Sääʹmǩiõllsai mättmateriaali puuʹtʼtõõzz teäggtõs juätkkai seämma tääʹzzest eeʹjj 2027 riikk tällõsarvvlõseʹtǩǩõõzzâst
Sääʹmteʹǧǧ da sääʹmvuuʹd kååʹdd âʹnne riikk tällõsarvvlõseʹtǩǩõõzz samai vääžnʼjen sääʹmǩiõllsai mättmateriaali puuʹtʼtõõzz di sääʹmǩiõli mättʼtõõzz beäʹlnn pukin kooumin Lääʹddjânnmest jieʹlli sääʹmǩiõlin: nuõrtt-, aanar- da tâʹvvsääʹmǩiõʹlle.
Lääʹdd ruõcclaž meerpeällõõǥǥ (RKP) õlmstâʹttem teâđai mieʹldd Lääʹdd halltõs tuʹmmji budjeʹttsmiõttmest 1. čõhččmannust siiʹsǩjâʹtted eeʹjj 2027 tällõsärvvlõseʹtǩǩõʹsse ehdtõõzz sääʹmǩiõllsai mättmateriaali teäggtõõzz seeiltummšest eeʹjj 2026 tääʹzzest leʹbe 800 000 eeuʹrest. Eeʹjj 2027 täällarvvlõseʹtǩǩõs uuʹdet eeʹttiǩ-kådda riikksuåvtõõzz takai-išttmest 21. čõhččmannust da õlmstââʹttet tõn mâŋŋa addrõõzzâst budjetti.vm.fi.
Eeʹjj 2027 tällõsärvvlõseʹtǩǩõõzzâst sääʹmǩiõllsa mättmateriaalpuuʹttʼtõõzz mieʹrrtieʹǧǧ eʹtǩǩeeš aalǥâst ǩieʹppeemnalla 200 000 eeuʹrin. Kõõččmõš leʹčči leämmaž miârkteei 25 proseeʹnt čuõppmõõžžâst vueʹjjest, koʹst sääʹmǩiõllsai mättmateriaali tarbb lâssan čõõđ ääiʹj.
Sääʹmteeʹǧǧest da sääʹmvuuʹdi kooʹddin leʹbe Jeänõõǥǥ, Aanar, Suäʹđjel da Uccjooǥǥ kooʹddin lij õhttsaž vuäinnmõš mättmateriaalpuuʹttʼtõõzz vääžnaivuõđâst kooum Lääʹddjânnmest jieʹlli sääʹmǩiõl leʹbe nuʹt säärneeʹl nuõrtt-, aanar- da tâʹvvsääʹm mättʼtõʹsse.
– Tät lij vääžnai da vasttõõzzlaž räʹtǩǩummuš. Vueʹǩǩež mättmateriaal liâ kõskksaž õõudldõs sääʹmǩiõl mättʼtõõzz kuʹǩesäiggsaž ooudâs viikkmõʹšše. Tuʹmmstõk tuäʹrjj päärnain da nuõrin vueiʹtlvažvuõđid mättjed da ââʹnned ǩiõlâs aarǥâst, särnn Sääʹmteeʹǧǧ saaǥǥjååʹđteeʹjj Pirita Näkkäläjärvi.
Sääʹmteʹǧǧ da sääʹmvuuʹd kååʹdd nuäjjõʹtte budjeʹttproseeʹss poodd õõutsââʹjest sääʹmǩiõllsa mättmateriaalmieʹrrtieʹǧǧ seeiltummuž peäʹlest. Sääʹmteʹǧǧ da sääʹmvuuʹd kååʹdd späʹssbâʹšše mättʼtõs- da kulttuurminister Anders Adlercreeutz di riikksuåvtõõzz teäggtõõzz huõl âânnmõõžžâst eeʹjj poʹdde 2027.
Sääʹmteeʹǧǧest lij väʹlddkååddlaž vasttõs sääʹmǩiõllsa mättmateriaalpuuʹttʼtõõzz ooudâsviikkmõõžžâst pukin kooumin Lääʹddjânnmest jieʹlli sääʹmǩiõlin: nuõrtt-, aanar- da tâʹvvsaaʹmin.
– Lij vääžnai, što sääʹmǩiõllsai mättmateriaali puuʹttummuž pukin kooumin Lääʹddjânnmest jieʹlli sääʹmǩiõlin pââʹstet viikkâd ooudâs kuʹǩesäiggsânji digitaalʼlaž ǥu tiõddum ååʹblǩest. Tät õõlǥat riikkâst čõnnõõttmõõžž riʹjttjeei teäggtõʹsse, särnn sääʹmteeʹǧǧ II väärrsaaǥǥjååʹđteeʹjj Tuomas Aslak Juuso.
Sääʹmvuuʹd kooʹddin lij mättʼtõõzz jäʹrjsteeʹjen vasttõs sääʹmǩiõl mättʼtõõzz da sääʹmǩiõllsa mättʼtõõzz jäʹrjstummšest.
– Mättmateriaal liâ mättʼtõõzz vuâđđõõudldõs. Riikk âlgg täʹǩǩeed mättmateriaali vuäǯǯamvuõtt, što sääʹmǩiõli mättʼtõs vueiʹtet jäʹrjsted vueʹǩǩšânji, õõutverddsânji da mättʼtemplaani meâldlânji, tueʹtte sääʹmvuuʹd kåʹddjååʹđteeʹj.
Mättmateriaalid taarbšet nuõrtt-, aanar- da tâʹvvsääʹm mättʼtõõzzâst jeeʹres beäʹlnn Lääʹddjânnam. Sääʹmǩiõl leʹbe sääʹmǩiõllsaž mättʼtõõzzâst leʹjje lookkâmeeʹǩǩen 2025–2026 õhttsiʹžže 823 škooulneeʹǩǩ/mättʼtõõđi vuõssmättʼtõõzzâst lookkjiškoouʹle pirr Lääʹddjânnam. Mättʼtõõđji meäʹr lâssnummuš di ougglõsõhttvuõđid äuʹǩǩeei mättʼtõõzz lâssnummuš čuäʹjte sääʹmǩiõllsaž mättmateriaali šõõddi taarb.
Sääʹmteʹǧǧ da sääʹmvuuʹd kååʹdd juäʹtǩǩe õhttsažtuâj mättmateriaalteäggtõõzz ooudâsviikkmõššân pueʹttiääiʹjest, što pukin sääʹmpäärnain da -nuõrin lij vueiʹtlvažvuõtt mättjed da ââʹnned ǩiõlâs.
Lââʹssteâđaid ouʹdde:
Pirita Näkkäläjärvi
Saaǥǥjååʹđteeʹjj
044 753 3766
pirita.nakkalajarvi@samediggi.fi
Tuomas Aslak Juuso
II väärrsaaǥǥjååʹđteeʹjj
040 687 3394
tuomas.juuso@samediggi.fi
Eero Ylitalo
Kåʹddjååʹđteeʹjj, Jeänõõǥǥ kåʹdd
040 5704073
eero.ylitalo@enontekio.fi
Tommi Kasurinen
Kåʹddjååʹđteeʹjj, Aanar kåʹdd
050 548 4123
tommi.kasurinen@inari.fi
Jari Rantapelkonen
Kåʹddjååʹđteeʹjj, Suäʹđjel kåʹdd
040 615 9880
jari.rantapelkonen@sodankyla.fi
Päivi Kontio
Kåʹddjååʹđteeʹjj, Uccjooǥǥ kåʹdd
040 744 7630
paivi.kontio@utsjoki.fi
