Bareeʹnts euroaarktlaž suåvtõõzz alggmeertuâjj-joukk jäʹrjsteʹmen nuuʹbb EU-Sääʹm jõnnsåbbar

Vuõssmõs vuâra pâʹjjel kuõiʹt eeʹjj sizz Bareeʹnts alggmeerai tuâjj-joukk (WGIP) noorõõđi muâttšeeʹli saǥstõõllâd rosttovmannu looppâst tuâjj-joouk kõskksâjjsaž aaʹššin da tõn pueʹttiääiʹjest. Tät sååbbar toiʹmmji tääʹrǩes vuâlžen rââst raaʹji vuällai õhttsažtuõjju.

Snimldõk: European Union 2023 – Source : EP

Õhtt såbbar jäänmõsân miârkteei tuʹmmstõõǥǥin leäi jäʹrjsted nuuʹbb EU Sääʹm jõnnsåbbar (EU Sámi Summit), koonn tääʹvtõsân lij raajjâd da nââneed EU-tääʹzz õhttsažtuâj. Tuâjj-joouk saaǥǥjååʹđteei Janne Hirvasvuopio õlmmii tuõivvjes tõʹst, što sääʹmõhttsažkåʹdd tuejjad õõutveäkka rââst raaʹji vuällai tuâj EU sääʹmaaʹššin teâđstummuž lââʹzztem õuʹdde: 

Meeʹst feʹrttai aktiivlânji mušttʼted Bryssel tõʹst, što leäʹp tääiʹben da säʹmmla viâʹhhe čuõkku jiiʹjjeez puõʹttiäigga. 

Sääʹm jõnnsåbbar teäggtet tuâjj-joouk Sääʹmteeʹǧǧ åålǥpeällsaž jiiʹjjes-i teäggtõõzzin, koonn lââʹssen jeeʹres åålǥpeällsaž teäggtõsvueiʹttemvuõđid kaartʼtet. Tän lââʹssen kueiʹmmkõskkvuõđid põõrǥât raajjâd rââst raaʹji vuällʼjen sääʹm meerõhttsažkååʹddest, sääʹminstituutioin da pukin Sääʹmtiiʹǧǧin.

Tuäivam, što tät nuʹbb jõnnsååbbar pohtt säʹmmlaid tuejjeed õõutveäkka, mâʹst pukid säʹmmlaid lij äuʹǩǩ, Hirvasvuopio tuâtt. 

Tuâjj-joukk õõʹni še poodd äuʹǩǩen Tâʹvvjânnmi kriittlaž ooumažvuõiggâdvuõttkõõččmõõžži ǩiõttʼtõõllma. Tuâjj-joukk puuʹti täid huõlid Lääʹdd ooumažvuõiggâdvuõttkõõskõʹsse, kååʹtt lij čõõnõõttâm tuejjeed õhttsažtuâj täi vaʹǯǯtõõzzi čåuʹddma. 

Lââʹssen tuâjj-joukk kaaunõõđi Lääʹdd Barents-ambassniiʹǩǩin Marja Joenusvain da späʹssbõõžži suu ciʹsttjeei âlddnemnääʹlest pukin saǥstõõllmõõžžin suu konttâr da Lääʹdd Sääʹmteeʹǧǧ kõõsk. Lääʹdd mââimõs Barents-õhttsažtuâjjeeʹjj jåttjeeʹn tuâjj-joukk raavii čõõnõõttmõõžž nâânn õhttsažtuõjju da õõudårra viikki vuârrsaǥstõõllmõõžž tuõʹllʼjem vääras tuâjj-joouk da Lääʹdd halltõõzz kõõskâst. 

Såbbar saǥstõõllmõõžž da tuʹmmstõõǥǥ miârkkšâʹvve miârkteei õuddnummuž Barents-õhttsažtuâj vaʹǯǯtõõzzi ǩiõttʼtõõllmõõžžâst rââst Sääʹmjânnam raaji. Tõk käʹǧǧe še tõn õuʹdde mõõnn tääʹrǩes lij määŋgkõskksaž õhttsažtuâjj. 

Lââʹssteâđ:
Janne Hirvasvuopio
Bareeʹnts euroaarktlaž suåvtõõzz alggmeertuâjj-joouk saaǥǥjååʹđteei
janne.k.hirvasvuopio@gmail.com
+358 50 533 7016


Jueʹjj seeid ooudårra

Jeeʹres ođđâz