Sääʹmteeʹǧǧ vaal-luʹvddkååʹdd raukkmin lââʹssčiõlǥtõõzzin eeʹjj 2027 vaal-loǥstõʹǩǩe meârkkmõõžž diõtt

Lääʹǩǩ sääʹmteeʹǧǧest ođsmi eeʹjjest 2025 da oođuum lääʹjjpääiʹǩ (414/2025) šõʹdde viõʹǩǩe 1.8.2025. Oođummuž diõtt sääʹmteʹǧǧ vaal-luʹvddkååʹddest lij lääʹjjmeâldlaž tuâjj taʹrǩsted puki eeʹjj 2024 vaal-loǥstõõǥǥâst åårrai oummui vaal-loǥstõʹǩǩe lââʹzztummuž oudldõõzz. Oođuum da ååʹn viõǥǥâst åårrai sääʹmteʹǧǧlääʹjj mieʹldd sääʹmteeʹǧǧ eeʹjj 2027 vaal-loǥstõʹǩǩe meârkkmõõžž oudldõs lij eeʹjjest 2026 puõʹttinallšem:

3 § (27.6.2025/414)

Vuõiggâdvuõtt šõddâd miõrkkum vaal-loǥstõʹǩǩe

Vuõiggâdvuõtt šõddâd miõrkkum vaal-loǥstõʹǩǩe lij oummust, kååʹtt âânn jiijjâs säʹmmliʹžžen, õõlǥteeʹl što:

1. ooumaž jiõčč leʹbe aainâs õhtt suu puärrsin, ääʹjjest leʹbe ääkkast, leʹbe maaddârääʹjjest leʹbe maaddârääkkast lij mättjam sääʹmǩiõl vuõssmõs ǩiõllân.

Oummu meârkkmõš oouʹdab vaal-loǥstõʹǩǩe ij leäkku nuʹt snäätnai tõn beäʹlnn, što suu õõlǥči meârkkad še eeʹjj 2027 vaal-loǥstõʹǩǩe. Vaal-luʹvddkåʹdd taaʹrǩast lääʹjj oudldem naaʹlin puki eeʹjj 2024 vaal-loǥstõʹǩǩe miõrkkum oummuin, teâuddje-a seeʹst ååʹn viõǥǥâst åårrai lääʹjj oudldõõzz. Oummuid, kooi beäʹlnn vaal-luʹvddkåʹdd ij leäkku vuäittam ainsmâʹtted ns. ǩiõllkriteeʹr teâuddjummuž, siʹjjid lij vuõlttuum lââʹssčiõlǥtõsraukkmõš.

Lââʹssčiõlǥtõsraukkmõõžž vuäǯǯam oummust lij vueiʹtlvažvuõtt tååimted snäätnas čiõlǥtõs ns. ǩiõllkriteeʹr teâuddjummšest ouddâl tuʹmmstõktuâj tõʹst, meärkat-a suu eeʹjj 2027 vaal-loǥstõʹǩǩe. Jõs jeät raukkum lââʹssčiõlǥtõõzz tååimat mieʹrrääiʹjest, aʹrvvõs lääʹjj õõlǥtem ǩiõllkriteeʹr teâuddjummšest tueʹjjeet ââʹnnemnalla åårrai aunstõõzz vuâđald.

Lââʹssteâđaid oudd:

Sääʹmteeʹǧǧ vaal-luʹvddkåʹdd
Sääʹmkulttuurkõõskõs Sajos
vaalit(at)samediggi.fi