Sääʹmteʹǧǧ räukk kommeeʹntid Säʹmmlai dommvuuʹd luâttreeʹǧǧesvuõttplaan kõskktäʹrǩstõõllmõõžž vääras
Sääʹmteʹǧǧ vuässââtt 26.-27.1.2026 Meäʹcchalltõõzz jäʹrjstem Säʹmmlai dommvuuʹd luâttreeʹǧǧesvuõttplaan 2022–2027 kõskktäʹrǩstõõllmõʹšše luâttreeʹǧǧesvuõttplaan õhttsažtuâjj-joouk vuäzzliʹžžen. Kõskktäʹrǩstõõllmõʹšše valmštõõttmõõžž õhttvuõđâst Sääʹmteʹǧǧ haaʹlad kuullâd veiddsânji säʹmmlaid vuuʹd õõʹnnʼjid.
Luâttreeʹǧǧesvuõttplaan liʹnjjʼjad riikk vaaldšem mädd- da čääʹccvuuʹdi kuʹǩes äiʹǧǧkõõsk ekolooglânji, tällõõzzlânji, sosiaalʼlânji ja kulttuurlânji ǩeâllʼjeei âânnmõõžž. Säʹmmlai dommvuuʹd luâttreeʹǧǧesvuõttplaan 2022–2027 kätt veeʹzz Säʹmmlai dommvuuʹd, leʹbe Jeänõõǥǥ, Aanar da Uccjooǥǥ kååʹdd di Suäʹđjel kååʹddest Lappi paalǥâskååʹdd vuuʹdest riikk vaaldšem mädd- da čääʹccvuuʹdid.
Mâta luâttreeʹǧǧesvuõttplaanâst tuõđât ”Tän luâttreeʹǧǧesvuõttplaan kõskksaž jeäʹrdõs Meäʹcchalltõõzz jeeʹres luâttreeʹǧǧesvuõttplaanid lij tõʹst, što täʹst luâttreeʹǧǧesvuõđi håiddmõš, âânnmõš da suõjjlummuš õʹhttesuåvtet vuäʹmsteei šiõtteem täävtõõzzid da pääiklaž täävtõõzzid nuʹt, što seämma-ääiʹj tuõrvât säʹmmlai kulttuur vueʹǩǩâttmõõžž õõlǥtõõzz.” (s. 4.)
Raukkâp vuäinlmid säʹmmlain vuuʹd õõʹnnʼjin jeäʹrben puõʹtti aaʹššin:
- Mäʹhtt luâttreeʹǧǧesvuõttplaanummšest listtuum tååim liâ teâuddjam jeäʹrben sääʹmkulttuur ǩiõččâmvueʹjjest?
- Måkam vueiʹtlva ođđ taarb liâ kaggõõttâm ouʹdde luâttreeʹǧǧesvuõttplaanummša õhttneeʹl?
- Måkam ooudâsviikkâmtaarb sääʹm tåimmjeeʹjin liâ õhttsažtuâj pueʹreem diõtt Meäʹcchalltõõzz årra?
Vuõlttâd vuäinlmad neʹttpååʹštin 21.1.2026 mõõneeʹst:
- Vuõlttâd saakk addrõõzzid: info@samediggi.fi da olsen-ljetoff@samediggi.fi
- Ǩeeʹrjet saaǥǥ äʹššen: Säʹmmlai dommvuuʹd luâttreeʹǧǧesvuõttplaan kõskktäʹrǩstõõllmõš.
Tobdstõõđ Säʹmmlai dommvuuʹd luâttreeʹǧǧesvuõttplaaʹne 2022-2027: https://julkaisut.metsa.fi/wp-content/uploads/sites/2/2022/07/säʹmmlai_dommvuuʹd_lvs_suomi.pdf
Lââʹssteâđ:
Laura Olsén-Ljetoff
Jieʹllemvueʹǩǩpiisar
040 617 5113 / 010 839 3123
laura.olsen-ljetoff@samediggi.fi
