Sääʹmteʹǧǧ ååcc mieʹrräiggsaž projeʹktt-tuâjjla nuõrisuåvtõõzz De! 2 -haʹŋǩǩõʹsse

Projeʹktt-tuâjjla tuâjjan lij sääʹmǩiõllsa da -kulttuur meâldla nuõrituâj ooudâsviikkmõš sääʹmvuuʹd kooʹddin haʹŋǩǩõsplaan meâldlânji õõutveäkka Sääʹmteeʹǧǧ nuõrisuåvtõõzz da haʹŋǩǩõõzz vuäʹpstemjooukin. Projeʹktt-tuâjjlaž plaanad da veekk čõõđ nuõri âsttääiʹj toiʹmmjummuž di jääʹrjast toiʹmmjummuž jeeʹres päiʹǩǩ-kooʹddin sääʹmnuõri tuõivvji da taarbi vuâđald õhttsažtuâjast sääʹmvuuʹd kooʹddivuiʹm. Projeʹktt-tuâjjlaž vaʹsttad haʹŋǩǩõõzz vueʹjj jäʹrjstummšin di čõõđ viikkmõõžžâst da rapoort raajjmõõžžâst.

Tuâjj äälǥči suåppmõõžž mieʹldd påʹrǧǧmannust 2025 da peštt 11 määnpââʹjjed.

Ââʹntem-mäinnan lij tuâj õõlǥtem šiõttlõs škooultõs da sääʹmǩiõl täidd (asetõs 1727/95). Uʹvddep äärv jiõččnaž da samai tääʹrǩes tuejjummša, pueʹrr õhttsažtuâjj- da vuârrvaaiktemtääidaid di härjjnummša projeʹktt-tuõjju da šõddmõõžži jäʹrjstummša. Pueʹrren ǩiõččât še härjjnummuž nuõrituõjju.

Projeʹktt-tuâjjla tåimmpäiʹǩǩ lij sääʹmkulttuurkõõskõs Sajoozzâst, ougglõstuâjj vuässas lij vueiʹtlvaž. Tuâj håiddmõš õõlǥat reissjummuž sääʹmvuuʹdest da vuejjamkoort/jiijjâs aaut âânnmõõžž.

Päʹlǩǩvuõtt meäʹrtââvv Sääʹmteeʹǧǧ päʹlǩǩriâšldõõǥǥ väʹǯǯelvuõtt-tääʹzz V/II mieʹldd (vuâđđpäʹlǩǩ 2490,57 euʹrred/mp). Vuâđđpääʹlǩ lââʹssen määuʹset sääʹmvuuʹdest tuâj tuejjeen 24 % sääʹmvuuʹd lââʹzz da tuõjjuhärjjnem mieʹldd meäʹrtõõvi lââʹzz.

Jiijjâs maall meâldlaž ooccâmǩeʹrjj di vueiʹtlvaž tuâjjpäiʹǩǩloǥstõk da jeeʹres meâlddõõzz âʹlǧǧe tååimted Sääʹmteeʹǧǧ piisarkådda 31.7.2025 mõõneeʹst tän ooccâmlomaakk pääiʹǩ (ävvan ođđ ikkna): Ooccâmlomakk

Sääʹmteeʹǧǧ nuõrisuåvtõs lij vuäǯǯam nuõrituâj ooudâsviikkâmhaʹŋǩǩõʹsse 55 000 e teäggtõõzz Lappi Vuʹvddvaaldâšmkonttrest.

Lââʹssteâđaid tuâjast oudd tuâjjlažkåʹddjååʹđteei Ida Pirttijärvi, ida.pirttijarvi(at)samediggi.fi da teʹlf. 040 660 77 22 äiʹǧǧkõõsk 14.-25.7.2025.

Sääʹmteeʹǧǧ toiʹmmjummša vuäitt tobdstõõttâd neʹttaddrõõzzâst www.samediggi.fi da nuõrisuåvtõõzz toiʹmmjummša addrõõzzâst www.nuor.fi

Aanrest 26.6.2025
Sääʹmteʹǧǧ