Aanar da Sør-Varangi kååʹdd vuõǯǯu teäggtõõzz vuõsshaʹŋǩǩõʹsse nuõrttsääʹm ǩiõl da kulttuur jeälltummšen
Aanar da Sør-Varangi kååʹdd alttee teäggtõõzz vuõsshaʹŋǩǩõõzz nuõrttsääʹm ǩiõl da kulttuur jeälltummšen. Haʹŋǩǩõʹsse miõʹtteš teäggtõõzz Interreg Aurora –prograamm Sápmi-vueʹzzest programmpââʹj 2021–2027 vuõssmõs ooccâmkõrvvjin. Haʹŋǩǩõõzz meersaž vaast-teäggtõs Taarrâst puätt Sääʹmteeʹǧǧest da Trooms da Finnmaark lääʹnest da Lääʹddjânnmest vaast-teäggteei lij Lappi lett. Interreg Aurora 2021–2027 lij ođđ programm Euroopp Interreg-õhttsažkååʹddest raaj râstldeei õhttsažtuâj vääras da tõn Sápmi-vueʹss kätt Sääʹmjânnam vuuʹdid Taarrâst, Lääʹddjânnmest da Ruõccâst. Haʹŋǩǩõõzz plaanummša liâ vuässõõttâm jeeʹres vueʹssbeäʹl jm. Nuõrttsääʹmkultturfoond eeʹttǩeeʹj da Sääʹmteeʹǧǧ ǩiõlläʹšštobddi.
Sääʹmteeʹǧǧ saaǥǥjååʹđteeʹjj Tuomas Aslak Juuso âânn haʹŋǩǩõõzz vääžnʼjen da tuâtt: ”Leäm rämmai, što haʹŋǩǩõs šâdd. Haʹŋǩǩõs lij tuõđi tääʹrǩes, ǥu tõt jeällat da raʹvvai nuõrttsääʹm ǩiõl da nuõrttsääʹm kulttuur raajid râstldeei õhttsažtuâjain. Haʹŋǩǩõs ooudâsvieʹǩǩat še vuässas Sääʹmteeʹǧǧ Ǩiõllpoliittlaž tåimmam- da ooudâsviikkâmprogrammâst 2020-2023 nõõmuum täävtõõzz čiõlǥeed vueiʹtlvažvuõđid altteed ǩiõllkõõskõõzzid jeäʹrben tõid vuuʹdid, koin ǩiõlljeälltummša lij šuurmõs tarbb, mâta nuõrttsääʹmǩiõl mainstemvuuʹdin.”
Še Sääʹmteeʹǧǧ ǩiõllsuåvtõõzz saaǥǥjååʹđteeʹjj Tauno Ljetoff lij kuärǥaž ođđsest. ”Lij samai pueʹrr, što nuõrttsääʹm ǩiõll- da kulttuurkõõskõõzz vuõssčiõlǥtemhaʹŋǩǩõʹsse lij miõttum teäggtõs. Tät lij šiõǥǥ ouddmiârkk tõʹst, mäʹhtt EU da Interreg teäggtõs vueiʹtte tuärjjeed nuõrttsääʹmkulttuur da vaarvuâla nuõrttsääʹmǩiõl jeälltummuž da še čuäjtõs tõʹst, što vaarvuâla uuʹcces ǩiõlid še uuʹdet äärv. Nuõrttsääʹm ǩiõl da -kulttuur jeälltummuš lij luândlaž riikki raajid râstldeei õhttsažtuâj. Tuäivam, što nuõrttsäʹmmla nuʹt Aanar ǥu Sør-Varanger kååʹddest vuässõõđče vuõssčiõlǥtemhaʹŋǩǩõõzz poodd čõõđtem såbbrid jõnn jooukin, što õhttsažkååʹdd vuäinlmõõžž da taarb šâʹdde kullum”
Haʹŋǩǩõs čõõđtet 15.1.-15.7.2023 da vuõsshaʹŋǩǩõõzz poodd plaaneet jiõččveärla määŋgekksaž väʹlddhaʹŋǩǩõõzz nuõrttsääʹm ǩiõll- da kulttuurkõõskõõzz raajjmõššân. Haʹŋǩǩõõzz poodd kuulât nuõrttsääʹm meer vaiddsânji sij vuäinlmõõžžin da taarbin nuʹt Taarr ǥu Lääʹdd beäʹlnn.
- Interreg Aurora First Interreg Aurora projects approved
- Aanar kååʹdd dommseidd: Aanar da Sør-Varangi kååʹdd alttee vuõsshaʹŋǩǩõõzz nuõrttsääʹm ǩiõl da kulttuur jeälltummšen
Lââʹssteâđaid:
Tuomas Aslak Juuso
Saaǥǥjååʹđteeʹjj
040 687 3394 tuomas.juuso@samediggi.fi
Marko Marjomaa
Sääʹm ǩiõllaaʹššipiisar
50 438 2 484 / 10 839 3 183
marko.marjomaa(at)samediggi.fi
Snimldõk: Ville Fofonoff
