Sääʹmteʹǧǧ vuõiʹni europarlamentaarniiʹǩǩid Renew Europe jooukâst
Sääʹmteʹǧǧ vuõiʹni Euroopp parlameeʹnt Ođsmõõvvi Euroopp-joouk (eng. Renew Europe) eeʹttǩeeʹjid Suâlčiõʹljest 27. pâʹsslâšttam-mannust vueʹssen joouk Lääʹddjânnam kuõʹssjummuž. Vueiʹnnlõõttmõʹšše Sääʹmteeʹǧǧest vuässõʹtte saaǥǥjååʹđteeʹjj Pirita Näkkäläjärvi, halltõõzz vuäzzlaž Asko Länsman, vuäzzlaž Leena Niittyvuopio-Jämsä di meeraikõskksaž aaʹšši piisar Inka Saara Arttijeff.
Renew Europe -joouk, Sääʹmteeʹǧǧ da RKP Sääʹmm eeʹttǩeeʹj Suâlčiõʹljest 27.3. Snimldõk: Renew Europe.
Vueiʹnnlõttmõõžžâst saǥstõʹlleš ääiʹjpoddsaž säʹmmlaid kuõskki kõõččmõõžžin, jeäʹrben EU tuʹmmstõktuâj vaaiktõõzzin säʹmmlai vuõiggâdvuõđid, sääʹmǩiõlid, luâttreeʹǧǧesvuõđid, äʹrbbvuõđlaž jieʹllemvuõʹjjid di äimmõsmuttâz šiõttlõõvvmõʹšše. Saǥstõõllmõõžžin teäddjõʹvve še säʹmmlai vuässõõttâmvuõiggâdvuõđ EU:st di tarbb nââneed vuõigg vuârrsaǥstõõllmõõžž EU-tåimmorgaani da sääʹminstituutioi kõõskâst. Lââʹssen saǥstõʹlleš tuõrvlažvuõđâst da vaʹrrjõõttmõõžžâst, kook leʹjje Renew Europe -joouk Lääʹddjânnam-kuõʹssjem teeʹm.
– Lij vääžnai, što eurooppla tuʹmmjeeʹj liâ kuõʹssjeʹmmen Sääʹmjânnmest da tobdstâʹtte pääiʹǩ âʹlnn säʹmmlai jieʹllemnälla, sääʹmǩiõlid da äʹrbbvuõđlaž jieʹllemvuõʹjjid, särnn Sääʹmteeʹǧǧ saaǥǥjååʹđteeʹjj Pirita Näkkäläjärvi.
Sääʹmteʹǧǧ puuʹti ouʹdde, što håʹt EU šiõttõõllmõõžžin da teäggtõsneävvain liâ miârkteei vaaiktõõzz säʹmmlai dommvoudda, säʹmmlain jiâ ååʹn leäkku riʹjttjeei vueiʹtlvažvuõđ vuässõõttâd EU tuʹmmstõktuõjju siʹjjid kuõskki aaʹššin.
–EU-ääʹšš liâ õhtt Sääʹmteeʹǧǧ jooʹtti pââʹj väʹlddtäävtõõzzin. EU vaaikat säʹmmlai aʹrǧǧe, leša Sääʹmteʹǧǧ ij piâzz vaaikted EU tuʹmmstõktuõjju, håʹt-i säʹmmla liâ EU vuuʹd oʹdinak alggmeer. Tääzz ǩiččlep vuäǯǯad muttâz, Näkkäläjärvi särnn.
– Sääʹmteʹǧǧ âânn vääžnʼjen, što EU-tuʹmmjeeʹji kuõʹssjummuž Sääʹmjânnma juätkkje da što vuârrsaǥstõõllmõõžž čiŋlmââʹttet kuʹǩesäiggsânji, juätkk Näkkäläjärvi.
Saǥstõõllmõõžžin ǩiõttʼtõʹlleš konkreettlaž kuånstid nââneed säʹmmlai sââʹj EU:st, håʹt-i õhttsažtuâj čââvummuš Euroopp parlameeʹntin di veâl põõššjab vuässõõttâm-mekaniismi ooudâsviikkmõõžž.
Euroopp parlameeʹnt vuäzzlaž Anna-Maja Henriksson raavii vuârrsaǥstõõllmõõžž miârktõõzz.
– Lij vääžnai, što EU:st kuulât säʹmmlaid sij jiijjâz vueʹlǧǧemsõõʹjin da nââneet õhttsažtuâj Sääʹmtiiʹǧǧin. Leäm samai rämmai tõʹst, što historiallaž jõnn, pâʹjjel 20 europarlamentaarneeʹǩǩ delegaatio kuõʹssji Tâʹvv-Lääʹddjânnmest da vuõiʹni Sääʹmteeʹǧǧ eeʹttǩeeʹjid.
– Leäm tuejjääm teâđsteeʹl tuâj tõn ouʹdde, što säʹmmlai jiõnn kollʼjeʹči jäänab še Brysslest. Saǥstõõllmõš tuejjii kolleegaid jõnn vaaiktõõzz, da mäŋggaz vuõǯǯu tääiʹben mieʹldes ääiʹjbu čiŋŋlab fiʹttjõõzz säʹmmlai jieʹllemåårrmõõžžin di tõin vaʹǯǯtõõzzin, koid säʹmmla tåʹbdde veâl še tän peeiʹv, juätkk Henriksson.
Lääʹddjânnmest Renew Europe -jouʹǩǩe koʹlle Lääʹddjânnam ruõcclaž meerpeällõk (RKP) da Lääʹdd Kõõskõspeällõk. Euroopp parlameeʹnt lääʹdd vuäzzlain jouʹǩǩe koʹlle Anna-Maja Henriksson (RKP), Katri Kulmuni (Lääʹdd Kõõskõspeällõk) da Elsi Katainen (Lääʹdd Kõõskõspeällõk), kook leʹjje puk mieʹldd kuõʹssjeʹmmen.
Lââʹssteâđ:
Inka Saara Arttijeff
Meeraikõskksaž aaʹšši piisar
050 5747629
inka-saara.arttijeff@samediggi.fi
