Vuâđđlääʹǩǩvälljkåʹdd uuʹdi smiõtldõõǥǥâs sääʹmteʹǧǧlääʹjjest – Sääʹmteeʹǧǧ halltõs ǩiõttʼtââll ääʹšš piâtnâc

Vuâđđlääʹǩǩvälljkåʹdd uuʹdi seärad 4.6. smiõtldõõǥǥâs sääʹmteʹǧǧlääʹjjest. Smiõtldõõǥǥâst jeät eʹtǩǩuku muttsid vuõiggâdvuõđ šõddâd miõrkkum vaal-loǥstõõǥǥ kuõskki 3 §:ffe ij-ǥa saǥstõõllâmõõlǥtõõzz kuõskki 9 §:ffe. Muttâz kueʹsǩǩe muuttâsooccâmluʹvddkååʹdd räʹtǩǩeemnorrõõzz di läittamvuâđaid ââʹlmõs vaaldšemvuõiggsa.

– Vuâđđlääʹǩǩvälljkåʹdd lij ǩiõttʼtõõllâm vuâđ mieʹldd sääʹmteʹǧǧlääʹǩǩeʹtǩǩõõzz da âânnam tõõzz jiânnai ääiʹj. Šiõǥǥ, što ǩiõttʼtõõllmõš lij ååʹn vuõǯǯum maaʹle. Sääʹmteeʹǧǧ halltõs ǩiõttʼtââll ääʹšš vuõss-sââʹjest da teâđat ääʹššest såbbar mâŋŋa, särnn Sääʹmteeʹǧǧ saaǥǥjååʹđteeʹj sâjjsaž Tuomas Aslak Juuso.

Sääʹmteʹǧǧ vuässõõđi alggeeʹjjest aktiivlânji vuâđđlääʹǩǩvälljkååʹdd kuullmõõžžid lääʹǩǩeʹtǩǩõõzzâst. Eʹtǩǩõõzz vuõltteeš vuâđđlääʹǩǩvälljkådda 14.2.2024, koozz mädd- da meäʹcctäällvälljkååʹdd, tällõsvälljkååʹdd da tuâjj–jieʹllem da tääʹssärvv-välljkååʹdd õõlǥi uʹvdded ciâlklmes lääʹǩǩeʹtǩǩõõzzâst.

– Späʹssbõõžžam vuâđđlääʹǩǩvälljkååʹdd da saaǥǥjååʹđteeʹjj Heikki Vestmaan proseeʹssest da tõʹst, što Sääʹmteʹǧǧ lij vuäǯǯam tõõzz kuulli sââʹj da pâsttam vuässõõttâd vuâđđlääʹǩǩvälljkååʹdd kuullmõõžžid, juätkk Juuso.

Sääʹmteeʹǧǧ sååbbar priimi mõõnni vaalpââʹjest eʹtǩǩõõzz sääʹmteʹǧǧlääʹjjest jiõnin 15–3, 1 kuâras. Lââʹssen Sääʹmteeʹǧǧ sååbbar uuʹdi halltõʹsse väʹlddvuõđid oouʹdeed lääʹǩǩeʹtǩǩõõzz da taarbšeen saǥstõõllâd muuttâseʹtǩǩõõzzin, jõs ääʹšš jeät vuõittu tõn ǩirrsallašvuõđ diõtt puʹhtted ođđ Sääʹmteeʹǧǧ såbbra. Sääʹmteʹǧǧ da vuõiggâdvuõttministeria saǥstõʹlle sääʹmteʹǧǧlääʹjj kuõskki eʹtǩǩõshämmsest sääʹmteʹǧǧlääʹjj 9 §:n meâldlânji jooulmannust 2023 da vuåǯǯu saǥstõõllâmpuäđõõzz pueʹrr miõlin.

Vuâđđlääʹǩǩvälljkååʹdd smiõtldõk âânn seʹst kueʹhtt vueʹsttjuurd. Vuâđđlääʹǩǩvälljkåʹdd leäi kuuitâǥ õõutmiõllsaž vuâđđlääʹjj meâldlažvuõđ kuõskki aʹrvvõõzzâst.

Lââʹssteâđ lääʹǩǩoođõõzzâst:

• Tuâǥǥaž: Meeraikõskksaž ooumažvuõiggâdvuõttsuåppmõõžži vuåppâmorgaan (YK ooumažvuõiggâdvuõttkomitea da rooddsuärddmõõžž vuâsttsaž komitea) uʹvdde iiʹjjin 2019 da 2022 Lääʹddjânnma viârteei tuʹmmstõõǥǥid õhttneeʹl Sääʹmteeʹǧǧ vaal-loǥstõʹǩǩe. Oođõõzz jorddmõššân lij čõõđ viikkâd täid vuåppâmorgaani räʹtǩǩummšid da jaukkeed ooumažvuõiggâdvuõttneuʹrrummšid, di peeiʹvted juʹn vuäʹmm lääʹjj ouddm. jiõnstemnaaʹli beäʹlnn.
• Täävtõs: Oouʹdeed säʹmmlai jiõččmieʹrreemvuõiggâdvuõđ teâuddjummuž di pueʹreed säʹmmlai ǩiõlâs da kulttuurâs kuõskki jiõččvaaldâšm da Sääʹmteeʹǧǧ tåimmamoudldõõzzid.
• Valmštõõllmõš: Oođõs vuâđđââvv kansliašurr Pekka Timonen tåimmkååʹdd eʹtǩǩõõzzid di oouʹdab tåimmkooʹddi tuõjju. Eʹtǩǩõõzz valmštõʹlleš õhttsažtuâjast Sääʹmtiiʹǧǧin.
• Kõskksa muttâz:
  • Vaal-loǥstõʹǩǩe meärkkmõõžž oudldõõzzid oođeet. Juätkast vaal-loǥstõõǥǥ beäʹlnn lij kõõččmõš tåʹlǩ vuõiggâdvuõđâst jiõnsted da äʹlǧǧed eeʹttǩeeʹjen sääʹmteʹǧǧvaalin ij-ǥa tõʹst, ǩeän vueiʹtet ââʹnned säʹmmliʹžžen. Vaal-loǥstõʹǩǩe meärkkmõõžž kriteeʹr vaʹstteʹče nääiʹt Ruõccjânnmest da Taarrjânnmest valddum ǩiõʹlle vuâđđõõvvi vueʹlǧǧemsõõʹjid
  • Jiõččnaž da čõnnõõttʼteʹmes muuttâsooccâmluʹvddkåʹdd tååimči vuõssmõssân muuttâsooccâmtääʹssen vaal-loǥstõõǥǥ kuõskki aaʹššin sääʹmteeʹǧǧ halltõõzz sâjja
  • Veʹrǧǧniiʹǩǩi saǥstõõllâmõõlǥtõõzz čiõlǥtet. Õhttsažtåimmam- da saǥstõõllâmõõlǥtõs ij veʹt veâl raaj veto-vuõiggâdvuõđ sääʹmtegga, pâi kõõččmõš lij mõõntõõllâmšiõtlmest
  • Vaali äiʹǧǧtaaulid da vaalmõõntõõllmõõžžid pueʹreet ouddm. hiâlpteeʹl jiõnstummuž sääʹmteʹǧǧvaalin.

Vuâđđlääʹǩǩvälljkååʹdd teâđtõs 4.6.2025 https://www.eduskunta.fi/FI/teâđtõõzz/Seeid/Vuâđđlääʹǩǩvälljkååʹdd-smiõtldõk-sääʹmteʹǧǧlääʹjjest-lij-valmštõõvvâm.aspx

Ääʹšš ǩiõttʼtõõllâmteâđ eeʹttiǩ-kååʹddest https://www.eduskunta.fi/FI/vaski/ǨiõttʼtõõllâmteađRiikkpeiʹvväʹšš/Seeid/HE_100+2023.aspx

Lââʹssteâđ:

Tuomas Aslak Juuso
Saaǥǥjååʹđteeʹj sâjjsaž
040 687 3394
tuomas.juuso@samediggi.fi