Sääʹmteʹǧǧ ääʹjast leekk tuõttvuõtt- da suåvâdvuõttkomissio komissaarid teâđõlmmʼmummuž riikkciistâst

Säʹmmlai tuõttvuõtt- da suåvâdvuõttkomissio komissaar leʹjje õhtt teâđõlmmʼmummuž riikkciist 2026 vuäǯǯjin. Ciist miõʹtteš vaiggâd histoorla tobdlmi ouʹdde pohttmõõžžâst õhttsažkååddla fiʹttjummuž lââʹzztem diõtt da saǥstõõllmõõžž ooudâsviikkmõššân.

Tiõđ- da kulttuurminister Mari-Leena Talvitie juõʹjji ciistid 8.6.2026 Oulust komissaarid di ciisti vuäǯǯai liâ vuõiggâdvuõtt-tiõtti tohtor Hannele Pokka, vaaldâšmtiõttji maister Irja Jefremoff, aaʹrhelpispp emeritus, teologia tohtor Kari Mäkinen, universiteʹttlehtor emerita, õhttsažkåʹddtiõttji tohtor Anni-Siiri Länsman da puäʒʒhåiddai da põõrǥâsneǩ Heikki Paltto.

– Sääʹmteʹǧǧ ääʹjast leekk lääskvânji tuõttvuõtt- da suåvâdvuõttkomissio komissaarid miârkteei tobdstõõzzâst. Tobdstõs lij še späʹsseb tõid 400 säʹmmlaid, kook juõʹǩǩe mainseez komissioin da kooi toobdâlm leʹjje vuâđđan tuõttvuõtt- da suåvâdvuõttkomissio veiddsõs rapoʹrtte, särnn Sääʹmteeʹǧǧ saaǥǥjååʹđteeʹjj Pirita Näkkäläjärvi.

Vuâđđtõõllmõõžžin tuõđât, što Säʹmmlai tuõttvuõtt- da suåvâdvuõttkomissio tuâjast õlmmsa puhttum teâtt šeejšâstt nuʹt tuʹmmstõktuõjju ǥu takai saǥstõõllmõʹšše da kulttuuʹre. Lääʹddjânnam riikk lij rajjʼjõõvvâm läʹddlai da säʹmmlai jânnmid, leša säʹmmlai toobdâlm liâ kuuʹǩǩ juʹn pääccam privattân. Tåimmai da vuõiggâdvuõđmeâldla õhttsažkååʹdd õõlǥtõssân lij odd väʹldded vuâstta histoorâs čuõʹccipaaiʹǩid. Tät õõlǥat, što vaiggâd da tååʹsǩ šõddääm tobdlmid puuʹtet kuâsttjeeʹjen da ǩiõttʼtõõllâmnalla. Tåʹlǩ nääiʹt raajât vuâđđ juätkktuõjju da õhttsažkååddliʹžže puârrnummša.

Suåvâdvuõđ raajjmõš lij kuʹǩespeeštlaž tuâjj

Riikkciist vuâđđtõõllmõõžžin tuõđât še, što Säʹmmlai tuõttvuõtt – da suåvâdvuõttkomissio tuâjj raavad teâđ pääiʹǩ õudldõõzzid säʹmmlažvuõđ pueʹttiääiʹj raajjmõʹšše Lääʹddjânnmest.

Sääʹmteʹǧǧ âhtt tän jorddmõʹšše. Suåvâdvuõđ raajjmõš lij kuʹǩespeeštlaž tuâjj šiõǥǥ õhttsažtuâjast.

–Tuõttvuõtt- da suåvâdvuõttkomissiotuâjj lij miʹjjid jõnn vueiʹtlvažvuõtt. Tuõttvuõtt- da suåvâdvuõttkomissio eʹtǩǩõõzzi vuâđald lij vueiʹtlvaž vuäǯǯad äigga tuõtt muttsid da ođđ aalǥ sääʹmaaʹššin Lääʹddjânnmest. Sääʹmteeʹǧǧ vuârddmõõžž liâ pâʹjjen juätkktuâj beäʹlnn, särnn saaǥǥjååʹđteejj Näkkäläjärvi.

Tuõttvuõtt- da suåvâdvuõttkomissio eʹtǩǩii lopprapoortâst 68 tåimmeʹtǩǩõõzz. Eʹtǩǩõõzz tuâǥǥast lij komissio vuäǯǯam fiʹttjummuš säʹmmlai pueʹr pueʹttiääiʹj õõlǥtem poliittlaž liʹnjjʼjummšin da tååimain.

Säʹmmlai tuõttvuõtt- da suåvâdvuõttkomissio siâzztõõzzid ärvvtõõlli parlamentaarlaž tuâjj-joukk lij alttääm tuâjas väʹlddpiisren oouʹdab väʹlddminister Antti Rinne. Parlamentaarla tuâjj-joouk tuâj tuärjjad Säʹmmlai tuõttvuõtt- da suåvâdvuõttkomissio siâzztõõzzid ärvvtõõlli parlamentaarlaž tuâjj-joouk koordinaatio- da vuåppâmjoukk, koʹst liâ eeʹttkâʹsttemnalla še Sääʹmteʹǧǧ da Saaʹmi Siidsååbbar.

Sääʹmteʹǧǧ tuʹmmji såbbreʹstes 26.2.2026 peäʹlest välddmõõžžin tåimmeʹtǩǩõõzzid. Puk tååimaid vuõiʹnneš kaʹnntemnallšeʹmmen, leša lââʹssen Sääʹmteʹǧǧ noori kõõsksummuž ǩirrsallaž tååimaid kuõiʹtin lââzztõõzzin.

Riikksuåvtõs šiõttii Säʹmmlai tuõttvuõtt- da suåvâdvuõttkomissio õhttsažtuâjast Sääʹmtiiʹǧǧin da Saaʹmi siidsåbbrin 28.10.2021 .

Lââʹssteâđaid oudd:

Pirita Näkkäläjärvi
Saaǥǥjååʹđteeʹjj
044 753 3766
pirita.nakkalajarvi@samediggi.fi