Bodø ǩeʹrddempäärtast 50 eeʹǩǩed – Sääʹmteʹǧǧ moštt päärtast jaaʹmmjid mušttlempooddin da mušttlemliipptõõzzin
Snåsa sääʹmkonfereʹnss 1974. Čiʹǯspeäʹlnn Nils-Aslak Valkeapää, Juhani Nousuniemi da Pekka Lukkari. Snimldõõǥǥâst kuâras pääiʹǩ, ǥu läppjam väʹlddõskååʹdd vuäzzla vaillu pääiʹǩest. Snimldõk: Juhani Nousuniemi arkiiv
Vuõssaarǥ 24.6.2024 teâuddai 50 eeʹǩǩed Bodø ǩeʹrddempäärtast, koʹst läppje viiđâs sääʹmväʹlddõskååʹdd vuäzzlain da ǩiʹrddi.
Sääʹmvälddõskååʹdd vuäzzla leʹjje jååʹttmen tâʹvvjânnmallaš sääʹmkonferenssa Taarr peälla, ǥu siʹjjid jååʹđtam ǩiʹrddimašina läppji ââlda Bodø 24.6.1974. Mašina ij õinn leäkku käunnʼjam.
Ǩiʹrddimašina mieʹldd läppje sääʹmväʹlddõskååʹdd vuõssmõs saaǥǥjååʹđteei Reidar Suomenrinne Uccjooǥǥâst, Jouni Aikio Vuâččast, Uula A. Länsman Angelist, Artto Sverloff Čeʹvetjääuʹrest da Jouni J. Vest Rovisuvantost di ǩiʹrddi Pekka Niemi.
– Sääʹmteʹǧǧ ciʹsttai päärtast jaaʹmmji moošt ââʹneeʹl jõõskâs mušttlempoodd Sääʹmteeʹǧǧ tiuddsåbbar aalǥâst seärad 19.6. da jäʹrjsteeʹl mušttlemliipptõõzz Sajoozzâst 24.6., särnn Sääʹmteeʹǧǧ saaǥǥjååʹđteei Pirita Näkkäläjärvi.
