajos
vaalit(at)samediggi.fi